Read kumam 1 Temeseo 6 Bible Online

1 Temeseo 6 - kumam bible

1 Temeseo 6

¹Jo dedede kame obedo ipasoi miero ter jodongo gi bala jo kame poore awora i yore dedede, me wek kur kocai nying Rubanga karacel kede pwony wa.

²Kur ipasoi kame jodongo gi oyei Kirisito dagi woro gi be pien gin kibedo imiegu i Kirisito; do akaka manono, gin miero kitim ne gi tic kame ber kato, pien jo kame gin kitie konyo obedo jo kame oyei Kirisito, jo kame gin kimaro. Pwony kope nogi, doko kwai cuny jo pi lubo gi.

³Ka ngatamoro tie kede pwony apat kalikame upere kede pwony me ateni me ka Rwot wa Yesu Kirisito, kede pwony kame kelo wor but Rubanga,

⁴udo epong kede ewaka doko likame engeo gimoro. En udo etie kede cuny arac me piem kede me lok i kom kope kenekene. Manoni kelo nyeko, apokapoka, dubo nying jo, potocuny,

⁵kede atwomutwomun arac i dier jo kame tam gi otieko dubere doko kili kede ateni. Gin kiparo be kop kame makere kede woro Rubanga obedo gikame kelo ud.

⁶Ebo, ud tie i kuo me woro Rubanga ka in imio gikame itie kede oromi.

⁷Pien wan likame okelunu gimoro i piny kan, kamanono da likame okarununu kwanyo gimoro ki piny kan okounu tero.

⁸Pi mano, ka wan otienu kede cam kede giangapa, magi poore romo wa.

⁹Do jo kame mito abar donyo i atama di kiko moko i owic me mit atot me mingomingo, kame kelo awanon kame tero jo i rwenyo kede i dubere atwal.

¹⁰Pien bedo kede cuny kame maro sente en agege me epone dedede me gikareco. Jo mogo oko bedo kede mit atek ateka me sente omio gi kiko parao tenge ki yei, di kiko kelo cwercuny adwong i kuo gi.

¹¹Do in dano ka Rubanga, kur idony i tim nogi akadi acel. Ket cunyi i bedo kede ekite kopoore, i woro Rubanga, i yei, i amara, i ikanyakin kede i bedo mot.

¹²Yi kiber i yi me yei, di iko bino udo kuo kame bedo nakanaka, kame riki kolwongi iye i kare kame ituco kede yei ni i nyim ijurak atot.

¹³I nyim Rubanga ngat kame mio gi dedede kuo, kede i nyim Kirisito Yesu ngat kame riki otuco kiber kop me ateni i nyim Pontio Pilato, ango aciki be,

¹⁴lub cik kame komii di iko bino bedo di icil abongo gikame kobunano in iye, tuno i Ceng kame Rwot wa Yesu Kirisito bino neeno kede.

¹⁵Rubanga kame kopako, kame en kene Won twer, Abaka me abakai kede Rwot me rwode, en kame bino nyute i kare kopoore.

¹⁶En kene kalikame eto, doko ebedo i lero kalikame ngatamoro twero noko. Likame tie ngatamoro kotieko nene arabo kame twero nene. Wor kede twer kame bedo nakanaka bed bute. Amen.

¹⁷Cik jo kame nataman obaro i piny kan kur kitingere, doko kur kiket gen gi i kom abar kalikame genere, do kipoore keto gen gi i kom Rubanga ngat kame mio wa jame dedede kede cunye lung pi kelo ne wa yomcuny.

¹⁸Gin kipoore timo bero, kibed jo kobaro kede tim kabeco, jo kame mio kede cuny gi lung, di kitie kede cuny me nywako kede jo icegun.

¹⁹Ka kitimo kamano, udo kikano abar kame bino bedo bala acakini atek pirgi pi kare me anyim, tetekeny kiko bino udo kuo kame tie kuo me ateni.

²⁰Okwe Temeseo, gwok gikame kotieko geni kede. Kur idonyi i yamo kalikame nyuto wor but Rubanga kede piem mogo kame jo lwongo i yore me abe be “Ngec”.

²¹Pien jo mogo pi yamo be gin kitie kede akodi ngec nono, omio gin kiko rwenyo i kom kop kame mako yei. Kisa ka Rubanga bed kede wu.