Read kumam Yosua 15 Bible Online

Yosua 15 - kumam bible

Yosua 15

¹Jo me ekeko ka Yuda bin komio lobo kame tuno i bad tetu piny i ikor kede Edom, kame tie i ajikini me bad tetu piny me wi tim me Sin.

²Ikor gi me bad tetu piny noni oudo cakere ki ajikini me bad tetu piny me Nam Oto;

³eko dok i bad tetu piny i wi emukura me Akurabim, di eko beo i wi tim me Sin; eko ot beo i bad tetu piny me bomba me Kades Barenea. Di do eko lanyo Kesiron eko tuno Adar, di eko lokere dok tetu Karaka,

⁴eko ot tuno Asamon, di eko ririo osamai me ikor me Misiri, di eko ot jik i nam me Mediterania. Manono en oudo ikor me Yuda i bad tetu piny.

⁵I bad tetu kide, Nam Oto en oudo obedo ikor, di eko ot paka tuno kakame ecilet me Yorodan donyo kede i Nam Oto. I bad tetu malo, ikor gi oudo cakere ki kanono

⁶di eko beo Bet Kagela, eko ririo bad tetu malo me Bet Araba; ikor nono ko ot tuno i Kidi ka Bokan, en wot ka Ruben,

⁷di eko yai ki aditot me Akor eko ot tuno Debir, di eko ot tetu malo eko manaro ot tetu Giligal, kabedo kopimere kede kakame yito Adumim, en kabedo kame tie i bad tetu piny me aditot. Ikor nono ko beo i atan me Enesemes di eko ot jik Enerogel.

⁸Di do ikor nono ko ririo aditot ka wot ka Kinom i bad tetu piny me bad emukura kame bomba me jo Yebu oudo tie iye (manono en Yerusalem); di ikor nono oudo ko ot tuno malo i wi moru kame neeno kede aditot me Kinom, i bad tetu tim, eko tuno i ajikini me aditot me Repaim i bad tetu malo.

⁹Ki wi moru kunono, ikor nono oudo yai di eko ot tuno i Atan me Neputoa, di eko ot tuno i bomban me nget moru me Epuron. Ki kuno di eko manaro ot Baala (manono en Kiriat Yearim).

¹⁰Di do ikor nono ko manaro i bad tetu tim me Baala, di eko ot tuno i moru me Edom, eko beo i bad moru me Yearim (manono en Kesalon) i bad tetu malo mere, di eko lor piny tuno Bet Semes, eko ririo Timina.

¹¹Ikor nono oudo ko ot tuno i bad emukura kame tie i bad tetu malo me Ekuron, di eko manaro ot Sikeron, eko ot ape ape tuno i moru me Baala, di eko ot tuno Jabunel. Di do ikor nono oudo ko ot jik i nam me Mediterania.

¹²I bad tetu tim, dog nam me Mediterania en kame oudo obedo ikor gi. Manoni en ikor me diakale me jo me ekeko ka Yuda i bad tetu dedede.

¹³Kaleb wot ka Jepune bin komio iner me lobo me jo me ekeko ka Yuda, bala kame oudo Rwot ociko ne Yosua. Komie Kiriat Araba[4], manono en bomba me Keburon (Araba oudo en papa me Anak).

¹⁴Kaleb bin oko riamo tenge ki bomba nono diakale adek me ikwae ka Anak: Sesai, Akiman kede Talamai.

¹⁵Di eko yai ki kunono di eko ot yi kede jo kame bin tie bedo Debir. (Bomba noni oudo sek ber kolwonge be Kiriat Seper.)

¹⁶Kaleb oko waco be, “Ngat kame bino suro Kiriat Seper di eko mane, ango abino mine enyomo nyara Akisa.”

¹⁷Otiniel wot ka Kenas, omin me Kaleb en oko mano bomba nono, di Kaleb oko mine enyomo Akisa nyare.

¹⁸Ceng kame Akisa oko ot kede but Otiniel, en eko dino cware be ekwai papa mere Kaleb poto. Di do Akesa oudo tie wok ki ngei punda mere, Kaleb oko penye be, “Nyo kame cunyi tie mito?”

¹⁹En eko dwoko ne be, “Ango amito imia giamia; bala kame in itieko keta kede i lobo kotuo, mia ataneko me pii da.” Aso, Kaleb oko mine ataneko me malo kede me piny.

²⁰Manoni en lobo kame jo me ekeko ka Yuda oko udo me doko mergi di lubere kede diakale gi.

²¹Bomban me ekeko me jo me Yuda i bad tetu piny atwal, tetu adok i ikor me Edom bin gin en, Kabusel, Eder, Yagur,

²²Kina, Dimona, Adada,

²³Kedes, Kasor, Itinan,

²⁴Sip, Telem, Bealot,

²⁵Kasor Kadata, Keriot Kesiron (manono en Kasor),

²⁶Amam, Sema, Molada,

²⁷Kasar Gada, Kesimon, Betepelet,

²⁸Kasar Sual, Beereseba, Bisiotia,

²⁹Baala, Iim, Esem,

³⁰Elitolad, Kesil, Koroma,

³¹Sikilag, Mademana, Sanasana,

³²Lebaot, Silikim, Ain, kede Rimon. Gin dedede oudo kitie bomban ot are kiwie kanyangon kede calere gi.

³³Bomban kame bin tie i dud mori gin en, Esitaol, Sora, Asina,

³⁴Sanoa, Enganim, Tapua, Enam,

³⁵Yaramut, Adulam, Soko, Aseka,

³⁶Saraim, Aditaim, Gedera, kede Gederotaim. Magi oudo tie bomban tomon kiwie ongwon kede calere gi.

³⁷Bomban ace da oudo gin en, Senan, Kadasa, Magidalagad,

³⁸Dilean, Misipa, Yokitel,

³⁹Lakis, Bosikat, Egilon,

⁴⁰Kabon, Lakamam, Kitilis,

⁴¹Gederot, Bet Dagon, Naama, kede Makeda: gin bomban tomon kiwie kanyape kede calere gi.

⁴²Bomban ace da oudo gin en, Libina, Eter, Asan,

⁴³Iputa, Asina, Nesib,

⁴⁴Keila, Akisib, kede Maresa: gin bomban kanyangon kede calere gi.

⁴⁵Bomban ace kame bin tie gin en Ekuron kede calere mege kede bomban mege atitino,

⁴⁶kede bomban dedede kiton atitino kame bin iyapiyapi kede Asidod, cako ki Ekuron tuno i nam me Mediterania.

⁴⁷Manono oudo ribo kiton bomban me Asidod kede Gasa, kede calere gi kede bomban gi atitino, ape tuno i ecilet kame tie i ikor kede Misiri, kede tuno i lak nam me Mediterania.

⁴⁸Bomban kame bin tie i piny kobedo mori mori gin en Samir, Yatir, Soko,

⁴⁹Dana, Kiriat Seper (arabo Debir),

⁵⁰Anab, Esitemoa, Anim,

⁵¹Gosen, Kolon, kede Gilo: gin bomban tomon kiwie acel kede calere gi.

⁵²Bomban ace oudo gin en Arab, Duma, Esan,

⁵³Yanim, Bet Tapua, Apeka,

⁵⁴Kumita, Keburon, kede Sior: gin bomban kanyangon kede calere gi.

⁵⁵Bomban ace oudo gin en Maon, Kamel, Sip, Yuta,

⁵⁶Jeserel, Yokodeam, Sanoa,

⁵⁷Kain, Gibea, kede Timina: gin bomban tomon kede calere gi.

⁵⁸Bomban ace oudo gin en Kalul, Betesur, Gedor,

⁵⁹Marat, Betanot, kede Elitekon: gin bomban kanyape kede calere gi.

⁶⁰Bomban me Kiriat Baal (manono en Kiriat Yearim) kede Raba da oudo tie iye: gin bomban are kede calere gi.

⁶¹Bomban kame bin tie i wi tim gin en, Bet Araba, Midin, Sekaka,

⁶²Nibisan, bomba me Munyo, kede Engedi: bomban kanyape kede calere gi.

⁶³Do jo me Yuda bin likame oko karuno riamo tenge jo Yebu, jo kame bin bedo Yerusalem; manono oko mino jo Yebu odong bedo Yerusalem kede jo me Yuda.