Read kumam Jokolosai 2 Bible Online

Jokolosai 2 - kumam bible

Jokolosai 2

¹Ango amito be ingeunu kite kame ango atie cane kede kitek piru kede pi jo kame tie Laodikia, kede da pi jo dedede kalikame pwodi oneno wanga.

²Atimo kaman pi mino gi tekcuny, kede pi mino gi ribere karacel i amara di kiko bino udo abar dedede me niang kede ngec me gi komungere ka Rubanga, kame obedo Kirisito.

³Kokano abar dedede me rieko kede me ngec bute.

⁴Ango awaco man tetekeny kur ngatamoro ngalu kede kope me abe kame winyo mit.

⁵Pien akadi bed bala koma likame tie kede wu, do cunya tie kede wu, di alelo pi neno kite kame gi dedede tie kede i yore aber kibutu, kede kite kame yei wu ocungo kede di tek i Kirisito.

⁶Pi mano, bala kite kame igamunu kede Rwot Kirisito Yesu, aso bedunu i en.

⁷Miunu aliasin me kuo wu donyi i en di ikounu gero kuo wu i kome, di icungunu di itekunu i yei wu bala kame oudo kopwonyo wu kede, di ipongunu kede pwoc.

⁸Kur imiunu ngatamoro bwonu kede tam me rieko kede kop me abe, kame lubere kede itok me dano kede me tipere kame pugo piny, tam kede kope kalikame wok kibut Kirisito.

⁹Pien Rubanga i tie mere lung bedo i en i cal me kom,

¹⁰doko wuda itienu kede kuo kopong i en. En elo apugan kede akarunikin dedede.

¹¹Bobo da i en bin kokepo wu kede akepo kalikame cing dano en kotimo, di igonyunu tenge kuo me kom, manono en kepere ka Kirisito.

¹²Pien di bin kobatiso wu, koyiko wu karacel kede Kirisito, di oko yaruno wu karacel kede en pi bedo kede yei i kom twer ka Rubanga, en ngat kame bin oyaruno en ki kom jo oto.

¹³Wun jo kame bin itounu pi dub wu kede pien likame kokepo ringokomu, nan Rubanga omio wu kuo karacel kede Kirisito. Rubanga osasiro wa ki dub wa dedede,

¹⁴en eweko banya kame wan oudo otie kede karacel kede iswilia kame make, en ejwango man tenge di eko gure i kom musalaba.

¹⁵En eturo twer me tipere kame pugo kede me wegi akarunikin, di eko mino gi kidoko gikame jo neno, di etelo gi i esirit bala mabus kame komako, pi en nyuto be elo.

¹⁶Pi mano, kur imiunu ngatamoro ngol ne wu kop i kom cam amoto i kom giamata, akadi pi ceng adongo, arabo pi por duwe amoto Sabato.

¹⁷Magi dedede obedo bala cal kenekene me gikame oyaro bino; do Kirisito en cuny kop kikokome.

¹⁸Kur imiunu ngatamoro ngol kop loi wu, di ecerededo imwolere me ecuke kede woro imalaikan, di ecungo i gianyuta ka Rubanga. Akodi ngat nono wakere pi tam mere me dano adana abongo tien kop moro.

¹⁹En likame emoko i kom Kirisito, ngat kame obedo wi kome. Kirisito mio kom lung pitere kibute, kom lung ribere karacel pi kariamo me cogere mege, kede pi amorito mege, di eko dongo iepone kame Rubanga mie edongo kede.

²⁰Ka itiekunu to karacel kede Kirisito ikounu gonyere kikom tipere kame pugo piny, pinyo komio pwodi doko itienu bedo bala jo me piny kan? Pinyo komio iyeunu lubo iswilia bala be,

²¹“Kur imaki, kur ibili, kur imuli”?

²²Magi dedede mako jamini kame dubere kame kotio kede gi. Gin kibedo iswilia kede pwony ka dano adana.

²³Ateteni magi neeno bala gi me rieko pi mino wu dire woro imalaikan tetek i mit wu kenu, pi mino wu cuko mwolere kede tidilo komu kenu, do gin likame kikonyo pi gengo mit me kom.