Read kumam Yosua 17 Bible Online

Yosua 17 - kumam bible

Yosua 17

¹Bin oko mino dul moro me lobo but jo me ekeko ka Manase, piento en oudo obedo kao ka Yosepu. Makir, papa me Gilead, en kame oudo obedo kao ka Manase, doko en oudo ngat atek i yi twatwal, pi mano, oko bin poko ne en Gilead kede Basan, adulion kame oudo tie i bad tetu kide me Yorodan.

²Yosua oko popoko lobo kame oudo tie i bad tetu tim me ecilet me Yorodan but jo ace me ekeko ka Manase, di lubere kede diakale gi kaman: Abieser, Kelek, Asiriel, Sekem, Keper, kede Semida. Jo nogi en oudo obedo ikwae ka Manase wot ka Yosepu acuo mege; gin oudo kibedo jotel me diakale gin.

³Selopekad, wot ka Keper, wot ka Gilead, wot ka Makir, wot ka Manase, oudo li kede atin awobi moro, do en oudo etie kede idwe anyira kenekene. Nying anyira nogo oudo ige: Makala, Nua, Kagela, Milika, kede Tirisa.

⁴Gin bin kiko ot but Eleasar ngasaseredoti kede but Yosua wot ka Nun kede but jotel di kiko waco be, “Rwot bin ociko Musa pi mino wada lobo me bedo merwa bala joawade wa acuo.” Aso, bala kame Rwot oudo ociko, bin oko mino gida lobo karacel kede joawade gi acuo.

⁵Kite nono en kame bin Manase oudo kede iner tomon me lobo, medo i wi lobo me Gilead kede Basan, kame tie loka tetu kide me Yorodan,

⁶piento ikwae ka Manase amon da bin komio lobo bala acuo mege. Lobo me Gilead bin komio but ikwae ace apat ka Manase dedede.

⁷Lobo ka Manase oudo cakere ki Aser tuno Mikimetat, bomba kame bin tie i bad tetu kide me Sekem. Ikor mere di ko ot i bad tetu piny tuno but jo me Enetapua.

⁸Lobo me Tapua oudo obedo me ka Manase, do bomba me Tapua, kame oudo tie i ikor me Manase oudo obedo me jo ka Epuraimu.

⁹Ikor me jo ka Manase bin di do ko lor piny tuno i osamai me Kana. Bomban kame bin tie i bad tetu piny me esamai nono oudo obedo me ka Epuraimu, bed bala gin oudo kitie i adul me jo ka Manase. Ikor ka Manase bin ko ot eririo esamai ki bad tetu malo mere di eko ot jik i nam me Mediterania.

¹⁰Lobo me jo Epuraimu bin tie i bad tetu piny, do me jo ka Manase oudo tie i bad tetu malo, di nam me Mediterania en kame oudo obedo ikor gi i bad tetu tim. Jo ka Aser oudo tie i bad tetu malo me jo ka Manase, do jo ka Isakar oudo tie i bad gi tetu kide.

¹¹I adul kame jo ka Isakar kede jo ka Aser oudo bedo iye, bomban kede calere me nget gi kame oudo obedo me jo ka Manase gin en Bet San, Ibileam, Dor (kame oudo tie i nget nam), Enedor, Tanak, kede Megido.

¹²Do jo ka Manase likame bin oko twero riamo tenge jo me Kanan kame oudo tie bedo i bomban nogo; pi manono, jo me Kanan oko meede kede bedo i bomban nogo.

¹³I kare kame bin jo me Isirael odoko tek kede, gin likame kiko riamo jo me Kanan tenge, do kiko donyo dino gi timo negi tic tetek.

¹⁴Ceng moro acel jo me ekeko ka Yosepu oko penyo Yosua be, “Pinyo bo komio in iko mino wan adul acel kenekene me lobo pi bedo merwa do di jo wan tot? Rwot obedo mino wan winyo cako sek omio wan otot twatwal.”

¹⁵Yosua oko waco negi be, “Ka piny kobedo mori mori me Epuraimu diding likame eromo wu pien itotunu, ot itongunu abum di ikounu nyano lobo piru i lobo me jo Perisi kede me jo Repaim.”

¹⁶Jo ka Yosepu oko dwoko ne be, “Piny kobedo mori mori noni likame romo wa; doko da jo me Kanan kame bedo i ebar tie kede cabalan kame kotimo kede nyonyo ayon, gin jo kame bedo i bomba me Bet San kede calere mege, karacel kede jo kame bedo i aditot me Jeserel.”

¹⁷Yosua oko waco ne jo me ikekon ka Epuraimu kede me ka Manase me tetu tim be, “Wun ateteni itotunu, doko itekunu twatwal. Wun likame ibinunu bedo kede iner acel kenekene.

¹⁸Piny kobedo mori mori nono bino bedo meru. Bed bala en etie abum, wun ibinunu tonge di eko doko meru cako ki tetucel tuno tetucel. Wun ibinunu riamo jo me Kanan tenge, bed bala gin kitie kede cabalan me nyonyo ayon doko di gin jo atek.”