Read kumam Yosua 16 Bible Online

Yosua 16 - kumam bible

Yosua 16

¹Ikor me lobo kame bin kopoko ne ikwae ka Yosepu oudo cakere ki bad tetu kide me ataneko me Jeriko, i nget ecilet me Yorodan, di eko ot tetu malo ebeo i wi tim eko donyo i piny kobedo mori mori ape tuno Betel.

²Ikor nono oudo yai ki Betel di eko ot Lus, eko beo eoto Atarot, adul kame jo me Araki oudo bedo iye.

³Di do eko lor piny i bad tetu tim tuno i adul kame jo Yapulet bedo iye, eko ot ape tuno i adul kame tie pipiny me Bet Koron. Eko yai ki kano di eko ot Geser eko ot jik i nam me Mediterania.

⁴Ikwae ka Yosepu, en gin jo me ekeko ka Epuraimu kede me ka Manase, bin oko gamo lobo noni oko doko mergi.

⁵Lobo kame bin kopoko ne jo me ekeko ka Epuraimu di lubere kede diakale gi oudo tie kaman: ikor me lobo kame bin kopoko negi oudo yai ki Atarot Ada di eko ot i bad tetu kide eko tuno Bet Koron Kimukurur,

⁶di eko yai ki kunono eko ot tuno i nam me Mediterania. Mikimetat oudo tie i bad tetu malo gin. Ikor nono bin manaro ki kunono di eko ot tetu Tanat Silo, eko kato akata i bad tetu kide tuno Yanoa.

⁷Di do eko lor ki Yanoa tuno Atarot kede Nara, di eko gongere kede Jeriko, eko ot jik i ecilet me Yorodan.

⁸Cako ki Tapua, ikor bin beo i bad tetu tim di eko ot tuno osamai me Kana, di eko ot jik i nam me Mediterania. Manoni en kame bin obedo lobo kame komio jo me ekeko ka Epuraimu di lubere kede diakale gi,

⁹ribo kiton bomban kede calere mogo kame oudo tie i lobo me jo me ekeko ka Manase, do di komio gi but jo me ekeko ka Epuraimu.

¹⁰Do jo me ekeko ka Epuraimu bin likame oko riamo tenge jo me Kanan kame bin bedo Geser. Manono oko mino jo Kanan oko dong bedo i diere me jo Epuraimu tuno tin, do oko bedo dino gi timo tic tetek bala ipasoi.