Read kumam Yosua 3 Bible Online

Yosua 3 - kumam bible

Yosua 3

¹Oru mere odiko sek, Yosua karacel kede jo dedede me Isirael oko yai ki Sitim, di kiko ot tuno Yorodan. Gin kiko ber gero kimere gi kanono di pwodi likame kingolo ecilet.

²Ingei ceng adek jotel oko rimaro kimere dedede

³di kiciko jo be, “Kame inenunu di josaseredoti Jolebi tie riongo Sanduku me Isikan ka Rwot Rubanga wu, wuda ipoorenu yai lubo gi.

⁴Wun lem pwodi likame itununu kan, pi manono gin en kame kibino telo ne wu yongayo. Do likame ibinunu noko Sanduku me Isikan; ibinunu dong cen mere kakame boro mere romo kilomita acel.”

⁵Yosua oko waco ne jo be, “Lonyerenu, pien diki Rwot bino timo ne wu gi me aura.”

⁶Di do eko waco ne josaseredoti pi riongo Sanduku me Isikan di kiko telo ne jo anyim. Gin kiko timo bala kame en ewaco.

⁷Rwot oko waco ne Yosua be, “Tin ango abino mini icako bedo kede dwongo i nyim jo me Isirael, tetekeny gin kingei be ango abino bedo tie kedi bala kame oudo abedo tie kede Musa.

⁸Wac ne josaseredoti atie riongo Sanduku me Isikan be, ‘Kame itununu i ecilet me Yorodan, poore icungunu karacel.’ ”

⁹Yosua oko waco ne jo be, “Bianu kan di ikounu winyo gikame Rwot Rubanga wu waco.”

¹⁰Di eko waco negi be, “Sanduku me Isikan ka Rwot ngat kame pugo wi lobo lung en kame bino telo ne wu anyim ngolo ecilet me Yorodan. Kame josaseredoti atie riongo Sanduku me Isikan tien gi onyono pii me Yorodan, pii me ecilet nono bino cungo likame emol, di pii kame tie mol ko bino cokere ikumemei karacel. Manono bino mino ingeunu be Rubanga akuo tie i diere wu. En ateteni ebino riamo tenge ki nyimu jo Kanan, jo Kiti, jo Kibi, jo Perisi, jo Girigas, jo Amor kede jo Yebu. Rwot doko da owaco be en emito be iyerunu cuo tomon kiwie are ngat acelacel ki buli ekeko me anywali me Isirael.”

¹⁴Manono oudo obedo kare me kac, ecilet oudo otimo ariram. Kakame jo oyai kede ki kabedo kame oudo kigero iye kimere, pi ngolo ecilet me Yorodan, josaseredoti en oko telo negi yongayo di kiriongo Sanduku me Isikan. Cucuto kakame josaseredoti onyono kede pii,

¹⁶pii oko weko mol di eko cokere karacel malo kuno i nget bomba me Adamu, kame kio kede Saretan. Mol me pii ot donyo i Nam Oto oko ngol tel, di do jo oko ngolo ecilet i kakame pimere kede Jeriko.

¹⁷Kakame jo dedede me Isirael oudo tie beno kede i kakatek pi ngolo ecilet, josaseredoti koudo tie riongo Sanduku me Isikan ka Rwot oko cungo i dier ecilet kakotuo, tuno jo dedede ngolo loka.