Read kumam 1 Petero 4 Bible Online

1 Petero 4 - kumam bible

1 Petero 4

¹Bala kame Kirisito oneno kede can, wuda bedunu kede tam kame cal kamanono, pien ngat kame kome neno can udo ejiko timo dub,

²me wek itiekunu kare me kuo wu kame odong i wi lobo kan di likame bobo ilubunu mit me kom, do di ilubunu mit ka Rubanga.

³Wun itiekunu tero kare kame romo i timo gikame jo kalikame Iyudayan cuny gi mito timo. Oudo itimunu tim me caro, cobo mit me kom, amera, bedo i ebaga me yomcuny arac, bedo i akiba me amata, kede woro cal jwogi.

⁴Gin kitie kede ur pi neno be likame nan bobo wun iriberenu kede gi i tim otany me ekite me kuo arac, omio gin kiyeyeto wu.

⁵Do gin kibino tuco i nyim ngat kame otieko iikere pi ngolo kop ne jo kame kuo kede jo oto pinyo komio kitimo kamanono.

⁶Manoni en komio bin kotuco ne jo oto da ejiri, tetekeny akadi bed bala bin kongolo ne gi kop di oudo kitie kede kuo me kom bala jo dedede, wek kikaruno bedo bala Rubanga i kuo gi me tipo.

⁷Ajikini me gi dedede do iyapiyapi; pi mano, bedunu di igwokunu tam wu kede di wi wu tio, tetekeny ikarununu lego.

⁸Do akato mere, bedunu kede amara atek kenu kenu, pien amara umo dub atot.

⁹Bedunu jo kame gamo jo icegun i miere wu abongo ingungur.

¹⁰Bala kame ngat acelacel otieko udo kede giamia ka Rubanga, tiunu kede gi pi bero me jo dedede, bala jo kame tie gwoko kiber giamia apapat kame Rubanga mio.

¹¹Ngat kame yamo, eyam bala dano kame yamo kop ka Rubanga; ngat kame mio kony, emi bala ngat kame konyo kede teko kame Rubanga mio, tetekeny mi Rubanga deyo i gi dedede pi Yesu Kirisito. Deyo kede twer bed but Yesu Kirisito ikar kede ikar. Amen.

¹²Jo na kame amaro, kur ibedunu kede ur pi can alit kame poto i komu pi tamo wu, ineno do bala gimoro kalikame ngere en kame tie timere ne wu.

¹³Do lelunu kame itienu nywako can ka Kirisito, me wek bobo ibin ilelunu di itienu kede yomcuny i kare kame kobino nyuto kede deyo mere.

¹⁴Ka koronkino wu pi nying Kirisito, udo itienu kede winyo, pien udo Tipo me deyo, kame obedo Tipo ka Rubanga tie kede wu.

¹⁵Kur ngatamoro kikom wu nen can pi nek, arabo pi kuwo, arabo pi timo gimoro arac, amoto pi donyo i kop kalikame make.

¹⁶Do ka ngatamoro neno can pien ebedo ngakirisito, kur lewic make, do poore emi Rubanga deyo pi jo cako ne nying nono.

¹⁷Pien kare otieko tuno me ngolo kop, kobino cako kede jo me ot ka Rubanga. Ka etie gere kede wan, nyo kame do bino bedo ajikini me jo kame odagi lubo ejiri ka Rubanga?

¹⁸Bala kame kowandiko be, “Ka udo alako tek ne jo kopoore; nyo do kame bino timere ne jo kalikame paro pi Rubanga kede jodubo?”

¹⁹Pi mano, jo kame neno can di lubere kede mit ka Rubanga poore meede timo gikaber di kimio kuo gi i cing Ngacwec, ngat kame genere.