Read kumam 1 Yokana 2 Bible Online

1 Yokana 2 - kumam bible

1 Yokana 2

¹Idwe na, ango atie wandiko ne wu kope nogi tetekeny kur ipotunu i dub. Do ka ngatamoro odubo, wan otienu kede ngat kame pido pirwa i nyim Papa, en Yesu Kirisito ngat kopoore.

²En ebedo giayala kame kwanyo dub wa, do likame dub wan kenekene, do da dub me jo dedede.

³Ka wan olubunu cik ka Rubanga, udo wan oniangunu kiber be wan ongeunu en.

⁴Ngat kame waco be, “Ango atieko ngene,” do di likame elubo cik mege, udo en enga angalo, doko udo eli kede ateni.

⁵Do ngat kame lubo kop mere, ateteni udo amara mere i kom Rubanga otieko tuno kakare. Epone kame wan ongeunu kede be wan oriberenu kede en ine:

⁶ngat kame waco be, “Ango atie i en,” poore ebed iepone kame en oudo ebedo kede.

⁷Jo na kame amaro, ango likame atie wandiko ne wu cik kanyen, do cik acon kame oudo wun itienu kede cako ki agege. Cik acon nono en kop kame wun itiekunu winyo.

⁸Akadi kamanono da, ango atie wandiko ne wu cik kanyen kame ateni mere neeno kibut Kirisito kede kibut wuda, pien colo tie awaar doko lero me ateni tie do rieny.

⁹Ngat kame waco be en etie i lero do di edagi omin mere amoto amin mere udo pwodi etie i colo.

¹⁰Ngat kame maro omin mere amoto amin mere udo etie i lero, doko likame udo etie kede gimoro kame mio jo poto i dub.

¹¹Do ngat kame dagi omin mere amoto amin mere udo etie i colo, en eoto i kakacol, doko likame engeo kakame etie lubo, pien udo colo oumo wange.

¹²Idwe na, ango atie wandiko manoni butu, pien kotieko sasiro dub wu pi Kirisito.

¹³Atie wandiko manoni butun joapapi, pien wun ingeunu en ngat kame oudo etie cako ki agege. Atie wandiko man butu, wun jo atino pien itiekunu lono Ngarac.

¹⁴Idwe na, atie wandiko manoni butu pien wun ingeunu Papa. Atie wandiko manoni butun joapapi, pien wun ingeunu en ngat kame ebedo tie cako i agege. Atie wandiko ne wun jo atino pien wun itekunu, doko kop ka Rubanga tie i cunyu, doko itiekunu lono Ngarac.

¹⁵Kur imarunu piny amoto jamini kame tie i piny. Ka imarunu piny udo likame imarunu Papa.

¹⁶Pien gi dedede kame tie i piny: mit me kom, mit me wang, ewaka me abar, likame wok kibut Papa, do gin kiwok ki piny kan.

¹⁷Piny kede gikame jo mito kiye tie jik, do jo kame timo gikame Rubanga mito bino bedo ikar kede ikar.

¹⁸Idwe na, ajikini otieko do tuno. Bala kame itiekunu winyo kede be Ngakwor ka Kirisito tie bino, nan do jokwor ka Kirisito otieko bino. Manoni mio wa ongeunu be kare me ajikini do otieko tuno.

¹⁹Jo nogo oyai tenge kibut wan, oudo likame gin kibedo jo wa; pien ka koto oudo gin kibedo jo wa, koto oudo kidong but wa. Do yai gi onyuto kakaler be likame tie ngatamoro kikom gi kame obedo dano wa.

²⁰Do Ngat Kacil otieko wiro wu kede Tipo Kacil, omio wun dedede itienu kede ngec.

²¹Ango awandiko man butu, likame pien wun ikwianu ateni, do pien wun ingeunu ateni, doko ingeunu be likame tie angalo moro kame wok ki ateni.

²²Ngai en kame ngaangalo? Mam en ngat kame dagi be Yesu en Kirisito? Manoni en Ngakwor ka Kirisito, ngat kame dagi Papa kede Wode.

²³Likame tie ngatamoro kame dagi Wod di en eko mito Papa; jo dedede kame yei Wod mito Papa da.

²⁴Wek gikame ibedunu winyo anakacene dong i cunyu. Ka gikame genere anakacene odong i cunyu, ibinunu bedo di itienu kede kuo i Wod kede i Papa.

²⁵Gikame en ecikere pi mino wa en kuo kame bedo nakanaka.

²⁶Ango awandiko ne wu kop nogi i kom jo kame mito ngangalo wu.

²⁷Do wun Tipo kame Kirisito omio wu tie i kuo wu, omio likame bobo emitere ne ngatamoro pi pwonyo wu. Pien Tipo mere pwonyo wun i kom gi dedede, gikame tie me ateni do weko me angalo. Bala kame en etieko pwonyo wu kede, bedunu i Kirisito.

²⁸Aso nataman, idwe na, bedunu i en, tetekeny kame en eneeno, wan obedunu kede nwangcuny di likame lewic ko bino mako wa i nyime i Ceng me dwogo mere.

²⁹Ka ingeunu be Kirisito opoore, udo ingeunu da be jo dedede kame timo gikame opoore obedo idwe ka Rubanga.