Read kumam Iburanian 5 Bible Online

Iburanian 5 - kumam bible

Iburanian 5

¹Ngatel Josaseredoti acelacel koyere kikom jo di oko kete timo tic akaka gin i nyim Rubanga, pi mino giamia kede giayala pi dub.

²Bala kame eda udo etie kede goro i nyim Rubanga, en etwero bedo kede mwolo but jo kame kwia piny kede kame tarasar.

³Pi manoni, en miero emi giayala pi dub mege kame make, karacel kede pi dub me jo da.

⁴Doko likame tie ngatamoro kame yerere kene pi bedo Ngatel Josaseredoti, do Rubanga en kame lwonge bala bin Aroni.

⁵Iepone acel nono da, Kirisito likame bin otingere kene pi bedo Ngatel Josaseredoti, do Rubanga en kame bin oyere, ngat kame bin owaco ne be, “In en Woda, tin ango adoko Papa ni.”

⁶En bobo ewaco i karamoro ace be, “In itie ngasaseredoti ikar kede ikar, kame tie ngaluny ka Melkisedeki i tic mere me ngasaseredoti.”

⁷I kare kame oudo ekuo kede kome i piny kan, Yesu olego kede dwan amalo kede pige wange, di ekwao Rubanga ngat kame oudo twero lake ki to. Rubanga oko winye pi mwolere mere bute.

⁸Bed bala en oudo ebedo Wot ka Rubanga, en epwonyere bedo ngat kame wor pi can kame ebeo iye.

⁹Kakame omie edoko kede ngat kame oudo en epoore pi bedo, en eko doko ngat kame alako kame bedo nakanaka ne jo dedede kame yei kop mere wok kibute,

¹⁰ingei Rubanga mine bedo Ngatel Josaseredoti kame tie ngaluny ka Melkisedeki i tic mere me ngasaseredoti.

¹¹Wan otie kede kope atot kame miero oyam i kom kop noni, do gonyo gi tek pien niang wun odoko titidi.

¹²Pien bed bala i kare kanataman oudo wun ipoorenu do bedo jopwony, do pwodi emitere ne wu pi ngatamoro mino wu pwony me agege me kop ka Rubanga. Pwodi emitere ne wun pi pito wu kede cak, do likame kede cam anwang.

¹³Pien ngat kame kuo kede cak udo en pwodi mukeru, doko eli kede ngec i kom gikaber kede gikarac.

¹⁴Do cam anwang tie pi jo kocato, jo kame tam gi otieko pwonyere di kiko nao poko gikaber kede gikarac.