Read kumam 1 Temeseo 4 Bible Online

1 Temeseo 4 - kumam bible

1 Temeseo 4

¹Tipo waco kakaler be i kare me ajikini jo mogo bino weko yei; gin kibino winyo kope me tipere kame tie kede angalo kede pwony me jwogi.

²Akodi pwony nogo wok ki ecuke me joangalo, jo kame ngec me cuny gi onyunyuun bala kocwinyo kede lilim kodop.

³Gin kigengo jo nyomere, doko kimito be jo kwer cam mogo kame Rubanga ocweo ne jo kame yei kede kame ngeo ateni pi camo ingei mino pwoc.

⁴Pien gi dedede kame Rubanga ocweo beco, likame tie gimoro kame dano poore dagi camo tek di etieko mino pwoc pire;

⁵pien udo kop ka Rubanga kede ilega otieko lonye.

⁶Ka imio imiegu kede amiegu pwony nogi, ibino bedo ngatic aber me ka Kirisito Yesu, di ipito cunyi kede kop me yei kede pwony aber kame ibedo lubo.

⁷Kur igam kop mogo me itatam me mingomingo, kalikame nyuto wor but Rubanga. Pwonyere pi bedo kede wor but Rubanga.

⁸Pien akadi bed bala rierieo kom wa tie kede kony moro, do bedo kede wor but Rubanga konyo i yore dedede, piento en ecikere pi mino wa kuo i kare kanataman kede i kare kame bino bino.

⁹Man kop me ateni kame poore oyeunu odocon.

¹⁰Pi mano, wan ocane doko otimo tic kitek pien wan otieko keto gen wa i kom Rubanga kakuo, kame obedo Ngalak me jo dedede, do singo twatwal jo kame tie kede yei.

¹¹Mage en gikame in miero inyikakino yamo di ipwonyo jo iye.

¹²Kur ngatamoro bed kede acae buti be pien in pwodi ititidi, do bed anyut me aluba but jo koyei Kirisito; i yamo kede i ikiteso, i amara, i yei kede pi bedo abongo raco moro.

¹³Jal kare ni pi somo ne jo iwandik kacil, tuco ejiri, kede pwonyo jo tuno ango bino.

¹⁴Kur iwek tic kede giamia me Tipo Kacil kame itie kede, giamia kame komii i imurai kakame bin joadongo oketo kede cing gi i wi.

¹⁵Ket gi nogi i tic, ket cunyi i kom gi, tetekeny jo dedede nen ekite kame in itie meede kede anyim.

¹⁶Gwokere keni, doko gwok pwony ni da; meede timo gi nogi, pien ka itimo kamanoni ibino lakere keni, kede ibino lako jo kame winyo kope ni da.