Read kumam Iburanian 11 Bible Online

Iburanian 11 - kumam bible

Iburanian 11

¹Bedo kede yei en kame moko gikame wan ogenunu pi udo, en ngeno kiber be gikame wan likame onenunu tie ateteni.

²Pien Rubanga bin opwoyo joakwari wa pi yei gi.

³Yei en kame mio wa oniang be bin Rubanga ocweo piny kede kop mere, tetekeny gikame nan neeno bin kotimo ki gi kalikame neeno.

⁴Yei en kame bin omio Abel omio Rubanga giayala kame ber kalamo me ka Kain. Manono oko mino kopwoye be epoore, pien Rubanga kikome opwoyo giamia mere. Bed bala en eto, do nan pwodi en eyamo pi yei.

⁵Yei en kame bin omio kotero Enoka malo tetekeny kur ebil to. Bin likame en eko udere pien Rubanga oudo otieko tere. Di bin pwodi likame kotere, oudo komio ijura i kome be oudo en eyomo cuny Rubanga.

⁶Doko abongo yei likame tie ngatamoro kame twero yomo cuny Rubanga. Pien ngat kame bino but Rubanga, miero bed kede yei be Rubanga tie, kede be en emio giamia me pwoc but jo kame moe.

⁷Bin Rubanga okwenyaro Nua i kom gikame oudo pwodi likame eneno, do pi yei en eko winyo kop ka Rubanga, di eko guro yee pi lako kuo me jo me i ode. Pi yei mere noni, en eko mino kongolo kop olo piny lung di eko udo poore kame yei kelo.

⁸Pi Yei, Aburaam bin oyei kop ka Rubanga kakame oudo Rubanga olwonge kede pi ot i kabedo kame oudo Rubanga bino mine. En bin eko yai ot di likame engeo kakame oudo etie ot iye.

⁹Pi yei, bin en ebedo bala ngakumbor i lobo kame oudo Rubanga ociko pi mine, ineno bala oudo etie obukui. Bin en ebedo i kimere me eema karacel kede Isaka kede Yakobo, jo kame oudo nywako kede en cikere acel nono kame Rubanga oudo omio.

¹⁰Pien Aburaam oudo tie kuro bomba kame oudo tie kede acakini atek me gedo mere, kame Rubanga en opimo di eko gero.

¹¹Pi yei, Sara oudo twer me yac, bed bala kare mere me nywal oudo okato. Man otimere piento en oudo etero ngat kame bin omio cikere be genere.

¹²Pi mano, kibut dano acel, dano kame oudo rom aroma bala ngat kotieko to, ikwae owok kibute kame tot bala acerin me malo kede bala asinge kalikame marere me dog nam.

¹³Jo nogi dedede bin oto di oudo kitie kede yei, di likame kiudo gikame bin Rubanga ocikere pi mino, do oudo kinene anena ki kakabor di kiko pwore pire, ingei gin yei be gin kibedo jokumbor kede wele i piny kan.

¹⁴Pien jo kame yamo kamano nyuto kakaler be gin kitie mono piny kame obedo mergi.

¹⁵Ka koto oudo gin kitie paro pi lobo kame kiwok kiye, koto oudo kitwero udo kare me dok kuno.

¹⁶Do bala kame etie kede, gin oudo kimito piny kame ber kalamo, manono en me i malo. Pi mano, likame lewic mako Rubanga kame kolwonge be en Rubanga gi, piento en etieko iiko ne gi bomba.

¹⁷Pi yei, Aburaam bin oyei mino Isaka bala giayala, kakame bin kotame kede. En ngat kame bin Rubanga ocikere bute, oudo eyei pi mino wode acel kenekene bala giayala,

¹⁸en ngat kame bin Rubanga owaco kop i kome be, “Ikwae ni bino wok kibut Isaka.”

¹⁹Aburaam oudo tero be Rubanga karuno yaruno jo kikom jo oto. Pi mano, ka oporo apora, ecal bala Isaka oyaruno ki to di Aburaam oko game.

²⁰Pi yei, Isaka okwao ne Yakobo kede Esau winyo pi kare me anyim.

²¹Pi yei, bin di Yakobo tie to, en eko mino winyo but awobe ka Yosepu dedede, di ekudo wie egongo i wi ebela mere me komo di eworo Rubanga.

²²Pi yei, Yosepu i kare me ajikini me kuo mere oko yamo kop i kom yai me jo me Isirael ki Misiri, kede en eko yamo kop kame makere kede epone me ayika mere.

²³Pi yei, kakame bin konywalo kede Musa, jonywal mege oko kane pi dwete adek, pien oudo kineno be atin gi nono cil, omio gin likame kiko bedo kede lworo i kom cik kame oudo abaka omio.

²⁴Pi yei, i kare kame Musa odongo kede, en eko dagi be kur lwonge be wot ka nyar Parao.

²⁵En eko yei nywako itisilar karacel kede jo ka Rubanga akaka camo mulem pi kare moro acecek, mulem kame dub kelo.

²⁶En oudo etero be can kame en eneno pi Kirisito oudo obedo abar adwong kame kalamo abar me Misiri, piento en oudo eketo gen mere i kom giamia me pwoc kame ebino udo.

²⁷Pi yei, Musa oyai ki Misiri di likame etie kede lworo i kom gero me abaka. En ekanyakino ineno bala oudo eneno ngat kalikame neeno.

²⁸Pi yei, Musa otimo Ebaga me Kalamo di eko kikiro remo i wi ikekon, tetekeny Malaika kame Neko, kame oudo poore neko idwe kao kur nek idwe kao me jo me Isirael.

²⁹Pi yei, bin jo ongolo Nam Akwar di ineno bala kitie lubo lobo kakatek. Do bin di jo me Misiri da otamo ngolo, gin kiko mwony i pii.

³⁰Pi yei, apama me Jeriko bin opoto ingei jo me Isirael mamano bomba pi ceng kanyaare.

³¹Pi yei, Rakab, ngat kame bin obedo malaya, likame oko to karacel kede jo kame oudo dagi winyo Rubanga, piento en oudo egamo kiber jo kame oudo obino begao kuno.

³²Nan do amed waco benyo? Pien likame kare yei na tatamo kop i kom Gidioni, Barak, Samuson, Yeputa, Daudi, Samuel kede inabin.

³³Gin jo kame bin pi yei, kiko yi kede pinye apapat di kiko lono gi, kitimo gikame opoore di kiko udo gikame oudo Rubanga ocikere pi mino. Gin kiumo dog inguon,

³⁴kineko mac aliet, kibwot ki lak epima, kibedo kede teko bed bala gin oudo kigoro, kidoko joatek i yi, kimio isirikalen me kumbor oringo.

³⁵Pi yei, bin komio mon joe gi kame oudo otieko to, di koyaruno gi. Bin kobungo jo ace, di kidagi be gony gi, tetekeny kitoi di kiko yaruno i kuo kame ber kalamo.

³⁶Bin jo ace oneno can me anyero kede adao, kede mogo kotweo kede irikoi di oko tero gi i otkol.

³⁷Kodidipo gi kede kide, mogo kobaro yi gi kede musumeno, koneko gi kede epima. Gin oudo kiririmo piny di kingapo launi me romini kede me diegi, di can omako gi. Bin kotidilo gi kede kotisilaro gi.

³⁸Piny oudo likame obedo kakame poore ne gi! Gin bin kikokobo akokob i wi tim kede i mori, di kibedo i abo kede i bure kame tie i lobo.

³⁹Jo nogi dedede likame oko udo gikame oudo Rubanga ocikere pi mino, bed bala kopwoyo yei gi,

⁴⁰pien Rubanga oudo otieko iiko sek gimoro kame ber kalamo pirwa. En oudo emito be kur gin kidok jo kame tie kakare bala kame poore kede, abongo wan iye.