Read kumam Yosua 7 Bible Online

Yosua 7 - kumam bible

Yosua 7

¹Jo me Isirael likame oko lubo cik kame oudo Rwot omio gi amakere kede dudubo jamini dedede. Akan likame olubo cik nono, omio Rwot oko doko ger ne jo me Isirael. Akan oudo obedo wot ka Karami, akwar Sabadi; en oudo ebedo akwar me ot ka Seera, dul moro me jo me ekeko ka Yuda.

²Yosua oko cwano cuo mogo yai ki Jeriko ot Ai, kame tie i nget Bet Aben i bad tetu kide me Betel, pi ot begao lobo nono. Cuo nogo oko ot di kiko mamano Ai.

³Gin kiko dok but Yosua di kiko waco ne be, “Likame jo dedede poore ot kuno, jo tutumia are amoto adek en kame poore ot suro bomba me Ai. Pien likame en ebedo bomba adwong, kur icwai isirikalen dedede lole ot kuno.”

⁴Aso, isirikalen aromo bala tutumia adek me Isirael oko ot pi suro kunono, do jo me Ai oko riamo gi.

⁵Jo me Ai oriamere kede gi cako ki erute me bomba lor piny paka tuno Sebarim, di jo me Ai oko neko gi bala jo aromo ot adek kiwie kanyape i yongayo alor piny ki wi emukura nono. Jo me Isirael oko bedo kede lworo di cuny gi oko kwanyere.

⁶Yosua kede jotel me Isirael oko nyinyilo igoen gi pi cwercuny, di kiko roburobun piny i nyim Sanduku me Isikan ka Rwot, di kiko donyo buto kanono tuno otieno, di oudo kijuk kede apua tie i wi gi pi cwercuny.

⁷Yosua oko waco be, “Okwe Rwot pinyo komio ikelo wa ngolo ecilet me Yorodan tuno kan? Mam ikelo wa pi mino wa i cing jo Amor tetekeny kinek wa? Pinyo komio wan likame koto odong girwa loka tetuca me Yorodan?

⁸Okwe Rwot nan do awac benyo, bala kame nan jo me Isirael otieko ringino dwogo kede kibut jokwor?

⁹Jo me Kanan kede jo dedede abedo i lobo noni bino winyo kop noni di kiko lukaro wa di kiko neneko wa dedede. Di do nyo kame in ibino timo pi gengo jo waco kop arac i nyingi adwong?”

¹⁰Rwot oko waco ne Yosua be, “Yai malo! Pinyo komio itie riebere piny kamano?

¹¹Jo me Isirael odubo, gin kituro isikan kame ango aciko negi pi lubo. Gin kitero jamini mogo kame oudo kipoore dudubo. Gin kikwalo gi di kiko ribo gi i kom jamini gi di kiko waco kop me abe.

¹²Manono en komio jo me Isirael likame twero yi kede jokwor gi. Gin kiringino kibut jokwor gi pien gin en kame nan do miero muducaro gi. Ango likame bobo abino meede bedo tie kede wu tuno di idudubunu jamini kame oudo kopoore dudubo.

¹³Oti ilony jo di iko waco negi pi iikere pi bino i nyima diki. Wace gi be ango Rwot Rubanga me Isirael awaco be, ‘Okweunu jo me Isirael, wun itienu kede jamini mogo kame oudo ango aciko ne wu pi dudubo! Likame ibinunu twero yi kede jokwor wu tuno di ikwanyunu jamini nogo tenge ki diere wu.’

¹⁴Aso, wace gi be diki odiko buli ateker acelacel me Isirael bino bino anyim, di ateker kame ango abino yeko, jo mege ko bino anyim buli ekeko me anywali acelacel. Diakal kame ango abino yeko, jo mege ko bino anyim buli dano acelacel.

¹⁵Di do ngat kame ango abino yeko en kame udo tie kede jamini kame kopoore dudubo; ngat nono kobino wange kede mac, en karacel kede gi dedede kame etie kede, piento en etimo twon gikarac arom kano i Isirael di eko turo isikan na.”

¹⁶Odiko sek me ceng kolubo, Yosua oko mino buli ateker acelacel me Isirael ooto anyim, oko yeko ateker ka Yuda.

¹⁷En eko mino ateker ka Yuda ooto anyim, di oko yeko ikwae ka Seera. En eko mino ikwae ka Seera ooto anyim buli diakal acelacel, di oko yeko diakal ka Sabadi.

¹⁸En eko mino jo me diakal ka Sabadi ooto anyim buli dano acelacel, di oko yeko Akan wot ka Karami, Karami oudo obedo wot ka Sabadi, Sabadi oudo obedo wot ka Seera, gin jo me ateker ka Yuda.

¹⁹Yosua oko waco ne Akan be, “Dano na, wac kop me ateni i nyim Rwot Rubanga me Isirael, di iko tuco gi dedede. Nan wac na gikame in itimo, kur imungi.”

²⁰Akan oko dwoko be, “Etie kop me ateni, ango en kame adubo i nyim Rwot Rubanga me Isirael. Gikame ango atimo ine:

²¹kikom jamini kame wan oudo omao, ango ako neno ekanso acil me Babilon, kede siliba aromo bala kilo are, kede saabu aromo bala dul kilo; cunya oko wana i kom gi di ako tero gi. Nan gin kitie ayiko gi piny i eema na, di aketo siliba i dud gi piny.”

²²Yosua oko cwano jo mogo di gin kiko ringo aringa ot i eema ka Akan, di kiko udo be ateteni oudo koyiko jamini kame kopoore dudubo kunono, di koketo siliba piny i dud gi.

²³Gin kiko golo jamini nogo ki eema di kiko tero gi ne Yosua kede jo dedede me Isirael, di do kiko cibo gi i nyim Rwot.

²⁴Di Yosua karacel kede jo dedede me Isirael oko tero Akan wot ka Seera, karacel kede siliba, ekanso, saabu, awobe kede anyira mege, twonin mege, pundan mege, romini mege, eema mere kede gi dedede kame oudo etie kede; di oko tero gi i aditot me Akor.

²⁵Yosua oko waco be, “Pinyo komio ikelo peko i kom wa? Tin Rwot tie kelo peko i komi.” Di jo dedede me Isirael oko didipo en karacel kede jo mege tuno to, di kiko wango jamini mege da.

²⁶Gin kiko coko atukit me kide i kome, atukit me kide nogo tie tuno tin. Manono en komio kolwongo kanono be Akor.[3] Rwot oko do jiko gero mere.