Read kumam 1 Temeseo 2 Bible Online

1 Temeseo 2 - kumam bible

1 Temeseo 2

¹Aso me agege mere, ango akwao be kwac, ilega, ngangao Rubanga pi jo icegun, kede mino pwoc, poore tim pi jo dedede;

²pi abakai kede jo dedede kame tie i ruom amalo, tetekeny obedunu kede kuo me anapakin kede me mulem, di oworunu Rubanga kede di otienu kede tim abeco i yore dedede.

³Man tie gikaber, kame yomo cuny Rubanga Ngalak wa,

⁴ngat kame mito ne jo dedede udo alako, di kiko udo ngec i kom ateni.

⁵Pien Rubanga tie acel, doko ngat kame rucakino Rubanga kede jo da tie acel, dano nono en Kirisito Yesu,

⁶ngat kame bin ojalo kuo mere pi lako jo dedede. Manoni oudo obedo gikame moko kop, kame komio i kare kopoore.

⁷Kop noni en komio oudo koyera pi bedo ngatuc ejiri kede ngaor, ngapwony me jo kalikame Iyudayan i yei kede i ateni (ango atie yamo kop me ateni, likame atie ngalo).

⁸Ango amito be, i kabedere dedede, cuo poore lego di kikiarao cing gi kacil malo, abongo cuny me gero arabo piem.

⁹Doko mon da poore ngapere iepone kame ber, kibus, kede engape kopoore. Likame kipoore kedo yer wi gi arabo ngapo mwola me saabu, arabo bira amoto engape me wel,

¹⁰do kibed kede tice kabeco bala kame poore kede ne mon kame waco be gin kiworo Rubanga.

¹¹Dako miero pwonyere eliling di emwolere.

¹²Ango likame ayei ne dako moro pwonyo arabo bedo kede akarunikin i kom cuo; dako miero ling titi.

¹³Pien Adamu en kame bin kogeo cweno, di do oko cweno Keba;

¹⁴doko likame bin kongalo Adamu, do kongalo dako, di en eko turo iswil.

¹⁵Do dako bino udo alako pi nywalo idwe, ka di emeede kede yei kede amara kede kuo kacil, doko di ebedo mot.