Read kumam Iburanian 1 Bible Online

Iburanian 1 - kumam bible

Iburanian 1

¹I kare kasek Rubanga oyamo kede joakwari wa tien atot i yote apapat kibut inabin.

²Do i kare kanataman me ajikini, en eko yamo kede wa kibut Wode, ngat kame en eyero pi jame dedede doko mege, doko en nono da kame bin Rubanga ocweo gi dedede di beo kibute.

³En kame enyuto deyo ka Rubanga, doko da en kame ebedo cal me kuo ka Rubanga kikokome. Kop mere kame tie kede twer en kame mio gi dedede bedo tie iepone kame nataman kitie kede. Kakame etieko lonyo kede jo ki dub, en eko bedo i bad tetu cam ka Rubanga won Twer Adwong.

⁴Aso, Wod oko doko dwong kalamo imalaikan dedede, bala kite kame nying kame en eudo kalamo kede mergi kede bero.

⁵Pien malaika mene kame Rubanga otieko waco ne be, “In en Woda tin ango atieko doko Papa ni”? Arabo bobo be, “Ango abino bedo Papa mere, di en eko bino bedo Woda”?

⁶Doko da, kakame ecwao kede Wode kao i piny, en ewaco be, “Poore imalaikan ka Rubanga dedede wore.”

⁷En eko waco kop i kom imalaikan be, “En emio imalaikan mege doko bala yamo, kede jotic mege doko bala leb mac.”

⁸Do i kom Wode, en eko waco be, “Okwe Rubanga, Ajakanut ni tie pi ikar kede ikar! In ipugo jo ni i yore me ateni.

⁹In imaro gikame opoore, do idagi gikarac. Manono en komio Rubanga, Rubanga ni, owiri kede mo me kilel kalamo jowoti.”

¹⁰Doko ewaco be, “Rwot, i agege in icweo lobo, doko malo obedo tic me cingi.

¹¹Gin kibino rwenyo wir, do in ibino dong di itie; gin dedede kibino ti bala egoe.

¹²In ibino dolo gi bala ekoti, di iko lokoloko gi bala igoen. Do in ibino dong di ical kamanono, doko kuo ni da likame bino jik.”

¹³Do malaika mene kame en etieko waco ne be, “Bed i bada tetu cam, tuno kede kame ami inyono jokwor ni i tieni bala abanya me teno tien”?

¹⁴Mam imalaikan obedo tipere kame timo tic ka Rubanga, kame en eoro pi timo tic me konyo jo kame bino udo alako?