Read kumam Yosua 18 Bible Online

Yosua 18 - kumam bible

Yosua 18

¹Di do jo dedede me Isirael oko cokere Silo, di gin kiko sipo Eema me riamo kede Rwot kunono, pien oudo kitieko bwono jo me lobo nono.

²I kare nono oudo pwodi ikekon kanyaare me Isirael odong likame kopoko negi iner gi me lobo.

³Manono oko mino Yosua owaco ne jo me Isirael be, “Wun ibinunu bedo kede ajajalun me ot gamo lobo kame Rwot, Rubanga me joakwari wu otieko mino wu tuno awene?

⁴Mianu cuo adek ki buli ekeko acelacel, di ango ako bino cwano gi ot mamano lobo nono di gin kiwandiko cal mere pi nyuto adul kame gin kimito be bed mergi. Di gin kiko bino dwogo buta.

⁵Kobino popoko lobo nono i adulion kanyaare; jo me ekeko ka Yuda bino meede bedo i adul gi kame tie i bad tetu piny, kede jo me ot ka Yosepu da bino dong bedo i adul gi kame tie i bad tetu malo.

⁶Gin kibino wandiko cal me adulion kanyaare nogo di kiko kelo buta, di ango ako bino uco ne wu alulu i nyim Rwot Rubanga wa pi popoko en.

⁷Jolebi likame bino udo iner moro me lobo i diere wu, pien iner gin en timo tic bala josaseredoti ka Rwot. Doko da jo me ikekon ka Gad, Ruben, kede dul me jo me ekeko ka Manase otieko udo lobere gi loka i bad tetu kide me ecilet me Yorodan, kame Musa ngatic ka Rwot bin omio gi.”

⁸Jo kame bin koyero oko yai ooto, di Yosua oko ciko gi pi wandiko kite kame lobo nono cal kede. En ewaco negi be, “Mamanunu lobo nono lung di ikounu wandiko kite kame ecal kede, ikounu dwogo buta. Ango abino uco ne wu alulu i nyim Rwot kan i Silo.”

⁹Aso, cuo nogo oko ot di gin kiko mamano lobo nono di kiko wandiko kite kame ecal kede i itabu. Gin kiwandiko kop i kom bomba acelacel me adulion kanyaare nogo; di do gin kiko dok but Yosua i kimere kame bin tie Silo.

¹⁰Yosua oko uco negi alulu i nyim Rwot i Silo, di eko popoko lobo ne jo me ikekon me Isirael kame oudo odong; ekeko acelacel oudo adul acel.

¹¹Alulu me diakale me ekeko ka Benjamin en kame oko cako kwanyo. Lobo kame alulu omako negi oudo tie i dierediere me jo me ekeko ka Yuda kede jo me ekeko ka Yosepu.

¹²I bad tetu malo, ikor gi oudo cakere ki ecilet me Yorodan di eko ot tuno i aserengete me Jeriko i bad tetu malo, di eko yito malo eko beo i piny kobedo mori mori eko ot i bad tetu tim, di eko jik i wi tim me Bet Aben.

¹³Ikor nono ko yai ki kuno di eko ot i bad tetu piny eko tuno i aserengete me Lus (manono en Betel), di eko lor piny tuno Atarot Ada, i moru kame tie i bad tetu piny me Bet Koron Kiditokina.

¹⁴Di do ikor nono bobo ko lokere i bad ace. En elokere ki bad tetu tim di eko dok i bad tetu piny me moru nono di eko ot jik Kiriat Baal (manono en Kiriat Yearim), bomba me jo me ekeko ka Yuda. Manono en oudo ikor me jo me ekeko ka Benjamin i bad tetu tim.

¹⁵Ikor gi i bad tetu piny oudo cakere ki ajikini me bomba me Kiriat Yearim di eko ot tuno i atan me Neputoa.

¹⁶Di do eko lor ki kuno tuno i dud moru kame neeno kede Aditot me Kinom, i ajikini me aditot me Repaim tetu malo mere. Di eko lor piny beo i aditot me Kinom, i bad tetu piny me bad emukura me jo Yebu, eko lor piny tuno Enerogel.

¹⁷Di do eko gonoro tetu bad malo eko tuno Enesemes, ki kuno di eko ot Gelilot, bomba kame pimere kede kakame yito Adumim. Ikor nono oudo ko lor piny tuno i Kidi ka Bokan wot ka Ruben.

¹⁸Ki kuno ikor nono oudo ko ot i bad tetu malo me emukura kame neeno kede Aditot me Yorodan, di eko lor piny tuno i aditot nono.

¹⁹Di eko ot tuno i bad tetu malo me bad moru me Bet Kagela, eko ot jik kakame ecilet me Yorodan donyo kiye i Nam Oto, manoni en oudo obedo ikor me jo me ekeko ka Benjamin i bad tetu piny.

²⁰Ecilet me Yorodan en kame bin obedo ikor gin i bad tetu kide. Magonogo en bin ikor me lobo kame jo me ekeko ka Benjamin oko udo pi doko mergi.

²¹Bomban me jo me ekeko ka Benjamin di lubere kede diakale gi bin gin ige: Jeriko, Bet Kagela, Emek Kesis,

²²Bet Araba, Semaraim, Betel,

²³Abim, Para, Opura,

²⁴Keparamoni, Opuni, kede Geba: gin bomban tomon kiwie are kede calere gi.

²⁵Bomban ace bin gin en Gibeon, Rama, Berot,

²⁶Misipe, Kepira, Mosa,

²⁷Rekem, Iripel, Tarala,

²⁸Sela, Kaelep, Yebu (arabo Yerusalem), Gibea kede Kiriat Yearim: gin bomban tomon kiwie ongwon kede calere gi. Manono en lobo kame jo me diakale me ekeko ka Benjamin oko udo pi doko mergi.