Read kumam Iburanian 13 Bible Online

Iburanian 13 - kumam bible

Iburanian 13

¹Meedenu bedo kede amara kenu kenu.

²Kur iwekunu gamo jokumbor i miere wu, pien pi timo kamanono omio jo mogo bin ogamo imalaikan i miere gi abongo ngeno.

³Yutununu jo kame tie i otkol, di ineno bala wuda itienu karacel kede gi i otkol. Yutununu jo kame kotie tisilaro, di ineno bala wuda kotie tisilaro wu.

⁴Jo dedede poore mino wor i nyom, doko kur tim me emuna bed tie i apien me jo konyomere; pien Rubanga bino ngolo kop ne jocaro kede joadote.

⁵Kur ibedunu kede amara atek i kom sente, do miunu gikame itienu kede rom wu, pien Rubanga owaco be, “Ango likame abino weki amoto jali.”

⁶Pi mano, wan okarununu yamo abongo lworo be, “Rubanga en ngakony na; ango likame abino bedo lwor. Nyo kame ngatamoro karuno timo na?”

⁷Yutununu jotel wu, jo kame bin owaco ne wu kop ka Rubanga; kong parunu i kom gikame epone me kuo gi okelo, di ikounu lubo epone me yei gin.

⁸Yesu Kirisito dong di cal acala, nyoro kede tin kede ikar kede ikar.

⁹Kur iyeunu pwony mogo apapat kame ikwianu rweny wu. Pien eber ka kisa ka Rubanga en kame omio cuny wa teko, do weko iswilia kame mako cam mogo, gi kalikame pwodi obedo kede kony moro but jo kame lubo gi.

¹⁰Wan otienu kede alutari kame jo kame timo tic i taberenakol likame tie kede twero me cam kiye.

¹¹Pien kom leini kame Ngatel Josaseredoti kelo remo gi Kabedo Kacil bala giayala pi dub, kowango gi ki tenge me kakame jo bedo iye.

¹²Iepone nono da Yesu da bin oneno can i ooko me bomba me wek elony jo kede remo mere.

¹³Pi mano, wada ootunu bute ooko kunono di okounu nywako kede en ayet kame en ekanyakino.

¹⁴Pien wan likame otienu kede bomba kame bedo nakanaka i lobo kan, do wan otienu mono bomba kame tie bino.

¹⁵Pi mano, omiunu Rubanga pak nakanaka bala giayala di obeunu kibut Yesu, manono tie bala anyakini me dog jo kame tuco nyinge.

¹⁶Kur wi wu wil kede timo bero, kede nywako jame kame itienu kede; pien giayala kame cal kamagonogi yomo cuny Rubanga.

¹⁷Winyunu jotel wu di ikounu jalere i loc gi, pien gin kigwoko cunyu bala jo kame bino tatamo i nyim Rubanga epone kame kitimo kede tic noni. Poore kitim manoni kede kilel do weko kede wangcuny, pien mano likame romo konyo wu.

¹⁸Legunu pirwa, pien wan ongeo kiber be ngec me cuny wa nyuto ne wa be, likame otie kede raco moro, doko cuny wa mito be otim gi dedede i yore aber.

¹⁹Ango akwao cunyu kitek pi timo kamanoni, tetekeny Rubanga susunyo dwoka butu.

²⁰Nan ango akwao Rubanga won mulem, ngat kame bin oyaruno Rwot wa Yesu ki to, en etie Ngakwat Adwong me romini pi remo mere kame moko isikan kame bedo nakanaka.

²¹Ango akwao Rubanga won mulem emi wu gi dedede kame beco, tetekeny itimunu gikame en emito. Akwae emi wa timo gikame yomo cunye, pi Yesu Kirisito, ngat kame deyo bed bute ikar kede ikar. Amen.

²²Imiegu kede amiegu na, ango akwao wu pi kanyakino winyo kope na kame supo cunyu, pien ango awandiko ne wu baluwa acecek.

²³Ango amito ingeunu be kotieko gonyo omin wa Temeseo. Ka en esusunyo bino, ango abino bino karacel kede en pi neno wu.

²⁴Motunu jotel wu kede jokacil dedede. Jo kowok ki Itali cwao ne wu amot.

²⁵Kisa ka Rubanga bed butu dedede. Amen.