Read kumam Jogalatia 1 Bible Online

Jogalatia 1 - kumam bible

Jogalatia 1

¹Baluwa kowok kibut Paulo ngaor, kame or mere likame owok kibut jo amoto obeo kibut dano moro, do ngat kame or mere owok kibut Yesu Kirisito kede kibut Rubanga Papa, ngat koyaruno en kikom jo oto.

²Ango acwao baluwa noni karacel kede imiegu kede amiegu dedede kame tie keda. But ikodeta dedede me jokirisito i Galatia.

³Kisa kede mulem kame wok kibut Rubanga Papa wa, kede kibut Rwot Yesu Kirisito bed butu.

⁴Kirisito ojalere pi dub wa, pi lako wa ki kare kanataman me dub noni, di lubere kede mit ka Rubanga wa, en Papa wa.

⁵Deyo bed but Rubanga ikar kede ikar! Amen.

⁶Ango auro twatwal, pien itienu susunyo weko Rubanga ngat kolwongo wu pi kisa ka Kirisito di ikounu lokere i ejiri apat.

⁷Likame pien ejiri moro ace bobo tie, do tie jo mogo kame lolo wu di kimito loko ejiri ka Kirisito.

⁸Do akadi bed bala wada, amoto malaika moro kowok ki malo tuc ne wu ejiri kalikame upere kede maca kame wan oudo otuco ne wu, miero lame.

⁹Bala kite kame wan oudo otieko waco kede, omedo doko waco kamanono be, ka ngatamoro tie tuco ne wu ejiri kalikame upere kede ejiri kame bin igamunu, miero lame.

¹⁰Iparunu be ango do atie mono pwoc kibut jo arabo kibut Rubanga? Arabo iparunu be ango atie tamo yomo cuny jo? Ka koto di oudo pwodi ango atie yomo cuny jo, koto likame ango abedo ngatic ka Kirisito.

¹¹Imiegu kede amiegu na, ango amito ingeunu be, ejiri kame oudo ango atuco likame owok kibut dano.

¹²Pien likame ango agame kibut dano amoto dano en kopwonya iye, do ango aude ki nyutere ka Yesu Kirisito.

¹³Pien wun itiekunu winyo epone me kuo kame oudo ango atie kede pi lubo edini me Iyudayan, epone kame atidilo kede ekodet me jo koyei Rubanga di atie kede gero, di atamo dudubo en.

¹⁴I edini me Iyudayan, ango en kame oudo atie anyim kalamo jo atot me lwak na. Oudo aketo cunya twatwal i itok me joakwari wa.

¹⁵Do Rubanga ngat kame bin opoka di pwodi likame konywala, di en eko lwonga pi kisa mere,

¹⁶cunye oko bedo yom pi nyuto Wode buta, tetekeny apwony kop i kome ne jo kalikame Iyudayan. Ango likame ako ot pi udo tam kibut ngatamoro,

¹⁷amoto ot Yerusalem but jo kame ogeo nango bedo joor. Do bin ango ako ot Arabia, di ako dwogo Damasiko.

¹⁸Ingei mwakini adek ango ako ot Yerusalem pi welao Kepa, ako dong bedo kede en pi ceng tomon kiwie kany.

¹⁹Do likame bobo ako neno ngaor moro ace, kwanyo kenekene Yakobo omin me Rwot.

²⁰I nyim Rubanga, ateteni likame ango atie ngalo i gikame awandiko ne wu!

²¹Di do ango ako ot i adulion me Siria kede Kilikia.

²²Oudo pwodi likame tie ngatamoro i ikodeta me jokirisito kame tie Yudea kame oudo otieko nena,

²³kenekene oudo kiwinyo di kowaco be, “Ngat kame bin tidilo wa nan do tie pwonyo kop i kom yei kame bin etamo dudubo.”

²⁴Gin kiko mino Rubanga deyo pi ango.