Read kumam 2 Petero 1 Bible Online

2 Petero 1 - kumam bible

2 Petero 1

¹Baluwa kowok kibut Simoni Petero, ngat kame obedo ngatic kede ngaor ka Yesu Kirisito. But jo kotieko udo yei arom aroma kede merwa pi poore ka Rubanga wa en Ngalak wa Yesu Kirisito.

²Ango akwao be, Rubanga med ne wu kisa kede mulem mere pi ngec kame itienu kede i kome kede i kom Rwot wa Yesu Kirisito.

³Rubanga i twer mere otieko mino wa gi dedede kame wan omito pi bedo kede kuo, kede pi bedo jo kame wore, pien wan otie kede ngec i kome, en ngat kame elwongo wa i deyo kede i bero mere.

⁴Pi deyo kede bero mere, en emio wa cikere me wel amalo kame pirgi tek, me wek ikarununu bwot ki dubere kame tie i piny pi mit arac me kom, di ikounu doko jo kame nywako kite me kuo ka Rubanga.

⁵Pi kop acel noni, tamakinunu medo bero i kom yei wu, di ikounu medo ngec i kom bero wu,

⁶ikounu medo dino mit me kom i kom ngec wu, ikounu medo dino cuny i kom dino mit me kom, ikounu medo cuny me woro Rubanga i kom dino cuny,

⁷ikounu medo amara pi imiegu kede amiegu i kom cuny me woro Rubanga, kede ikounu medo amara pi jo dedede i kom amara me imiegu kede amiegu.

⁸Pien kame itienu kede gigi dedede, di kitie nyai i kuo wu, kibino gengo wu bedo abongo teko, arabo bedo jo kame li kede kony moro i kom kop kame mako ngeno Rwot wa Yesu Kirisito.

⁹Pien ngat kame li kede gi nogi wange neno kakacecek, doko udo wange oto, udo wie otieko wil be oudo kotieko lonye ki dub mege me kare kokato.

¹⁰Pi mano, imiegu kede amiegu na, meedenu bedo kede mit me moko lwongo kede ayera wu, pien ka itimunu kamanoni likame ibinunu agetar.

¹¹Manoni bino mino koyabo ne wu odocon yongayo kame donyo i Ajakanut kame bedo nakanaka, en Ajakanut ka Rwot Ngalak wa Yesu Kirisito.

¹²Pi mano, ango amito bedo di apoo wi wu nakanaka i kom gi nogi, akadi bed bala ingeunu gi, doko di itiekunu asipakin kitek i kop me ateni kame kokelo ne wu.

¹³Ango aparo be eber nango poono wi wu, tek di ango pwodi atie akuo i piny kan;

¹⁴pien ango angeo be kare me to na do oyapuno tuno bala kame Rwot wa Yesu Kirisito otieko mina ngeno kede.

¹⁵Ango abino tamakino neno be ibinunu karuno yutuno gigi esawa moroni kenekene ingei to na.

¹⁶Bin wan likame otio kede itatam kame dano oteto kede rieko me wie pi mino wu ngeno dwogo ka Rwot Yesu Kirisito kede twer, do wan oneno dwongo mere kede wang wa.

¹⁷Pien kakame eudo kede wor kede deyo kibut Rubanga Papa, dwan oko winyere kame owok kibut won Deyo Adwong di waco be, “Man en Woda kame amaro, cunya yom i kome.”

¹⁸Wan ikom wa owinyo dwan noni di wok ki malo, pien wan oudo otie kede en i wi moru kacil.

¹⁹Manoni oko do moko odocon kop kame bin inabin owaco. Ebino bedo ber ka iketunu tam wu i kom kop noni, pien ecal bala etala kame liel i kakacol, tuno kame piny oru di acer me odiko oko caro cunyu.

²⁰Me agege mere, ipoorenu niang be, likame tie kop moro me imurai kame enabi owaco i iwandik kacil kame dano moro twero gonyo dwong mere en kene;

²¹pien likame tie imurai me enabi moro kame otieko bino pi mit ka dano, do jo oudo yamo kop ka Rubanga pi twer me Tipo Kacil.