Read kumam Iburanian 9 Bible Online

Iburanian 9 - kumam bible

Iburanian 9

¹Aso, akadi isikan me agege da oudo tie kede iswilia mogo kame mako epone me woro Rubanga, doko da oudo etie kede kabedo kacil me wi lobo kan.

²Pien bin kogero taberenakol, manoni en kame tie i ooko, kame kolwongo be Kabedo Kacil. Oudo tie iye gi me cibo italan, emesa kede mugati kame komio Rubanga.

³Ingei egoe me are mere kame poko isenge, oudo tie iye taberenakol kame kolwongo be Kabedo Kacil Kalamo.

⁴Kanono oudo tie iye alutari kame kotimo kede saabu, me wango bubani kede da oudo tie iye Sanduku me Isikan, kame kome dedede oudo obedo saabu. I sanduku noni oudo tie iye jagi kame koketo iye emanu, ebela ka Aroni kame oudo olot, kede kide me isikan kame oudo kowandiko iye cik.

⁵Malo i wi sanduku nono oudo tie iye Cerubim[1] me deyo, kame oudo umo kabedo me kisa. Do wan nataman likame otwero tatamo kop i kom gi nogi i yore i yore.

⁶Manoni en epone kame bin koiko kede gi nogi. Bin josaseredoti donyo i taberenakol kame tie ooko ceng dedede pi timo tice gi,

⁷do Ngatel Josaseredoti en kame donyo i me are me yie tien acel mwaka. En etero iye remo kame eyalo ne Rubanga pire kede pi dub me jo.

⁸I gi nogi, Tipo Kacil nyuto kakaler be, pwodi likame koyabo yongayo kame donyo kabedo kacil, tek kame taberenakol me ooko pwodi tie cungo.

⁹Manoni en gikame oudo tie cal kame nyuto kare kanataman. Di lubere kede iik noni, giamia kede giayala kame komio but Rubanga, likame karuno temuno cuny ngat kame tie woro Rubanga,

¹⁰pien gin kimako kop i kom cam kede giamata, kede itok apapat me lonyere. Magi obedo iswilia kame makere kede kom, kame tie tic paka tuno i kare kame Rubanga bino timo kede alokaloka anyen.

¹¹Do nataman Kirisito otieko bino bala Ngatel Josaseredoti kame okelo bero kame wan otiekunu neno, en etieko beo ki taberenakol kame pire tek, kame tie kakare (kalikame kotimo kede cing, dwong mere be likame en ebedo giacwea me piny kan),

¹²di en eko donyo Kabedo Kacil Kalamo tien acel atwal. En likame etero iye remo me diegi kede me itobai, do en etero remo mere kikome, di eko kelo alako kame bedo nakanaka.

¹³Pien ka kikiro remo me diegi kede me twonin kede buru me atakito i kom jo komunaun, mio kom gi lonyere,

¹⁴remo ka Kirisito do bino lonyo cunyu ki tice kame kony gi li kalamo mano tien adi, tetekeny itimunu tic ne Rubanga kakuo, en ngat kame etieko mino kuo mere but Rubanga abongo pwokere moro pi Tipo kame bedo nakanaka!

¹⁵Pi mano, en ebedo ngat kame rucakino Rubanga kede jo i isikan kanyen, tetekeny jo kame Rubanga olwongo ud winyo kame bedo nakanaka kame en ecikere pi mino. Man twerere pien to otieko timere kame lako jo ki turo iswil kame oudo kitimo i kare me isikan kacon.

¹⁶Pien i kom kop kame mako iwandik kame nyuto epone me tic kede jame me ngat oto, mito ber kong mok be dano komio iwandik nono otieko to.

¹⁷Pien epone me iwandik nono geo tic ingei to, en likame etwero cako tic di pwodi ngat kowandiko en tie kuo.

¹⁸Pi mano, akadi isikan me agege da bin komoko kede remo.

¹⁹Pien bin kakame Musa otieko waco ne kede jo dedede cik me Iswil, en bin eko kwanyo remo me itobai kede me diegi, kede pii kede ausi akwar me yer kede yat kame cal bala emompir, di eko kikiro remo nono i kom itabu me Iswil kede i kom jo dedede,

²⁰di ewaco be, “Man en remo me isikan kame Rubanga ociko wu pi lubo.”

²¹Iepone acel nono da, en eko kikiro remo i kom taberenakol kede i kom jame dedede kame kotio kede i woro Rubanga.

²²Ateteni, bala kame Iswil mito, jame dedede kolonyo kede remo, doko sasiro dub likame timere abongo ony me remo.

²³Aso, jamini nogo kame obedo cal me jamini me malo, oudo miero lony gi iepone nono, do jamini me malo miero lony gi kede giayala kame beco kalamo magi.

²⁴Pien likame Kirisito otieko donyo i Kabedo Kacil kame cing dano en kotimo, kame obedo cal me maca me ateni, do en edonyo malo kikokome, kakame nataman etie iye i nyim Rubanga pirwa.

²⁵Likame en etie kuno pi yalere but Rubanga nakanaka, bala kame Ngatel Josaseredoti donyo kede Kabedo Kacil Kalamo mwaka acelacel kede remo kalikame obedo mere;

²⁶pien ka koto oudo tie kamanono, koto oudo ebedo neno can kare i kare cako ki agege me piny. Do bala kite kame etie kede, en etieko nyutere kicel atwal i kare noni me ajikini, pi yalere tetekeny ekwany dub.

²⁷Doko bala kame kotieko iiko ne kede jo pi to kicel atwal, di do ngolo kop ko lubo,

²⁸kamanono da, ingei yalo Kirisito kicel pi kwanyo dub me jo atot, en ebino bobo neeno tien me are, likame pi kop kame mako dub, do pi lako jo kame tie kure kede imue.