Read kumam 1 Jotesalonika 2 Bible Online

1 Jotesalonika 2 - kumam bible

1 Jotesalonika 2

¹Imiegu kede amiegu na, wuda kikomu ingeunu be, bino wan pi welao wu likame obedo gi me nono.

²Do bed bala oudo oneno can di kotimo ne wa tim me lewic i Pilipi, bala kame wuda ingeunu, wan oko bedo kede nwangcuny i Rubanga wa pi tuco ne wu ejiri mere, bed bala piem adwong oudo tie.

³Pien kwac wa likame owok ki angalo amoto ki tam areco arabo ki ngolo rieko.

⁴Do bala kame Rubanga opwoyo kede pi keto ejiri i cing wa, pi manono likame wan oyamo pi yomo cuny dano, do pi yomo cuny Rubanga, ngat kame tamo cuny wa.

⁵Pien bala kame wuda ingeunu kede, wan likame obino butu kede kope kame winyo mit, amoto kame umo eranga wa, Rubanga en mujura wa.

⁶Doko wan oudo likame omoo bero kibut jo, arabo kibutu amoto kibut jo ace,

⁷bed bala wan oudo opoore penyo jame mogo kibutu bala joor ka Kirisito. Do wan oudo obedo kede mwolo i diere wu bala dako kame tie gwoko idwe mege.

⁸Aso, kite kame wan oparo kede piru, omio oudo oikere pi nywako kede wu, likame ejiri ka Rubanga kenekene, do kiton kuo wa da, pien oudo idokunu lit ne wa adikinicel.

⁹Imiegu kede amiegu na, yutununu tic kame wan otimo, kede cane wa. Wan oudo otio iwor kede iceng me wek kur odii ngatamoro kikom wu kede peko i kare kame otie tuco ne wu kede ejiri ka Rubanga.

¹⁰Wun karacel kede Rubanga da ibedunu ijurak wan, i kom epone kame tim wa oudo obedo kede gikacil, kopoore, kede abongo raco moro i nyimun jo koyei Kirisito.

¹¹Pien wun ingeunu be wan oudo otero wu bala papa kede idwe mege.

¹²Wan oudo obako dog wa ne ngat acelacel kibutu, omio wu nwangcuny kede owaco ne wu lubo epone me kuo kame poore i nyim Rubanga, ngat kame lwongo wu i Ajakanut kede i deyo mere.

¹³Doko da wan opwoyo Rubanga nakanaka, pien bin di wan otuno kede kop ka Rubanga butu, wun iwinyenu di ikounu game, likame bala kop ka dano, do bala kop ka Rubanga, bala kame en etie kede ateteni. Doko da kop nono tie tic kibutun jo kame iyeunu Kirisito.

¹⁴Imiegu kede amiegu na, wun idokunu jo kame lubo epone me kuo me ekodet me jo ka Rubanga, jo koyei Kirisito Yesu i Yudea, pien wuda inenunu can kibut jo me pinyu pi gi acel nono, bala kame gida kineno kede can kibut Iyudayan,

¹⁵jo kame bin oneko Rwot Yesu karacel kede inabin, di kiko riamo wada. Gin kiwango cuny Rubanga, doko kidingere kede jo dedede,

¹⁶pien kitie gengo wa tuco ejiri ne jo kalikame Iyudayan, gikame romo mino gi kiudo alako. Man omio gi kimedo rom me dub gi ameda. Do nan lilo ka Rubanga otieko do tuno i kom gi.

¹⁷Imiegu kede amiegu na, kakame bin kopoko wa kede wu pi kare moro acecek i kom wa do weko i cuny wa, di wan oko doko bala idwe kic, wan oko tamo kitek kede mit adwong pi neno wu wang i wang.

¹⁸Wan oudo omito bino butu, do Sitani oko totolo wa. Ango Paulo atamakino tien atot.

¹⁹Pien nyo kara kame obedo gen wa, amoto kilel wa, arabo ocoro wa me angosibib kame obino wakere iye i nyim Rwot Yesu i ceng me dwogo mere? Mam wun igonogo?

²⁰Ateteni wun ibedunu deyo kede kilel wan.