Read kumam Yosua 4 Bible Online

Yosua 4 - kumam bible

Yosua 4

¹Kakame jo dedede me ateker me Isirael otieko ngolo kede Yorodan, Rwot oko waco ne Yosua be,

²“Yer cuo tomon kiwie are, ngat acelacel ki buli ekeko me anywali me ateker me Isirael,

³di iko ciko negi pi kwanyo kide tomon kiwie are ki dier ecilet me Yorodan, ki kakame josaseredoti oudo ocungo iye. Wac negi pi tero kide nogo kakame kibino gero iye kimere iwor atin.”

⁴Yosua oko yero cuo tomon kiwie are ki buli ekeko me anywali me ateker me Isirael di eko lwongo gi karacel.

⁵En eko waco negi be, “Otunu anyim me Sanduku me Isikan ka Rwot Rubanga wu tuno i dier ecilet me Yorodan, di buli ngat acelacel ko kwanyo kidi eriong i epepet mere, kidi acelacel pi buli ekeko me anywali me ateker me Isirael.

⁶Kide nogi bino yutuno ne wu i kom gikame otimere i ecilet me Yorodan. Ka i kare me anyim idwe wu openyo wu i kom dwong me kide nogi,

⁷wun ibinunu waco negi be, ‘Bin pii ojiko mol kakame oudo kotie riongo kede Sanduku me Isikan ka Rwot ngolo kede ecilet me Yorodan. Aso, kide nogi tie pi yutuno ne jo me Isirael i kare dedede i kom gikame otimere.’ ”

⁸Cuo nogo oko timo gikame Yosua ociko negi timo; gin kikwanyo kide tomon kiwie are ki dier ecilet me Yorodan di lubere kede wel me ikekon me anywali me ateker me Isirael, bala kame Rwot oudo owaco ne Yosua, di kiko tero gi kakame oudo jo ogero iye kimere, di kiko cicibo gi kunono.

⁹(Yosua da oko cicibo kide tomon kiwie are i dier ecilet me Yorodan, kakame tien josaseredoti kame oudo riongo Sanduku me Isikan ka Rwot oudo ocungo iye; kide nogo pwodi tie kunono tuno tin.)

¹⁰Josaseredoti koudo riongo Sanduku me Isikan oko dong cungo i dier ecilet me Yorodan tuno di oudo kotieko timo gi dedede kame Rwot oudo ociko ne Yosua pi waco ne jo timo. Manoni en gikame Musa oudo ociko ne Yosua. Jo oko ngolo ecilet awakawaka.

¹¹Cucuto di jo oudo otieko ngolo loka tetuca, josaseredoti kame oudo riongo Sanduku me Isikan ka Rwot oko kato kitelo ne jo anyim.

¹²Jo me ekeko ka Ruben, jo me ekeko ka Gad, kede dul me jo me ekeko ka Manase oko ngolo loka kikato i nyim jo me Isirael di kitieko iikere pi yi, bala kame Musa oudo ociko negi.

¹³Cuo aromo bala tutumia ot ongwon me ikekon me anywali nogi oko ngolo loka tuno i elet me nget Jeriko di kitieko iikere pi yi, di Rwot oudo tie kede gi.

¹⁴I ceng nono, Rwot oko mino Yosua obedo kede dwongo i nyim jo dedede me Isirael; gin kiko bedo kede wor bute i kare me kuo mere lung, bala kame oudo kibedo kede wor but Musa.

¹⁵Rwot oko waco ne Yosua be,

¹⁶“Mi josaseredoti atie riongo Sanduku me Isikan cik pi wok ooko ki ecilet me Yorodan.”

¹⁷Yosua oko ciko ne josaseredoti nogo pi wok ooko ki ecilet me Yorodan.

¹⁸Kakame josaseredoti koudo yeo Sanduku me Isikan ka Rwot otieko wok kede ooko ki dier ecilet me Yorodan, di tien gi oko nyono ooko kakatek, pii me ecilet me Yorodan oko dok kakare, di eko donyo mol ariram i ngete kago bala kame oudo etie kede sek.

¹⁹Jo bin ongolo ecilet me Yorodan i ceng me tomon me duwe me agege, di kiko ot gero kimere gi Giligal, i bad tetu kide me Jeriko.

²⁰Kide tomon kiwie are kame gin kikwanyo ki ecilet me Yorodan, bin Yosua oko sipo gi Giligal,

²¹di ewaco ne jo me Isirael be, “Kame i kare me anyim idwe wu openyo jonywal gi dwong me kide nogi,

²²wun ibinunu waco negi be, ‘Jo me Isirael bin ongolo ecilet me Yorodan tuno kan di kibeo i kakatek.’

²³Pien Rwot Rubanga wu omio pii me Yorodan otuo ne wu tuno wun ngolo loka, bala kame bin emio kede Nam Akwar otuo ne wa tuno wan ngole.

²⁴Pi manoni, jo dedede me wi lobo bino ngeno twer kame Rwot tie kede, di wun ikounu bino bedo kede wor but Rwot Rubanga wu pi kare lung.”