Read kumam Jopilipi 2 Bible Online

Jopilipi 2 - kumam bible

Jopilipi 2

¹Aso, ka tie supo cuny moro i Kirisito, ka tie kweno cuny moro kame yai ki amara, ka tie nywak moro i Tipo, ka tie cuny me isasir kede me kisa,

²mianu apong kede yomcuny pi wun bedo kede tam kame cacal, amara acel, kede winyere di itienu kede tam acel.

³Kur itimunu gimoro kede ewaka arabo kede cuny me woro, do bedunu kede cuny me mwolo, di ikounu tero bala jo apat beco kato wun.

⁴Wek kur ngat acelacel kibutu par pi mit mere kenekene, do epoore paro pi mit me jo apat da.

⁵Bedunu kede tam noni i diere wu bala kame Kirisito Yesu da oudo tie kede:

⁶Pien akadi di bin en etie Rubanga, do likame eko paro pi porere kede Rubanga.

⁷En emwolere, di eko bedo bala ngatic kame konywalo i cal me dano.

⁸Di do oudo etie i cal me dano, en emwolere di eko bedo kede wor tuno to, to mere i kom musalaba.

⁹Pi mano, Rubanga otinge malo twal di oko mine nying kame kato nying dedede.

¹⁰Man en omio cong dedede kame tie i malo kede i piny kede i dud lobo kukakino pi woro nying Yesu,

¹¹kede leb jo dedede tuco be Yesu Kirisito en Rwot, pi mino Rubanga Papa deyo.

¹²Pi mano, jo na kame amaro, bala kite kame lem iwinyanu kede nakanaka, nan da winyanu, likame i kare kame atie kede wu kenekene, do singo twatwal i kare kame nataman ali kede kibutu. Timunu tic kede lworo kede mielkom pi alako wu kenu;

¹³pien Rubanga tie tic kibutu, pi mino wu bedo tie kede mit kede teko me tic pi yomo cunye.

¹⁴Timunu gi dedede abongo ingungur arabo piem,

¹⁵tetekeny ibedunu abongo gimoro kame koromo bunano wu iye, kede abongo raco moro, idwe ka Rubanga kame li kede dub moro i dier lwak kotieko dubere kede kobilor, lwak kame wun irienyunu i dier gi bala acer kame rieny eko caro piny,

¹⁶di ilidenu i kop me kuo. Mano bino mino awakere i ceng me dwogo ka Kirisito be, likame aringo ringo me nono, arabo atimo tic me nono.

¹⁷Akadi bed bala ony remo na bala pwola i kom giamia kame koyalo pi yei wu, cunya yom, doko alelo kede wu dedede.

¹⁸Iepone acel nono wuda cunyu miero bed yom di ikounu lelo keda.

¹⁹Ango atie kede gen i Rwot Yesu pi cwano Temeseo butu oyotoyot, tetekeny kop kame awinyo i komu bin sup cunya.

²⁰Likame atie kede dano ace kame cal bala en, kame ateteni bino paro piru.

²¹Jo apat dedede paro pi mit gi kenekene do weko mit ka Yesu Kirisito.

²²Do wun ingeunu bero ka Temeseo, epone kame etimo keda tic me ejiri bala awobi kede papa mere.

²³Pi mano, ageno be abino cwane oyotoyot kame atieko neno gikame bino timere na;

²⁴doko atie kede gen i Rwot be ingei kare acecek ango da kikoma abino bino.

²⁵Ango atamo be ebedo gikaber pi ango cwano butu Epaporodito, ngat kame obedo omina, ngatic wad wa, sirikale wad wa, ngaor wu kede ngat kame okonya i peko na.

²⁶Pien wun imuenu, doko ebedo parere pien wun oudo iwinyunu be etuwo.

²⁷Ateteni oudo etuwo, doko ebuco to da. Do Rubanga oko bedo kede cuny me kisa bute, do likame but en kenekene do paka but ada, tetekeny kur abed kede cwercuny i wi cwercuny.

²⁸Cunya mito cwane butu kalamo, tetekeny ilelunu pi nene, bobo me wek cunya dwogi.

²⁹Aso gamenu i Rwot kede kilel wu lung; doko worunu akodi jo nogo,

³⁰piento en ebuco to pi tic ka Kirisito, di ecao kuo mere pi tieko timo na tic kame wun do oudo likame itwerunu timo na.