Read kumam 2 Jokorinti 7 Bible Online

2 Jokorinti 7 - kumam bible

2 Jokorinti 7

¹Wun jo na kame amaro, bala kame otienu kede cikere nogi, wek olonyerenu ki gi dedede kame munao kom wa kede cuny wa, di okounu bedo jo kame lworo Rubanga, tetekeny odokunu jokacil atwal.

²Yabunu cunyu but wa; wan likame otieko timo ne ngatamoro raco, likame odubo ngatamoro, likame obedo kede adiadia but ngatamoro i gire.

³Likame atie yamo man pi ngolo kop i wi wu, pien ango oudo atieko waco sek be wan omaro wu, obinunu to arabo kuo karacel.

⁴Ango ageno wu kitek; ango awakere piru twatwal; wun ikweunu cunya; ango atie kede yomcuny i can dedede kame wan obeo iye.

⁵Pien akadi kakame otuno kede Makedonia, likame kom wa oudo wei moro, do oneno can i yote dedede, atwomutwomun oudo wok ki bad dedede, doko lworo oudo dwong i cuny wa.

⁶Do Rubanga, ngat kame kweo cuny jo kame tie kede par, oko kweno cuny wa pi bino ka Tito,

⁷doko likame pi bino mere kenekene, do pi ekite kame wun ikweunu kede cunye da. En ewaco ne wa ekite kame cunyu oudo paro nena kede, iturur wu, kede ekite kame iparunu kede pira, en omio nan ango atie kede kilel kame kalamo.

⁸Pien bed bala baluwa na oudo owango cunyu, ango likame atie kede par moro iye (bed bala oudo abedo kede par iye, pien ango aneno be baluwa nono oudo owango cunyu, bed bala pi kare acecek kenekene).

⁹Do nan ango alelo, likame alelo pi oudo awango cunyu, do pien wangcuny wu omio ikounu swilaro; pien ibedunu kede wangcuny kame Rubanga mito, omio likame tie raco moro kame wan otimo ne wu.

¹⁰Pien wangcuny kame Rubanga mito kelo iswilar kame tero dano i alako, doko likame ekelo paro gikame okato, do wangcuny me piny kan kelo to.

¹¹Nenunu ber gikame Rubanga oko timo kede wangcuny wu: epone kame mit me cunyu tie kede, epone kame imitunu nyuto kede be iliunu kede raco moro, epone me gero wu, lworo wu, epone kame iparunu kede pira, kede epone kame imiunu kede alola pi tim arac! Wun itiekunu nyuto be wun iliunu kede raco moro i kop nono dedede.

¹²Aso, bed bala ango oudo awandiko ne wu baluwa nono, likame oudo ango awandiko en pi ngat kotimo rac, arabo pi ngat kame kotimo ne raco, do ango oudo awandiko baluwa nono pi nyuto ne wu i nyim Rubanga epone kame iparunu kede pirwa.

¹³Manono en kame kweo cuny wa. Medo i wi kweicuny wa, wan olelo kalamo pi kilel kame Tito tie kede, pien wun dedede itiekunu kweno tam mere.

¹⁴Pien ka ango oudo awakere ne piru, likame imiunu lewic omaka; do bala kite kame gi dedede kame wan owaco ne wu oudo obedo kede gi me ateni, kamanono da ewaka wa i nyim Tito odoko gi me ateni.

¹⁵Aso, ka en eyutuno epone kame wun dedede oudo ilubunu kede pwony mere, kede epone kame igamenu kede lworo kede mielkom, amara mere butu meede ameda.

¹⁶Ango alelo pien ageno wu kitek.