Read kumam Yosua 20 Bible Online

Yosua 20 - kumam bible

Yosua 20

¹Di do Rwot oko waco ne Yosua

²pi waco ne jo me Isirael be, “Yerunu bomban me ringo ot gwokere, bomban kame oudo ango aciko ne Musa pi waco ne wu kop i kom gi,

³tetekeny ngatamoroni kame neko dano i akangas romo ringo kunono di eko bwot kibut ngat kame mito culo kwor.

⁴Ngat koneko dano bino ringo i bomba acel kikom bomban nogo, di eko ot cungo i erute me bomba kakame otimo iye ekiko, di eko tatamo but jodongo me bomba gi kotimere. Di do gin kiko bino tere i bomba kiko mine kabedo, di en eko dong bedo kede gi.

⁵Ka ngat kame mito culo kwor nono oko wapo dano nono kunono, gin miero kur kimi nganek nono i cinge, piento en eneko dano nono i akangas, likame oudo gin kidingere.

⁶Ngat koneko dano nono bino dong bedo i bomba nono tuno ka koketo kop mere i ekiko i nyim jo. Ka gin kiko udo be en etie kede raco me nek, gin kibino mine i ceng ngat kame mito nyango kwor nono. Do ka gin kiudo be en oudo eneko dano i akangas, miero weke edong bedo i bomba me gwokere nono tuno to me Ngatel me Josaseredoti me i kare nono. Di do en eko romo dok paco i bomba me turgi, kakame en oudo eneko dano iye.”

⁷Aso, i bad tetu tim me Yorodan gin kiko yero bomban gi: Kades kame oudo tie Galilaya, i piny kobedo mori mori me Naputali; Sekem i piny kobedo mori mori me Epuraimu, kede Kiriat Araba (arabo Keburon) i piny kobedo mori mori me Yuda.

⁸I loka tetu kide me Yorodan, i bad tetu kide me Jeriko, i lobo me jo me ekeko ka Ruben, gin kiko yero Beser, bomba kame oudo tie i wi tim i lobo kotingere malo di epetere; kede Ramot kame oudo tie Gilead i lobo me jo me ekeko ka Gad; kede Golan kame oudo tie Basan, i lobo me jo me ekeko ka Manase.

⁹Magonogi bin gin en bomban me ringo ot gwokere kame oko yero pi jo me Isirael dedede, kede pi jokumbor kame oudo bedo i diere gi, tetekeny ka dano moro oudo oko neko dano ocelu i akangas, en eromo ringo ot gwokere kunono. Manono oudo mio dano nono bwot kibut ngat kame oudo mito culo kwor, tuno ka oudo koketo kop me nek nono i ekiko i nyim jo.