Read kumam Joepeso 3 Bible Online

Joepeso 3 - kumam bible

Joepeso 3

¹Kop noni en komio ango Paulo abedo mabus ka Kirisito Yesu piru jo kalikame Iyudayan.

²Pien ateteni wun itiekunu winyo be Rubanga pi kisa mere otieko mina timo tic pi bero wu,

³kede da epone kame konyuto na kede gikame omungere, bala kame atieko wandiko kede malo kano kede kope anonok go.

⁴Kame wun isomunu kop noni, ibinunu niang epone kame ango angeo kede gikame omungere i kom Kirisito.

⁵I kare asek, oudo likame komio jo ongeo gikame omungere noni, do nan Tipo otieko mino joor kede inabin kacil ongee.

⁶Mung noni en ine be, pi kop me ejiri, jo kalikame Iyudayan otieko doko jo kame nywako winyo ka Rubanga karacel kede Iyudayan, jo me kom acel, doko kinywako cikere acel i Kirisito Yesu.

⁷Ango komia adoko ngatic me ejiri noni di lubere kede giamia me kisa ka Rubanga kame emia di beo i tic me twer mere.

⁸Bed bala ango abedo dano me ajikini kalikame pire tek kikom jokacil dedede, do Rubanga oko mina kisa noni, pi kelo ne jo kalikame Iyudayan Kop Aber i kom abar kalikame wacere ka Kirisito,

⁹kede pi mino jo dedede ngeno iik me mung ka Rubanga kame oudo ekano pi kare alac, en ngat kame ecweo jame dedede.

¹⁰Etimere kaman tetekeny ekodet me jokirisito nyut epone atot apapat me rieko ka Rubanga ne tipere kame pugo i wi yamo, kede ne akarunikin kame tie i kabedere me i malo.

¹¹En etimo man di lubere kede iik mere kame bedo nakanaka, kame en etieko timo i Kirisito Yesu Rwot wa.

¹²I Kirisito, wan otwerunu ot i nyim Rubanga abongo lworo, doko di otienu kede gen atek pi yei wa i kom en Kirisito.

¹³Pi mano, ango akwao wu kur ikwanyunu cunyu pi can kame ango atie neno piru; gin kitie pi bero wu.

¹⁴Kop noni en komio ango ariondiko i nyim Papa,

¹⁵ngat kame ikodeta dedede kame tie i malo kede i lobo udo nying gi kibute.

¹⁶Ango akwao be, di lubere kede abar me deyo mere, wek Rubanga i Tipo mere emi wu twer kame mio wu idokunu tek i cunyu,

¹⁷kede be wek Kirisito bed i cunyu pi yei wu. Aso, cungunu kitek di ikounu moko i amara.

¹⁸Akwao be, wek wun karacel kede jokacil dedede itwerunu niang gikame obedo laco, boro atena, boro malo kede tuto,

¹⁹kede da ingeunu amara ka Kirisito kame kalamo ngec, tetekeny ipongunu kede gi dedede me ekite me kuo ka Rubanga.

²⁰Nan do deyo bed but Rubanga, en ngat kame pi twer mere kame tie tic kibut wa, etwero timo gikame tot kalamo kame wan okwao amoto otamo.

²¹Deyo bed bute i ekodet me jokirisito kede i Kirisito Yesu i kare lung, ikar kede ikar. Amen.