Read kumam Yakobo 1 Bible Online

Yakobo 1 - kumam bible

Yakobo 1

¹Baluwa kowok kibut Yakobo ngatic ka Rubanga kede me ka Yesu Kirisito. But atekerin tomon kiwie are kame osarakin obukui. Amoto wu.

²Imiegu kede amiegu na, ka ibeunu i atama moroni, terenu bala gi me kilel,

³pien wun ingeunu be atama i kom yei wu kelo ne wu ikanyakin.

⁴Doko wek ikanyakin wu cob tic mere kakare, me wek ibedunu jo kame tie kede iponeso kocato atwal, di likame iremunu kede gimoro.

⁵Ka ngatamoro kibutu li kede rieko, poore ekwai Rubanga ngat kame mio jo dedede kede cunye lung abongo ingungur, di oko bino mine.

⁶Do poore ekwai kede yei abongo gungcuny, pien dano kame tie kede gungcuny cal bala ebuka me nam kame yamo buko di tero tuni kede tuca.

⁷Pien dano kame cunye gung, dano kame tie kede tam are di etagere i gi dedede kame etimo, kur egen be ebino udo gimoro kibut Rwot.

⁹Wek ngakirisito ngacan wakere kame kotinge malo,

¹⁰doko wek ngabar da wakere kame kodwoke piny, pien ngat kobaro bino rwenyo wir bala ature me lum.

¹¹Pien ceng wok di eko rieny kede lieto mere atek di eko nero lum, ature mere ko ony piny, di cilo mere ko rwenyo, kamanono da, ngat kobaro bino rwenyo wir i gikame etie wapo yore.

¹²Etie kede winyo dano kame kanyakino atama, pien kame ebwono atama, Rubanga bino mine giamia me pwoc, en kuo kame bedo nakanaka kame en ecikere pi mino jo kame mare.

¹³Ka ngatamoro obedo kede aomacuny, kur ewac be, “Rubanga en kame tie mina aomacuny”; pien likame gikarac karuno mino Rubanga aomacuny, doko eda kikome likame emio ngatamoro aomacuny.

¹⁴Do dano acelacel bedo kede aomacuny kame mit mege owao cunye.

¹⁵Di do kame mit me cuny ocato, en eko nywalo dub, kede ka dub da ocato en eko do kelo to.

¹⁶Imiegu kede amiegu na kame amaro, kur iyeunu ngalu.

¹⁷Gi dedede abeco kame komio wa, kede giamia dedede kopoore, wok ki malo kibut Papa won lero, ngat kalikame tie kede alokaloka arabo colo moro kame timere pi lokere mere.

¹⁸Pi cobo iik mere, en eko mino kop mere me ateni okelo wa i kuo, me wek wan obed bala anyakini me agege me giacwea mege.

¹⁹Imiegu kede amiegu na kame amaro, poore dano acelacel bed ngat kame bunyo winyo kop, do weko kame bunyo yamo amoto kame bunyo doko ger.

²⁰Pien gero me dano likame kelo gikame opoore kame Rubanga mito.

²¹Pi mano, gonyunu tenge tim me emuna kede tim areco kame nataman otany i diere wu, di ikounu gamo kede mwolo kop ka Rubanga kame koketo i cunyu, en kop kame karuno lako wu.

²²Do bedunu jo kame keto kop kame kiwinyo i tic, likame jo kame winyo awinya di kiko ngalere ken gi.

²³Pien ka ngatamoro obedo dano kame winyo kop awinya di likame eko keto i tic, en ecal bala dano kame neno cal mere i ilabura;

²⁴piento en eneno cal mere eko ot tenge di wie ko wil i kom cal mere.

²⁵Do dano kame ngico iswil kame tie kakare, iswil kame gonyo jo, di eko meede iye nakanaka, di likame eko bedo ngat kame winyo awinya kop di wie ko wil iye, do ngat kame keto kop i tic, kobino mine winyo i gikame etie timo.

²⁶Ka ngatamoro paro be en ebedo dano me edini, di likame eko tweno lebe, do di engalere kene i cunye, edini mere udo kony mere li.

²⁷Edini kacil, kalikame opwokere i nyim Rubanga Papa en ine: konyo idwe kic kede apuserun ki can gi, kede gwokere keni weko mino piny dubi.