Read kumam 1 Jotesalonika 4 Bible Online

1 Jotesalonika 4 - kumam bible

1 Jotesalonika 4

¹Me ajikini mere, imiegu kede amiegu na, wan okwao wu, doko obako dog wa butu i Rwot Yesu be, bala kame isiaonu kede kibut wan epone kame ipoorenu bedo kede di iyomunu cuny Rubanga, bala kame nan itienu timo, meedenu ameda timo kamanono.

²Pien wun ingeunu cik kame wan omio wu i akarunikin ka Rwot Yesu.

³Pien gikame Rubanga mito, gikame obedo lonyere wu gin ige be: wekunu caro,

⁴ngat acelacel kikom wu ngei gwoko kome kene iepone kacil kede i yore me wor,

⁵likame kede mit arac me kom bala kame atekerin kalikame ngeo Rubanga timo.

⁶I kop noni, likame poore dano moro ngangalo arabo timo ne ngakirisito ngawote raco, pien Rwot culo kwor i gigi dedede, bala kame wan oudo otieko waco ne wu kede di okwenyaro wu kitek.

⁷Likame Rubanga olwongo wa pi bedo kede tim me caro, do pi bedo jokacil.

⁸Pi mano, ngat kame dagi kop noni udo likame edagi akarunikin me dano, do udo edagi Rubanga ngat kame mio Tipo Kacil mere butu.

⁹Aso, i kom kop kame mako maro imiegu kede amiegu wu, kony me wandiko ne wu kop iye likame tie, pien wun kikomu Rubanga otieko pwonyo wu pi marere kenu kenu.

¹⁰Pien i ateni, wun imarunu imiegu kede amiegu dedede kame tie Makedonia lung. Do wan obako dog wa butu, jo wa kame omaro, pi meede ameda timo kamanono.

¹¹Tamakinunu bedo mot, ngat acelacel par pi tic kame make, di itimunu tic kede cingu bala kame wan oudo ociko wu kede.

¹²Man bino mino iudunu wor kibut jo kalikame tie i ekodet me jokirisito, di ikounu bino cungo kenu abongo mono kony kibut ngatamoro.

¹³Imiegu kede amiegu na, likame omito be ibedunu abongo ngec i kom jo kame otieko nino, tetekeny kur ibedunu kede cwercuny bala jo ace kame li kede gen.

¹⁴Pien bala kame wan oyei kede be Yesu oto di doko eko yaruno, kamanono da pi Yesu, Rubanga bino kelo karacel kede en jo kame onino.

¹⁵Pi mano, wan owaco ne wu kop kame Rwot owaco be, wan jo kame nan okuounu, ka odongunu kuo paka tuno i dwogo ka Rwot, likame obinunu telo yongayo ne jo kame nan otieko nino.

¹⁶Pien Rwot kikome oyaro bino piny yai ki malo kede redo me akarunikin, kede lwongo me malaika adwong, kede koko me agwara ka Rubanga. Di do jo oto i Kirisito en kame ko bino cako yaruno;

¹⁷di oko bino gwaro wanunu jo kame odongunu di okuounu karacel kede gin i idoun pi riamo kede Rwot i dier yamo; di okounu bino bedo kede Rwot nakanaka.

¹⁸Pi mano, diunu cuny ngat acelacel kede kope nogi.