Read kumam Yosua 13 Bible Online

Yosua 13 - kumam bible

Yosua 13

¹Nan Yosua do oudo otieko ti twatwal. Rwot oko waco ne be, “In nan itieko ti, kare ni okato, do di pwodi lobo kodong kame kopoore mano tie dwong.

²Lobo kame pwodi odong ine: lobo lung me jo Pilistia kede Gesur,

³ribo kiton lobo me jo Abim atie i bad tetu piny. (Lobo kame cakere ki osamai me Sikor, kame tie i ikor me Misiri, di eko ot ape ape i bad tetu malo paka tuno i ikor me Ekuron, kame oudo kotero be obedo lobo me jo Kanan; abakai me jo Pilistia oudo bedo Gasa, Asidod, Asikelon, Gat kede Ekuron.)

⁴I bad tetu piny, tie iye pwodi lobo lung me jo Kanan, kede Meara (kame obedo lobo me jo Sidon), tuno Apek, kame tie i ikor kede jo Amor;

⁵lobo me bomba me Gebal; lobo me Lebanon lung dok tetu kide, cako ki Balagad kame tie i bad tetu piny me moru me Kerimon tuno Kamat, en yongayo atie i dierediere me mori.

⁶Manoni riribo lobo lung me jo Sidon, kame bedo i lobo me imukuran, dierediere me mori me Lebanon kede Misirepot Maim. Ango kikoma abino riamo jo nogi di jo me Isirael nyiko anyim mot mot. Kenekene poore ipopoko lobo ne jo me Isirael bala kame ango atieko ciko ni.

⁷Aso, nan in do popoko lobo noni ne jo me ikekon kanyangon me Isirael kede dul jo me ekeko ka Manase pi bedo mergi.”

⁸Jo me ekeko ka Ruben kede me ka Gad, kede dul me jo me ekeko ka Manase oudo otieko udo lobo kame Musa, ngatic ka Rwot oudo omio gi; lobo nono oudo tie i bad tetu kide me ecilet me Yorodan.

⁹Lobo gi nono oudo cakere ki Aroer (i dog Aditot me Arunon) kede bomba kame oudo tie i cuny aditot nono di eko ribo lobo okiar di opetere cako ki Medeba tuno Dibon.

¹⁰Oudo eoto paka tuno i ikor kame poko Amon, di eko ribo kiton bomban dedede kame Abaka Sikon me jo Amor bin opugo, bin en epugo gi di ebedo Kesibon.

¹¹Oudo eribo Gilead, adulion me Gesur kede Maka, moru me Kerimon dedede kede Basan dedede tuno Saleka.

¹²Oudo eribo lobo kame Abaka Og opugo, en dano me ajikini me jo Repaim, kame bin opugo di ebedo Asitarot kede Ederei. Musa oudo obwono jo nogi di eko riamo gi tenge,

¹³kwanyo kenekene jo me Gesur kede Maka, gin pwodi kitie bedo i diere me jo me Isirael.

¹⁴Musa oudo likame omio jo me ekeko ka Lebi lobo moro pi doko mergi. Bala kame oudo Rwot otieko waco ne Musa, gikobedo mergi en iner me giayala kame kowango i wi alutari ka Rwot Rubanga me Isirael.

¹⁵Musa oudo omio dul moro me lobo but jo me diakal acelacel me jo me Ekeko ka Ruben pi bedo mergi.

¹⁶Lobo gin oudo cakere ki Aroer (kame gongere kede Aditot me Arunon) kede bomba kame oudo tie i cuny aditot, di eko ribo lobo kokiar di opetere dedede rimaro Medeba.

¹⁷Oudo eribo kiton Kesibon kede bomban dedede kame tie i lobo okiar di opetere, bomban nogo gin en: Dibon, Bamot, Baal, Bet Balameon,

¹⁸Yakas, Kedemot, Mepat,

¹⁹Kiriataim, Sibima, Seret Sakar kame tie i wi emukura me aditot,

²⁰Betepeor, bad moru me Pisiga, kede Bet Jesimot.

²¹Oudo eribo bomban dedede me lobo kokiar di opetere kede lobo dedede kame Abaka Sikon me jo Amor oudo pugo, kame oudo pugo di ebedo Kesibon. Musa obwone, ribo kiton jopug me Midian, gin en: Ebi, Rekem, Suur, Kur, kede Reba. Gin dedede oudo kibedo jo kame pugo ne Sikon lobo nono.

²²Kikom jo kame jo me Isirael oudo oneko oudo obedo Balaam ngat kame tuco ne jo kope komungere, en oudo ebedo wot ka Beor.

²³Yorodan en oudo obedo ikor kame poko jo me ekeko ka Ruben i bad tetu tim. Magonogi en oudo obedo bomban kede calere kame komio jo me ekeko ka Ruben, di lubere kede jo me diakal acelacel.

²⁴Musa oudo omio da dul moro me lobo but jo me ekeko ka Gad pi bedo mergi, di lubere kede diakale gi.

²⁵Lobo gi oudo ribo Yaser kede bomban dedede me Gilead, dul me lobo me Amon kato paka Aroer, kame tie i bad tetu kide me Raba.

²⁶Lobo gi oudo riere yai ki Kesibon tuno Ramat Misipe kede Betonim; doko da oudo eriere yai ki Makanaim tuno i ikor apoko Lodebar.

²⁷I aditot me Yorodan oudo eribo Bet Karam, Betenimura, Sukot, kede Sapon, kede kabedo ace apat kame Abaka Sikon me Kesibon oudo pugo. Ikor gi i bad tetu tim oudo obedo ecilet me Yorodan eko riere dok i bad tetu malo tuno i nam me Galilaya.

²⁸Magonogi en oudo obedo bomban kede calere kame oko mino jo me ekeko ka Gad pi bedo mergi di lubere kede diakale gi.

²⁹Musa oudo omio adul moro me lobo but dul me jo me ekeko ka Manase pi bedo mergi di lubere kede diakale gi.

³⁰Lobo gin oudo riere cako ki Makanaim di eko ribo Basan dedede, kame tie iye lobo lung kame Abaka Og me Basan pugo, karacel kede calere ot kanyape me Yair i lobo me Basan.

³¹Oudo eribo kiton dul me Gilead, kiton Asitarot kede Ederei, gin bomban adongo i lobo kame Og oudo pugo, gin oudo kitie Basan. Manoni dedede oudo komio dul me diakale me jo kobedo ikwae ka Makir wot ka Manase.

³²Manoni en epone kame bin Musa opopoko kede lobo atie i bad tetu kide me Jeriko kede Yorodan i kare kame oudo etie kede i ebar me Moab.

³³Do Musa likame oko mino lobo moro but jo me ekeko ka Lebi. En ewaco negi be gikame obedo mergi en iner me giamia but Rwot Rubanga me Isirael.