Read kumam Yakobo 4 Bible Online

Yakobo 4 - kumam bible

Yakobo 4

¹Nyo kame kelo yi kede lok i diere wu? Mam ebedo mit me kom kame tie atwomutwomun i adulion me komu?

²Wun imitunu gimoro do likame ikounu ude, di do ikounu timo nek. Doko iparunu jame me jo apat do likame itwerunu udo gi, di do ikounu cako lok kede yi. Iliunu kede gikame imitunu pien likame ikwaunu.

³Ikwaunu di likame ikounu udo pien ikwaunu i yore arac, ikwaunu gi pi tic kede gi me yomo cunyu kenu.

⁴Wun jo kalikame genere! Benyo, likame ingeunu be bedo awotin kede piny en bedo ading kede Rubanga? Pi mano, ngat kame mito bedo awotin kede piny udo edoko ngading ka Rubanga.

⁵Arabo iparunu be iwandik kacil obedo kop me nono, kame waco be, “Rubanga tie kuro kede nyeko tipo kame en eketo i kuo wa.”[1]

⁶Do Rubanga mio wan kisa kame kalamo; bala kame iwandik kacil waco kede be, “Rubanga dagi tam me jo kame wakere, do emio jo kame mwolere kisa mere.”

⁷Pi mano, jalerenu but Rubanga. Dagunu tam ka Sitani di en eko bino ringo tenge kibutu.

⁸Nyikunu iyapiyapi kede Rubanga di eda eko bino nyikini iyapiyapi kede wu. Lonyunu cingu wun jodubo, di ikounu mino cunyu bed di cil wun jo kame tam wu okakarun.

⁹Bedunu kede cwercuny, di itururunu kede di ikokunu. Wek nyero wu lokere dok iturur, kede kilel wu da lokere dok ibutur.

¹⁰Mwolerenu i nyim Rwot di en eko bino tingo wu malo.

¹¹Imiegu kede amiegu na, kur iyamunu kop arac i kom jowot wu. Ngat kame yamo kop arac i kom ngawote, arabo ngolo ne kop, udo ewaco kop arac i kom iswil, doko da udo engolo kop ne iswil. Aso ka in ingolo kop ne iswil, udo do in itie ngat kalikame lubo iswil, do udo in do ngangolkop.

¹²Ngat kame mio iswil kede ngangolkop tie acel kenekene, en ngat kame twero lako kede neko. Do in ibedo ngai komio ingolo kop ne dano wadu?

¹³Winyunu kong ber, wun jo kame iwacunu be, “Tin amoto diki obino ot i bomba acal kaman, di oko bino tieko mwaka kuno di osubulo, oko bino udo sente,”

¹⁴do di likame ingeunu kop me diki. Kuo wu en nyo? Wun kom icalunu bala ekuna kame neeno pi esawa atitidi di eko rwenyo wir.

¹⁵Do akaka manono, ipoorenu waco be, “Ka Rubanga oyei, wan obino bedo kuo di oko bino timo gini amoto gica.”

¹⁶Do bala kite kame etie timere kede, wun iwakerenu pi tingere wu, ewaka acal kamanono kom rac.

¹⁷Pi mano, ngat kame ngeo gikaber kame poore atima do di likame en eko timo, udo edubo.