Read kumam 2 Temeseo 4 Bible Online

2 Temeseo 4 - kumam bible

2 Temeseo 4

¹I nyim Rubanga kede i nyim Kirisito Yesu, en ngat kame bino ngolo kop ne jo akuo kede ne jo oto, doko pi dwogo mere kede Ajakanut mere, ango akwai kitek be,

²pwony kop ka Rubanga, meede ameda tatamo en akadi i kare aber amoto i kare arac; lok tam me jo, bunano gi, dii cuny gi, di ipwonyo gi kede dire adwong.

³Pien kare tie bino kame jo bino dagi gamo kede pwony aber, do kibino lubo mit gi di kiko coko jopwony kame bino pwonyo gi gikame cuny gi mito.

⁴Gin kibino dagi winyo kop me ateni di kiko apaar donyo winyo itatam mogo.

⁵Do in bed di wi tamo, kanyakino can, tim tic me tuco ejiri, cob tic nin.

⁶Ango gira kare na otieko tuno kame kobino mino kede kuo na bala giayala; kare na me yai ki kuo me piny kan otieko tuno.

⁷Ango atieko yi kiber, atieko ringo paka i tol, atieko gwoko yei.

⁸Cako nataman, kotieko iiko na giamia me loc pi bedo ngat kopoore, kame Rwot ngangolkop kopoore bino mina i Ceng nono, doko likame ebino mino ango kenekene, do ebino da mino jo dedede kame daro dwogo mere kede imue.

⁹Tamakino kede teko ni dedede pi bino buta i kare kiyapiyapi.

¹⁰Pien Dema otieko weka di eko gire ot Tesalonika pi kite kame emaro kede kuo me piny kan; Kuresene da ooto Galatia kede Tito da otieko ot Dalamatia.

¹¹Luka kenekene en kame tie keda. Moi Marako iko upere kede ibinunu buta, pien ebedo dano kame tie kede kony buta i tic na.

¹²Ango atieko oro Tukiko Epeso.

¹³Kame itie bino, kel na egoe abor apek kame oudo aweko Teroa but Karapo. Kel kiton itabun da, do twatwal mere itabun kame kotimo kede launi.

¹⁴Alekesanda ngatet otimo na gikarac twatwal; Rwot bino culo raco kame etimo.

¹⁵Ida bed di i gwoke, pien bin en epiemo kede kop wa kitek.

¹⁶I pido na me agege pira, likame tie ngatamoro kokonya, do jo dedede ojala. Akwao Rubanga kur mar raco nono i wi gi.

¹⁷Do Rwot oko bedo tie keda, di eko mina teko me pwonyo kop mere odocon, tetekeny jo kalikame Iyudayan winyi. Manoni oko mino kolaka ki lak engu.

¹⁸Rwot bino laka ki raco dedede di eko gwoka tuno i Ajakanut mere me malo. Deyo bed bute ikar kede ikar. Amen.

¹⁹Mota Purisila kede Akwila kede jo me ot ka Onesiporu.

²⁰Erasito odong Korinti; aweko Toropimu odong Miletu di etuwo.

²¹Tamakino kede teko ni dedede pi bino di kare me ngico me piny pwodi likame otuno. Eubulu omoti. Puden, Linu kede Kulaudia karacel kede imiegu kede amiegu dedede i Kirisito da omoti.

²²Akwao Rwot bed i cunyi. Kisa ka Rubanga bed butu dedede.