Read kumam 1 Jotesalonika 1 Bible Online

1 Jotesalonika 1 - kumam bible

1 Jotesalonika 1

¹Baluwa kowok kibut Paulo, Sila kede Temeseo. But jokirisito kame tie Tesalonika, jo kame tie i Rubanga Papa kede i Rwot Yesu Kirisito. Kisa kede mulem ka Rubanga bed butu.

²Wan nakanaka opwoyo Rubanga piru dedede, di olwongo nying wu nakanaka kame otie ilega.

³Doko i nyim Rubanga ngat kame obedo Papa wa, wan oyutuno tice wu me yei, kede cane wu me amara, kede asipakin me gen wu i Rwot wa Yesu Kirisito.

⁴Imiegu kede amiegu na kame Rubanga maro, wan ongeo be en eyero wu,

⁵pien ejiri wan likame obino butu i kop kenekene, do ebino da kede twer, kede Tipo Kacil, doko di eko donyo i cunyu atwal. Wun ingeunu epone me kuo kame wan oudo otie kede i kare kame oudo otie kede wu, manoni oudo tie pi kelo ne wu bero.

⁶Wun ikounu doko jo kame lubo ekite wa kede me ka Rwot, pien igamunu kop mere kede kilel kame Tipo Kacil omio wu, bed bala inenunu can iye.

⁷Man omio ikounu doko anyut aber ne jo dedede kame tie Makedonia kede Akaya, jo kame oyei Kirisito.

⁸Pien likame itiekunu tuco kop ka Rwot Makedonia kede Akaya kenekene, do yei wu da i kom Rubanga otieko sarakin kabedere dedede. Pi mano, likame bobo tie gimoro kame wan opoore waco.

⁹Pien gin ikom gi kiwaco kop i kom epone kame igamunu wa kede, kede epone kame ilokerenu kede but Rubanga di ikounu weko woro cal jwogi, pi tic ne Rubanga kakuo kede me ateni,

¹⁰kede pi daro bino ka Wode ki malo, kame bin en eyaruno kikom jo oto, en Yesu, ngat kame lako wa ki lilo kame tie bino.