Read kumam Iburanian 7 Bible Online

Iburanian 7 - kumam bible

Iburanian 7

¹Melkisedeki oudo obedo abaka me Salem, doko oudo etie ngasaseredoti ka Rubanga Ngamalo Twal. En bin eriamo kede Aburaam di tie dwogo ki yi kame ebwono kiye abakai, di eko mino Aburaam winyo.

²Aburaam di oko poko ne acel me tomon me jame dedede kame oudo ekelo ki yi. Me agege mere nying Melkisedeki dwong mere be “abaka kame timo gikame opoore”; doko da pi kite kame en oudo etie kede abaka me Salem, dwong me nyinge da bobo en “abaka kame kelo mulem.”

³Likame tie gimoro kame mio ngec i kom papa arabo toto amoto joakwari ka Melkisedeki; likame tie ngec moro i kom ceng me nywale arabo ceng me to mere, do en edong di etie ngasaseredoti ikar kede ikar, bala Wot ka Rubanga.

⁴Nenunu kite kame pire dwong kede. Aburaam kwaru wa me agege bin omie acel me tomon me jamini dedede kame bin ekelo ki yi.

⁵Doko ikwae ka Lebi kame obedo josaseredoti, Iswil ciko gi pi gamo acel me tomon kibut jo me Isirael, kame obedo imiegu kede amiegu gi, bed bala jo nogi da obedo ikwae ka Aburaam.

⁶Do Melkisedeki ngat kalikame oudo obedo akwar Lebi ogamo acel me tomon kibut Aburaam di en eko mino Aburaam winyo, ngat kame bin Rubanga omio cikere mere bute.

⁷Likame tie bobo piem moro i kom kop kame waco be, ngat kame pire dwong en kame mio ngat kame pire titidi winyo.

⁸Ki bad me Jolebi, jo ajoa kame to en kame gamo acel me tomon, do i me ka Melkisedeki, ngat kame kuo en kame gamo acel me tomon.

⁹Aso, koromo tero be, i kare kame bin Aburaam okwanyo kede acel me tomon, Lebi da, ngat kame gamo acel me tomon, bin oculo acel me tomon,

¹⁰pien oudo pwodi en etie i remo ka kwaru mere Aburaam, kakame Melkisedeki oriamo kede Aburaam.

¹¹Aso, ka josaseredoti me Jolebi bin otimo gi dedede kakare (pien bin komio jo me Isirael Iswil i wang tic gin), nyo ace kame oudo doko pwodi mitere pi ngasaseredoti ace apat bobo bedo tie, kame tie ngaluny ka Melkisedeki i tic mere me ngasaseredoti, do weko ngaluny me tic ka Aroni me ngasaseredoti?

¹²Pien ka alokaloka obedo tie i tic me josaseredoti, poore Iswil da bed tie kede alokaloka.

¹³Pien ngat kame kotie yamo kope nogi i kome obedo dano me ateker apat, kalikame pwodi tie ngatamoro kame owok kiye pi timo tic i alutari bala ngasaseredoti.

¹⁴Pien etie kakaler be Rwot wa owok kiye ateker ka Yuda, do Musa likame oyamo kop moro i kom ateker noni, kame makere kede kop me josaseredoti.

¹⁵Kop noni nan do medo ngere kiber. Ngasaseredoti ace apat kame cal bala Melkisedeki otieko bino.

¹⁶Likame en edoko ngasaseredoti di lubere kede ateker mere, bala kame iswil mito, do en edoko ngasaseredoti pi twer me kuo kame bedo nakanaka.

¹⁷Pien iwandik kacil waco kop i kome be, “In itie ngasaseredoti me ikar kede ikar, ngaluny ka Melkisedeki i tic mere me ngasaseredoti.”

¹⁸Pi mano, koweko cik kasek pien oudo egoro, doko kony mere oudo li;

¹⁹pien likame tie gimoro kame Iswil omio obedo kakare. Do nan komio wa gen aber, kame mio wa onyiko odoko iyapiyapi kede Rubanga.

²⁰Medo i wi mano, Rubanga bin okwongere i kome. Jo kame bin ogeo doko josaseredoti odonyo i wang tic gi abongo ikwong moro,

²¹do Rubanga okwongere i kom Yesu pi doko ngasaseredoti di ewaco be, “Rwot otieko kwongere doko likame ebino loko tam mere be, ‘In ibino bedo ngasaseredoti ikar kede ikar.’ ”

²²Manoni mio isikan kame Yesu obedo ngat kame moko kalamo kede bero.

²³Josaseredoti me agege oudo tot pien oudo to gengo gi meede kede tic gi nakanaka.

²⁴Do Yesu tie ngasaseredoti me ikar kede ikar, piento en ekuo nakanaka.

²⁵Pi mano, i kare dedede en etwero lako jo kame nyiko bedo iyapiyapi kede Rubanga di kibeo kibute, piento en ekuo nakanaka pi ngangao Rubanga pirgin.

²⁶Pien oudo etie gikame poore, pi wan bedo kede Ngatel Josaseredoti kacal kamanoni, en ebedo ngat kacil, kame li kede raco moro arabo dub moro, kame kopoko tenge kibut jodubo di oko tinge kotere malo.

²⁷En likame ecal bala Jotel Josaseredoti apat, pien likame emitere ne en pi mino giayala ceng dedede, me agege pi dub mege, kede da pi dub me jo. En bin emio giayala tien acel atwal, kakame emio kede kuo mere bala giayala.

²⁸Ateteni Iswil keto jo kame tie kede goro pi bedo Jotel Josaseredoti, do kope me kwongere ka Rubanga, gikame obino ingei bino me Iswil, oketo Wode pi bedo Ngatel Josaseredoti, en ngat kame komie ebedo ngat kame timo gi dedede kakare ikar kede ikar.