Read kumam 1 Temeseo 5 Bible Online

1 Temeseo 5 - kumam bible

1 Temeseo 5

¹Kur iyamo kede dano adwong kede dwan me gero, do yam kede bala ebedo papa ni. Ter awobe atino bala imiegu ni,

²mon adongo bala joatoti ni, kede mon atino bala amiegu ni, abongo bedo kede tam moro arac i kom gi.

³Nyut wor but apuserun kame obedo apuserun kikokome.

⁴Ka apuserut moroni tie kede idwe mege arabo ikwae, me agege gin ber kong kipoore pwonyere timo tic kame edini mito ne gi timo ne jo me miere gi, di kiko culo gikame jonywal gi otimo ne gi; pien man yomo cuny Rubanga.

⁵Dako kame obedo apuserut me ateni, kame koweko kene, en eketo gen mere i kom Rubanga, doko emeede kwano Rubanga di elego iwor kede iceng.

⁶Do apuserut kame maro kuo me yomcuny otieko gire to, akadi bed bala pwodi ekuo.

⁷Mi gi cik nogi, me wek kur kibed kede gimoro kame kobunano gi iye.

⁸Ka ngatamoro likame gwoko joawade mege, do singo twatwal jo me i ode, udo etieko weko yei, doko udo erac kalamo ngat kame li kede yei.

⁹Kur wandiko nying apuserut moro i ekodet me apuserun, kwanyo ka mwaka me dongo mere oromo ot kanyape, doko mito di oudo enyomere kede icuo acel kenekene.

¹⁰Miero ebed dako kame jo jurao be etimo tice kabeco: dako kopito idwe mege kiber, dako kame oudo gamo wele, kame oudo mwolere timo tice ne jokirisito icegun, dako kame okonyo jo kame oudo tie i peko, kede kame jalere timo bero i yore dedede.

¹¹Do kur irwak nying apuserun atino i ekodet me apuserun, pien ka mit me kom gi omio gi kimito nyomere, kiweko Kirisito,

¹²aso man ko bino mino kongolo ne gi kop pi turo cikere gi me agege.

¹³Medo i wi mano, gin kipwonyere bedo abeda abongo tic, di kirimo miere. Doko likame mano kenekene, do kidoko da jo kame kwoto jo, kede jo kame donyo i kope kalikame mako gi, di kiyamo kope kalikame kipoore waco.

¹⁴Aso, ango atamo be apuserun kame pwodi tino poore nyomere, kinywal idwe, kipug miere gi, di likame kiko mino ngakwor kare me yamo kop moro arac i kom wa.

¹⁵Pien mogo kikom gi otieko apaar tenge lubo Sitani.

¹⁶Ka dako ngakirisito moro tie kede joawade mege kame obedo apuserun, poore ekony gi; kur jal peko noni ne ekodet me jokirisito, me wek ekodet noni twer konyo apuserun me ateni.

¹⁷Kopoore mino wor adikinicel but joadongo kame telo kiber, do singo twatwal jo kame cane tuco ejiri kede pwonyo jo.

¹⁸Pien iwandik kacil waco be, “Kur itwei dog twon ka itie tic kede pi canyo alos”,[1] kede be, “Kopoore culo ngatic pi tic kame etimo.”

¹⁹Kur i yei gamo kop me pido moro kame kokelo i kom ngat adwong, kwanyo ka jo are amoto adek ojurao kop nono.

²⁰I kom kop kame mako jo kame meede kede dub, bunano gi i nyim jo dedede tetekeny jo icegun dok lwor.

²¹Ango aciki i nyim Rubanga kede i nyim Kirisito Yesu kede imalaikan kame koyero be, poore ilub cik nogi abongo yero obwol ki dek, di ili kede apokapoka i gi dedede kame itimo.

²²Kur isunyo dokakino bad i wi ngatamoro pi bedo ngatel, doko da kur idonyi i dub ka ngat apat; bed abongo raco moro.

²³Kur i meede mato pii kenekene, do mat da bwini moro anonok pi yii kede pi aramo kame loli kare i kare.

²⁴Dub me jo mogo idelelei, di kinyuto kakaler be kobino ngolo ne gi kop, do dub me jo ace neeno i cen.

²⁵Kamanono da, tice kabeco idelelei; doko akadi likame kineeno da, likame kikaruno dong di kikanere.