Read kumam Yakobo 3 Bible Online

Yakobo 3 - kumam bible

Yakobo 3

¹Imiegu kede amiegu na, kur jo atot kibutu dok jopwony, pien wun ingeunu be, wan jopwony kobino ngolo ne wa kop odocon kalamo jo icegun.

²Pien wan dedede ocetar, do ka tie ngat kalikame cetar i yamo mere, udo en etie dano aber kame da twero gwoko kome lung.

³Ka wan oketo mwola moro atitidi i dog asigiran tetekeny kikaruno timo gikame wan omito, wan okarununu do wiro kom gin lung ot tetu kakame wan omitunu.

⁴Ber kong nenunu emeri da: akadi bed bala en edwong twatwal doko emito yamo atek en kame kole, do ngakwang karuno wire kede tunge atitidi di eko ot kakame ngakwang mito.

⁵Aso, etie kamanono kede leb dano da, en etie dul moro atitidi do ewakere pi jamini adongodongo. Nenunu epone kame mac moro atitidi wango kede twon itela!

⁶Leb dano da cal bala mac. En ecal bala piny arac kame tie adul me kom wa, en epwoko kom wa lung, ecwinyo kuo wa lung kede mac kame wok ki mac kalikame to.

⁷Pien dano twero pugo egere me leini kede me winy dedede, kede jamini aliao alia, kede jamini abedo i pii, doko etie pugo gi da.

⁸Do likame tie dano moro kame twero pugo lebe. Leb dano obedo gimoro arac kalikame pugere, epong kede kwir kame kelo to.

⁹Wan otio kede leb wa pi pwono Rwot Papa wa, do doko otio kede da me lamo jo kame Rubanga ocweo i cal mere.

¹⁰Ilam kede winyo wok ki dog acel nono. Imiegu kede amiegu na, likame epoore bedo kamanoni.

¹¹Iparunu be wang atan acel twero molo pii aber kede pii arac?

¹²Imiegu kede amiegu na, benyo, iparunu be yat epigi karuno nyako olibeti, arabo olok karuno nyako epigi? Kamanono da atan kame molo pii arac likame twero molo pii aber.

¹³Ngai kibutu en kame riek doko di etie kede niang? Ka tie ngat kame riek, poore kuo mere aber nyut tice mege kame etimo kede cuny me mwolere kame wok ki rieko mere.

¹⁴Do ka itienu kede twon nyeko kede di iparunu pi kuo wu kenekene, kur iwakerenu ikounu bedo kede angalo i kom kop me ateni.

¹⁵Epone me rieko noni likame wok ki malo do ebedo rieko me lobo kan, weko kame Tipo mio, do kame wok kibut Sitani.

¹⁶Pien kakame nyeko kede cuny kame dano paro kede pire kene tie iye, kanono da atotolun kede tim dedede me ikiteso areco tie iye.

¹⁷Do me agege, rieko kame wok ki malo cil, doko da ekelo mulem, ebedo mot, egamo tam, etie kede cuny me kisa kede anyakini me tice kabeco, eli kede apokapoka amoto ecuke akadi atitidi moro.

¹⁸Kame jo kame kelo mulem ocuo kodi me mulem, gin kibino udo anyakini me kite kopoore.