Read kumam 2 Petero 3 Bible Online

2 Petero 3 - kumam bible

2 Petero 3

¹Jo na kame amaro, man nan do en baluwa me are kame atie wandiko butu. I baluwan nogi dedede, ango abedo tamakino supo cunyu di apoo wi wu be,

²poore iyutununu kope kame inabin kacil riki owaco sek, kede da ipoorenu yutuno cik ka Rwot Ngalak wa, en cik kowok kibut joor.

³Me agege mere, miero iniangunu be, i kare me ajikini jo acae oyaro bino di kicaare, di kilubo mit me kom gi,

⁴di kiwaco be, “Ani bo dwogo mere kame riki kocikere pire? Pien geno anakacene, joakwari wa otieko to, do gi dedede tie meede ameda bala kame oudo kitie kede cako cweno piny!”

⁵Gin kipelakino bedo kede acae i kom kop kame waco be, riki sek kop kame Rubanga owaco en kame omio malo kede lobo ocwere. Kocweo lobo wok ki pii kede pii.

⁶Doko da pii en kame bin omwonyo piny kame oudo tie i kare nono, di oko tieke.

⁷Do kop acel nono en kame nan tie gwoko malo kede lobo kame nan tie nogi pi kuro mac. Kotie gwoko gi paka tuno i ceng me ngolo kop, en ceng kame kobino dudubo kede jo kalikame woro Rubanga.

⁸Jo na kame amaro, kur icaunu kop acel noni be, kibut Rwot, ceng acel rom aroma kede mwakini tutumia acel, doko da mwakini tutumia acel rom aroma kede ceng acel.

⁹Rwot likame ogal kede cobo cikere mere bala kite kame jo mogo tamo kede, do en etie pwodi dire piru, pien likame emito be ngatamoro toi, do emito be jo dedede swilaro.

¹⁰Do Ceng ka Rwot oyaro bino bala ngakuwo, di malo ko bino rwenyo kede mor adwong, di mac ko bino calaro jamini kame tie iye, di do lobo kede tice kame tie iye ko bino wang dopodop.

¹¹Bala kame kobino tieko kede jamini nogi iepone noni, wun do miero ibedunu jo acal nadi? Miero ibedunu kede kuo kacil me woro Rubanga,

¹²di ikurunu Ceng ka Rubanga; doko di iketunu cunyu iye me wek esusunyo tuno. Ceng nono en kame malo bino liel kede di eko dudubun, jamini kame tie iye ko bino acalar i mac.

¹³Do bala kame en ecikere kede, wan otienu kuro malo kede lobo anyen kame kuo me poore tie iye.

¹⁴Pi mano, jo na kame amaro, bala kame itienu daro kede gi nogi, ketunu cunyu i kom gi, me wek ud wu di itienu i mulem abongo kakocukukao arabo kakopwokere.

¹⁵Doko terunu dire ka Rwot wa bala alako wu. Omin wa me amara Paulo da owandiko baluwa butu pi rieko kame komie,

¹⁶di eda eyamo kop acel noni bala kame etimo i baluwan mege dedede. Tie gimogo i baluwan nogo kame niang tek, kame jo kame kwia piny kede jo kame yei gi yagayaga dwadwanyo di ko kelo ne gi rwenyo, bala kame kitimo kede i iwandik kacil ace.

¹⁷Pi mano, wun jo na kame amaro, bala kame itiekunu cako ngeno kede man sek, gwokerenu kur acetar me jo kalikame woro iswil rweny wu, di kiko mino wu ipotunu ki kakame nataman icungunu iye kitek.

¹⁸Do meedenu dongo i kisa kede i ngec ka Rwot, ngat kame obedo Ngalak wa Yesu Kirisito. Deyo bed bute nan kede ikar kede ikar. Amen.