Read kumam Iburanian 12 Bible Online

Iburanian 12 - kumam bible

Iburanian 12

¹Pi mano, bala kame otienu kede ijurak atot rom kano kame oluko wa, poore wada owekunu gi dedede kame dio wa, kede dub kame omakakin i kom wa, di okounu kanyakino piem me ringo kame kocibo i nyim wa.

²Ocikunu wang wa i kom Yesu ngat kame obedo acakini me yei wa, doko en ngat kame mie ecato. En bin ekanyakino can me musalaba di lewic likame make pi kilel kame oudo kocibo i nyime, doko nan etie bedo i bad tetu cam me kom me ajakanut ka Rubanga.

³Tamunu kong ekite kame en ekanyakino kede twon gero kame jodubo oudo tie kede i kome, tetekeny kur iolunu arabo cunyu kwanyere.

⁴I auta wu kede dub, likame pwodi iutenu tuno ngatamoro onyo remo mere.

⁵Mam wi wu otieko wil i kom kop me dino cuny kame Rubanga oyamo ne wu bala idwe mege? En ewaco be, “Atin na, kame Rwot obitaro in, kur iter bala gi me tuko, doko kur cunyi kwanyere kame emi alola.

⁶Pien Rwot bitaro jo dedede kame en emaro, doko en emio atin acelacel kame en egamo bala mere alola.”

⁷Kanyakinunu can kame inenunu pien gin kitie pi bitaro wu. Rubanga tie tero wu bala idwe mege; pien atin mene en kame papa mere likame bitaro en pi pwonye?

⁸Ka eweko wu abongo bitaro wu, bala kame ebitaro kede idwe mege apat dedede, dwong mere be wun likame idwe mege kikokome, do ibedunu nywal me epae.

⁹Aso, joapapi wa me piny kan oudo bitaro wa di wan okounu bedo kede wor but gi. Mam akalamo mere miero do ojalerenu i loc ka Papa wa me cuny di okounu kuo?

¹⁰Pien joapapi wa me piny kan oudo bitaro wa pi pwonyo wa pi kare moro acecek bala kame gin oudo kineno kede be eber, do Rubanga bitaro wa pi bero wa, tetekeny onywak kede en bedo jokacil.

¹¹Pien kame kobitaro wa, wan oneno bala ebedo gikame lit do weko kame yomo cuny wa, do i cen mere en eko kelo anyakini me mulem kede kuo kopoore ne jo kame beo iye.

¹²Pi mano, kiaraonu bad wu alojolojo kede ikounu mino cong wu agoro dok tek,

¹³kede irieunu yote kame tienu lubo, tetekeny gikame ongwalo kur doko wilakin, do miero do ecangi.

¹⁴Tamakinunu bedo kede anapakin kede jo dedede, kede da pi bedo jokacil, pien abongo en likame tie ngatamoro kame twero neno Rwot.

¹⁵Poore inenunu be likame tie ngatamoro kame okei udo kisa ka Rubanga, doko kur ngatamoro bed bala yat kame alias mere kec, kame ka edongo ekelo peko di eko munao jo atot.

¹⁶Nenunu be likame ngatamoro odoko ngacaro amoto ngat kame dagi woro Rubanga bala bin Esau, ngat kame bin ocato twero mere me anywali pi cam kame camere kicel.

¹⁷Pien wun ingeunu be, i cen mere di bin cunye oko mito udo winyo kibut papa mere, bin oko dagi mine, pien likame en eko twero udo kare me swilaro, bed bala oudo ekok akoka kede pige wange pi mito udo winyo nono.

¹⁸Wun likame ibinunu i gikame twero mulere, i mac kame liel birbir, kede i colo kame cucucuc, kede i buko me yamo ager,

¹⁹kede i koko me agwara, kede i dwan kame redo kitek kame omio jo kame oudo tie winye okwao be kur med yamo kede gi.

²⁰Pien likame gin bin kikaruno kanyakino cik kame oudo komio be, “Akadi ka le moro kome omulo moru, miero didipo en kede kide paka to.”

²¹Ateteni, gikame Musa bin oneno oudo tie gi me lworo, omio Musa oko waco be, “Koma tie miel kede lworo.”

²²Do wun itiekunu bino i moru me Sion kede i bomba ka Rubanga kakuo, Yerusalem kame tie i malo, kede but imalaikan kame tot tot kalikame marere, kame ocokere kede kilel.

²³Wun ibinunu i cokere me kilel me idwe kao ka Rubanga, kame kowandiko nying gi i malo. Ibinunu but Rubanga ngat kame obedo ngangolkop me jo dedede, kede but tipere me jo kopoore kame kotieko mino obedo kakare bala kame poore.

²⁴Wun ibinunu but Yesu ngat kame rucakino jo kede Rubanga i isikan kanyen, kede ibinunu i remo kame kokikiro, kame yamo kop aber kalamo remo ka Abel.

²⁵Nenunu be iwinyunu kop me ngat kame tie yamo. Pien ka gin bin likame kitwero bwot i kare kame kidagi kede ngat kame oudo okwenyaro gi ki lobo kan, wan do obinunu bwot benyo ka odagunu ngat kame kwenyaro wa ki malo?

²⁶I kare nono bin dwane oyayango lobo, do en nataman ecikere be, “Tien ace bobo ango likame abino yayango lobo kenekene do abino yayango kiton malo da.”

²⁷Kop kame waco be, “Tien ace bobo,” nyuto kakaler be kobino kwanyo gikame oyayangun, magonogo en giacwea, tetekeny gi kalikame twero yangere ko bino dong.

²⁸Pi mano, bala kame wan otienu gamo kede ajakanut kalikame yangere, poore omiunu pwoc, di okounu mino Rubanga wor kame yomo cunye di omwolerenu, kede di otienu kede lworo,

²⁹pien Rubanga wa tie bala mac kame wango piny.