Read kumam 2 Jotesalonika 3 Bible Online

2 Jotesalonika 3 - kumam bible

2 Jotesalonika 3

¹Me ajikini mere, imiegu kede amiegu na, legunu ne wa, tetekeny kop ka Rwot meede sarakin oyotoyot, di jo ko game kede wor bala kame etie timere kede i diere wu.

²Doko da kwaunu emi wa obwotunu kibut jo kame reco, jo kame ekite gi odubere; pien likame jo dedede tie kede yei.

³Do Rwot genere, en ebino mino cunyu teko di eko gwoko wu kibut Ngarac.

⁴Doko wan otie kede gen atek butu i Rwot be, wun itienu timo gikame wan ociko ne wu, doko ibinunu meede timo gi.

⁵Okwao Rwot eseikino cunyu maro Rubanga kede emi wu isipakinunu i Kirisito.

⁶Imiegu kede amiegu na, wan nan ociko wu i nying Rwot wa Yesu Kirisito be, wekunu bedo kede omin wu arabo amin wu moro kame bedo abeda abongo timo tic, di likame elubo epone me kuo kame wan opwonyo wu iye.

⁷Pien wuda kikomu ingeunu epone kame ipoorenu lubo kede ekite me kuo wan; wan oudo likame obedo abeda abongo timo tic di bin otie kede wu.

⁸Wan likame ocamo cam ka ngatamoro abongo culo, do ocane tic kede teko iwor kede iceng, tetekeny kur omi peko dino ngatamoro kibutu.

⁹Likame man otimere be pien wan oli kede twero no, do pi mino wu anyut i kuo wan kame ipoorenu lubo.

¹⁰Pien akadi i kare kame wan oudo otie kede wu da, bin wan omio wu cik kame waco be, “Kame ngatamoro dagi timo tic, miero kur ecami.”

¹¹Pien wan nan owinyo be jo mogo kikom wu tie bedo abeda, gin jo kame totolo tice me jo apat abongo gin timo tic moro.

¹²Aso, wan ociko akodi jo nogo, doko okwao cuny gi i Rwot Yesu Kirisito be, wek gin kitim tice gi mot di kiko twero pitere ken gi.

¹³Imiegu kede amiegu na, kur iolunu kede timo gikaber.

¹⁴Ka ngatamoro odagi lubo gikame wan owaco i baluwa noni, niangunu i kome kiber. Kur iriberenu kede tetekeny lewic make.

¹⁵Kur iterenu bala ngakwor, do kwenyarunu en bala omin wu arabo amin wu.

¹⁶Akwao Rwot won mulem, en kikome emi wu mulem i kare lung kede da i yore lung. Rwot bed kede wu dedede.

¹⁷Ango Paulo, awandiko amot noni kede cinga kikoma. Manoni en epone kame ango aketo kede cinga i baluwan nango dedede; ango awandiko iepone noni.

¹⁸Kisa ka Rwot wa Yesu Kirisito bed butu dedede.