Read kumam Jopilipi 3 Bible Online

Jopilipi 3 - kumam bible

Jopilipi 3

¹Kop me ajikini mere, imiegu kede amiegu na, lelunu i Rwot. Likame ango abino ool kede nyogao wandiko ne wu gikame oudo atieko wandiko, pien kibutu etie gikame bino konyo wu.

²Gwokerenu ki kom igwogin, gwokerenu ki kom jo kame timo gikarac, gwokerenu ki kom jo kame ngolo dul kom gi.

³Pien wan en kame oudunu kepere me ateni, wan jo kame oworo Rubanga i Tipo mere, jo kame bedo kede deyo i Kirisito Yesu di likame kiketo gen gi atek i gi me kom.

⁴Akadi da, ada kikoma atie kede tien kop kame mia aketo gen atek i gi me kom. Ka ngatamoro tamo be etie kede tien kop kame mie eketo gen mere atek i gi me kom, ango atie kede kame loe.

⁵Kokepa di oudo atie kede ceng kanyauni, ango abedo dano me Isirael, awok ki ateker ka Benjamin, ango abedo Ngaeburania anywali me Iburanian. I kom kop kame mako Iswil, ango abedo Ngaparisayo;

⁶i kom kop kame mako keto cuny, riki ango atidilo ekodet me jokirisito; i kom kop adok i kom bedo ngat kopoore pi lubo Iswil, ango ali kede raco moro.

⁷Do gi dedede kame oudo tie bero kibuta, nan atero do be kony gi li pi Kirisito.

⁸Ateteni atero be gi dedede kony gi li pi bero kame kalamo, en ngeno Kirisito Yesu Rwot na. Ango akei gi dedede pire, doko atero gi bala yugi, me wek aud Kirisito,

⁹di oko bino wuda di atie i en. Likame pwodi doko ango atie kede poore amaka kikoma, kame bino pi lubo Iswil, do atie kede maca kame yei Kirisito en kame kelo, en poore kame wok kibut Rubanga pi yei.

¹⁰Ango amito ngeno Kirisito kede twer me iyarun mere, di ako nywako kede en can mere, ako doko cal kede en i to mere,

¹¹me wek ka twerere, ada abin ayaruno kikom jo oto.

¹²Likame ayamo kaman be pien mane en gikame ango atieko udo, arabo be ango atieko tuno i tol, do ango atie cane pi ude eko doko mera, pien Kirisito Yesu otieko mina adoko mere.

¹³Imiegu kede amiegu na, likame ango atero be etieko do tuno i cinga, do gi acel kame ango atimo di ber wia owil kede gi kokato cen di ako catakino pi gi me anyim,

¹⁴en ine be, ango acane ringo i tol pi udo giamia me pwoc, kame obedo kuo me malo kame Rubanga lwongo wa iye i Kirisito Yesu.

¹⁵Wek obedunu kede tam kame cal kamanono wan jo kame otiekunu cato i cuny wa; do ka itienu kede tam apat kede man i gimoroni, Rubanga bino mino ingeunu manono da.

¹⁶Kenekene miero wan omokunu kitek i kom gikame otiekunu udo.

¹⁷Imiegu kede amiegu na, lubunu ekite me kuo na. Cikunu wangu i kom jo kame lubo kuo kame wan onyuto ne wu.

¹⁸Pien jo atot, kame oudo ango atieko waco ne wu kop i kom gi, doko nan awaco ne wu kop i kom gi kede pige wanga, tie bedo bala jokwor me to ka Kirisito i kom musalaba.

¹⁹Gin ajikini gi en to, rubanga gi en yic, doko gin kitie kede yomcuny i gikame poore pi mino gi lewic. Gin tam gi tie i kom jame me piny.

²⁰Do tur wan tie i malo, kakame wan otie daro Ngalak pi wok kiye, en Rwot Yesu Kirisito.

²¹En ebino loko kom wa agoro gi di ko doko cal bala mere me deyo, di etio kede twer kame mie ekaruno keto jame dedede i loc mere.