Read kumam Iburanian 4 Bible Online

Iburanian 4 - kumam bible

Iburanian 4

¹Pi mano, bala kame cikere ka Rubanga pi donyo i wei mere pwodi tie meede kede, poore ogwokerenu tetekeny kur tuno iye loi ngatamoro kibutu.

²Pien wada otiekunu winyo Kop Aber bala gida; do kop kame gin kiwinyo likame oko konyo gi, pien likame gin kigame kede yei.

³Pien wan jo kame otiekunu yei, obinunu donyo i wei nono, bala kame Rubanga owaco be, “Bala kame bin akwongere kede wangcuny be, ‘Likame kibino donyo i wei na.’ ” En ewaco kaman bed bala tice mege bin otiek i kare kame ecweo kede piny.

⁴Pien karamoro i iwandik kacil waco kop i kom ceng me kanyaare be, “Di i ceng me kanyaare Rubanga oko wei ki tice mege dedede.”

⁵Doko i kanono da, ewaco be, “Likame kibino donyo i wei na.”

⁶Aso bala kame yongayo pwodi oyabere kede ne jo mogo pi donyo iye, kede da pi kite kame jo kame bin ogeo winyo kede Kop Aber likame oko twero donyo kede iye, pien gin kidagi yei kop nono,

⁷omio Rubanga bobo oko cibo ceng ace, en “Tin”. Ingei kare kalac en eko waco kope kame kotieko wandiko cen kano ki dog Daudi be, “Ka iwinyunu dwan Rubanga tin, kur ibedunu kede tekwic.”

⁸Pien ka koto oudo Yosua omio gi wei, koto Rubanga likame bobo oyamo i cen mere kop i kom ceng ace.

⁹Pi mano, bala kame etie kede, jo ka Rubanga pwodi odong di kitie kede wei me Ceng Sabato.

¹⁰Pien ngat kame donyo i wei ka Rubanga woraro ki tice mege bala kame Rubanga da owei kede ki tice mege.

¹¹Pi mano, otamakinunu kede teko dedede pi donyo i wei nono, tetekeny kur donyo iye loi ngatamoro pi bedo abongo wor bala bin gin.

¹²Ateteni kop ka Rubanga kuo doko etio kitek, en ebit kalamo epima kame bit tuni tuni. En ecobo paka tuno i apokini me cuny kede tipo, kede me kariamo me cogere kede isum, doko epoko par kede mit abeco kede areco me cuny jo.

¹³Doko likame tie giacwea moro kame okanere ki nyim Rubanga, do en eneno gi dedede di tie ilererei i nyime. En nono en kame miero wan dedede onyut tice wa i nyime.

¹⁴Pi mano, bala kame otienu kede Ngatel Josaseredoti kame dwong kalamo, en Yesu Wot ka Rubanga, kame otieko ot paka i nyim Rubanga, poore do omokunu kitek i kom yei wa kame otucunu.

¹⁵Pien likame wan otienu kede Ngatel Josaseredoti kalikame kisa twero mako i kom wa pi goro wa, do en etie ngat kame kotamo i yote dedede bala wada, do di likame en eko dubo.

¹⁶Pi mano, poore onyikunu iyapiyapi kede kom me kisa ka Rubanga kede nwangcuny, tetekeny etim ne wa mwol di okounu udo kisa kame bino konyo wa i kare kame emitere ne wa kede.