Read kumam Joepeso 5 Bible Online

Joepeso 5 - kumam bible

Joepeso 5

¹Pi mano, bala kame wun itienu kede idwe ka Rubanga kame emaro, lubunu ekite mere.

²Bedunu kede amara, bala kame Kirisito omaro wa kede di eko jalo kuo mere pirwa bala giamia kame ngwe kur, kede giayala but Rubanga.

³Do tim me caro kede tim me emuna me epone dedede, amoto eranga, kur winyere i komu, bala kame poore ne jokacil.

⁴Wekunu nyoto yamo, yamo me mingomingo kede yamo areco kalikame poore kede wu, do akaka manono bedunu kede pwoc but Rubanga.

⁵Ngeunu kiber be, likame tie ngacaro, arabo dano moro kame tie kede tim me emuna, amoto ngaeranga (pien eranga obedo epone acel kame jo woro kede cal jwogi), kame bino donyo i Ajakanut ka Kirisito kede me ka Rubanga.

⁶Kur ngatamoro ngalu kede kope me abe, pien gi nogi en kame mio lilo ka Rubanga poto i kom jo kalikame winye.

⁷Pi mano, kur ibedunu kede gi.

⁸Pien i kare moro bin wun itienu i colo, do nataman itienu i lero i Rwot. Pi mano, bedunu bala jo kame tie i lero.

⁹Pien anyakini me lero tie i gi dedede kame ber, kopoore, kede me ateni.

¹⁰Tamakinunu mono gikame yomo cuny Rwot.

¹¹Kur idonyunu i tice me colo kame anyakini gi kony gi li, do akaka manono nyutunu gi kakaler.

¹²Pien etie gi me lewic akadi pi waco gikame akodi jo nogo timo i mung.

¹³Do gi dedede kame lero nyuto, kidoko gikame neeno kakaler.

¹⁴Pien gi dedede kame doko gikame neeno kakaler obedo lero. En komio kowaco be, “Nganino, cei! Yaruno kikom jo oto, di Kirisito ko bino mini lero.”

¹⁵Pi mano, gwokerenu iepone kame ibedunu kede, kur ibedunu bala jo kalikame riek, do bedunu bala jo kame tie kede rieko,

¹⁶di itiunu kiber kede kare kame winyo omako wu iudunu, pien ceng nogi obedo ceng kalikame beco.

¹⁷Pi mano, kur ibedunu jo amiming, do tamakinunu niang gikame Rwot mito ne wu timo.

¹⁸Kur idonyunu mer kede bwini, pien mano bino dubo kuo wu; do akaka manono, miunu Tipo pong i cunyu,

¹⁹di iyamunu kenu kenu i sabuli, kede i were apat, karacel kede i were kame Tipo Kacil mio wu; werunu di ipakunu Rwot kede cunyu lung,

²⁰di imiunu pwoc nakanaka but Rubanga Papa pi gi dedede i nying Rwot wa Yesu Kirisito.

²¹Pi kite kame iworunu kede Kirisito, bedunu jo kame mwolere i loc wu kenu kenu.

²²Wun mon, mwolerenu i loc ka cuog wu bala kite kame imwolerenu kede i loc ka Rwot.

²³Pien icuo en kame obedo wi dako mere bala kame Kirisito da obedo kede wi ekodet me jokirisito, manoni en kome kame en ebedo Ngalak mere.

²⁴Bala kame ekodet me jokirisito mwolere kede i loc ka Kirisito, kamanono da poore mon mwolere i loc ka cuog gi i gi dedede.

²⁵Wun cuo, marunu mon wu bala kame Kirisito da omaro kede ekodet me jokirisito di eko jalo kuo mere pire.

²⁶En etimo man tetekeny emie edok gikacil pi kop mere, ingei lwoke i pii kame lonye,

²⁷me wek emi ekodet me jokirisito bute kene di etie gi me deyo, abongo karamoro kopwokere arabo karamoro korurujun, amoto gimoro ace kame cal kamanono, tetekeny ebed gikacil abongo raco moro.

²⁸Kamanono da, cuo poore maro mon gi bala kite kame kimaro kede kom gi ken gi. Ngat kame maro dako mere, udo emaro kome kene.

²⁹Pien likame tie dano kame dagi kome kene, do epite di egwoke kiber, bala kite kame Kirisito timo ne kede ekodet me jokirisito,

³⁰pien wan obedunu adulion me kome.

³¹Pien iwandik kacil waco be, “Kop noni en komio icuo bino weko papa mere kede toto mere, eko ribere kede dako mere, di gin jo are nogo kiko doko kom acel.”

³²Kop noni obedo mung adwong, do ango atie yame i kom Kirisito kede i kom ekodet me jokirisito.

³³Aso, ngat acelacel kikom wu poore maro dako mere bala kame emaro kede kome kene, doko dako da poore neno be eworo cware.