Read kumam Yosua 19 Bible Online

Yosua 19 - kumam bible

Yosua 19

¹Alulu me are oko ot but diakale me jo me ekeko ka Simeon. Lobo kame alulu bin omako pirgi oudo tie i lobo me jo me ekeko ka Yuda.

²Bomban kame gin bin kiko udo pi bedo mergi gin ige: Beereseba, Seba, Molada,

³Kasar Sual, Bala, Esem,

⁴Elitolad, Betul, Koroma,

⁵Sikilag, Bet Marakabot, Kasar Susa,

⁶Bet Lebaot, kede Saruken: gin bomban tomon kiwie adek kede calere gi.

⁷Bomban gi ace da bin gin en Ain, Rimon, Eter, kede Asan: gin bomban ongwon kede calere gi.

⁸Adul kame gin kiudo nono bin ribo kiton calere me bomban nogi paka tuno Balat Ber (arabo Rama) i bad tetu piny. Manoni en lobo kame bin jo me diakale me ekeko ka Simeon oko udo.

⁹Lobo nono kame jo me ekeko ka Simeon oko udo bin obedo adul me lobo me jo me ekeko ka Yuda. Do pien lobo nono bin lac kalamo kame mitere negi, manono oko mino kopoko ne jo me ekeko ka Simeon lobo ki mergi nono.

¹⁰Alulu me adek oko mako diakale me jo me ekeko ka Sebulun. Lobo gi oudo tuno Sarid.

¹¹Ki kuno ikor nono bin ko ot Mareal i bad tetu tim di eko tuno Dabeset kede i esamai kame tie i bad tetu kide me Jokoneam.

¹²I bad tetu ocelu me Sarid, ikor me lobo gi nono bin oto i bad tetu kide di eko timo i ikor kede adul me Kisilot Tabor; ki kuno di eko ot tuno Daberat, di do eko kato tuno Yapia.

¹³Ki Yapia di eko meede ot i bad tetu kide eko tuno Gat Keper kede Etakasin, di eko manaro dok tetu Nea di eko kato paka Rimon.

¹⁴I bad tetu malo, ikor nono oudo manaro eko ot Kanaton, di eko jik i Aditot me Ipitakel.

¹⁵Lobo gi nono bin ribo kiton Katat, Nakalal, Simiron, Idala, kede Betelem: gin bomban tomon kiwie are kede calere gi.

¹⁶Manono en lobo kame bin diakale me ekeko ka Sebulun oko udo pi bedo mergi.

¹⁷Alulu me ongwon oko mako diakale me jo me ekeko ka Isakar.

¹⁸Lobo gi oudo ribo bomban me Jeserel, Kesulot, Sunem,

¹⁹Kaparaim, Sioni, Anakarat,

²⁰Rabit, Kision, Ebes,

²¹Remet, Enganim, Enkada kede Bet Pases.

²²Ikor nono bin tuno da Tabor, Sakasuma, kede Bet Semes, di eko ot jik i ecilet me Yorodan. Lobo nono bin tie kede bomban tomon kiwie kanyape kede calere gi.

²³Bomban nogi kede calere gi bin tie i lobo kame diakale me jo me ekeko ka Isakar oko udo me bedo mergi.

²⁴Alulu me kany oko mako diakale me jo me ekeko ka Aser.

²⁵Ikor me lobo gi oudo ribo bomban me, Kelekat, Kali, Beten, Akisap,

²⁶Alam Melek, Amad, kede Misal. I bad tetu tim, ikor nono bin tuno Kamel kede Sikor Libinat,

²⁷di eko manaro i bad tetu kide eko ot Bet Dagon, di eko tuno Sebulun kede i Aditot me Ipitakel di eoto Bet Emek kede Neyel i bad tetu malo. Ikor nono bin meede ot i bad tetu malo di eko tuno Kabul,

²⁸Eburon, Rekob, Kamon, kede Kana, ape paka Sidon Adwong.

²⁹Di do ikor nono bin ko manaro ot Rama, di eko tuno Taya, bomba kame bin kocelo kitek; ki kuno di eko manaro ot Kosa, di eko ot jik i nam me Mediterania. Lobo nono bin ribo bomban me Makalab, Akisib,

³⁰Uma, Apek kede Rekob: gin bomban ot are kiwie are kede calere gi.

³¹Bomban nogi kede calere nogi bin tie i lobo kame diakale me jo me ekeko ka Aser oko udo pi bedo mergi.

³²Alulu me kanyape oko mako diakale me jo me ekeko ka Naputali.

³³Ikor me lobo gi i bad tetu malo oudo yai ki Kelep, ki yat oak me Sananim, di eko beo Adaminekeb kede Jabunel, ape tuno Lakum, di eko ot jik i ecilet me Yorodan.

³⁴Ki kuno ikor oudo ko manaro i bad tetu tim eko ot beo Asinot Tabor, di eko yai ki kuno ot Kukok, eko ot tuno Sebulun i bad tetu piny, kede Aser i bad tetu tim, kede Yuda i ecilet me Yorodan i bad tetu kide.

³⁵Bomban kame oudo kocelo gin en Sidim, Ser, Kamat, Rakat, Kineret,

³⁶Adama, Rama, Kasor,

³⁷Kedes, Ederei, Enakasor,

³⁸Yiron, Migidalel, Korem, Bet Anat, kede Bet Semes: gin bomban tomon kiwie kanyangon kede calere gi.

³⁹Manoni en lobo kede bomban mege kede calere gi, kame jo me diakale me ekeko ka Naputali bin oudo pi bedo mergi.

⁴⁰Alulu me kanyaare oko mako diakale me ekeko ka Dan.

⁴¹Adul kame komio gi oudo ribo Sora, Esitaol, Irisemes,

⁴²Salabim, Aijalon, Itila,

⁴³Elon, Timina, Ekuron,

⁴⁴Eliteke, Gibeton, Balat,

⁴⁵Yekud, Beneberak, Gatirimon,

⁴⁶Mejarikon, kede Rakon, kiton adul kopimere kede Jopa.

⁴⁷I kare kame jo ka Dan bin oko kei kede lobo gi, gin kiko ot suro bomba me Lais. Gin kimae kiko neneko jo mege, di kiko donyo bedo iye. Gin bin kiko loko nyinge be Dan, en nying kwaru gi.

⁴⁸Manoni en lobo kede bomban mege kede calere gi, kame bin jo me diakale me ekeko ka Dan oko udo pi bedo mergi.

⁴⁹Kakame jo me Isirael do otieko popoko kede lobo i dule apapat me bedo megigi, gin kiko mino Yosua wot ka Nun da lobo kame make i diere gi.

⁵⁰Gin kilubo cik ka Rwot di kiko mine bomba kame en oudo ekwao be mie. Bomba nono en Timunat Sera, kame oudo tie i piny kobedo mori mori me Epuraimu. En bin eko gero bomba nono di eko donyo bedo iye.

⁵¹Magonogi en lobere kame Eleasar ngasaseredoti kede Yosua wot ka Nun kede jotel me diakale me jo me ikekon me Isirael oko popoko kede alulu i Silo i nyim Rwot, i ekeko me Eema me Riamo. Aso, gin bin kiko tieko poko lobo kamano.