Read kumam 1 Yokana 3 Bible Online

1 Yokana 3 - kumam bible

1 Yokana 3

¹Nenunu ber epone kame Papa maro wa kede, manoni en komio kolwongo wa be idwe ka Rubanga; doko da ateteni wan idwe mege. Piny likame ngeo wa pien ekwie.

²Jo na kame amaro, wan nan otienu idwe ka Rubanga, do likame pwodi ngere epone kame wan oyarunu bedo cal kede. Gikame wan ongeo kenekene en ine be, kame Kirisito oneeno, wan obinunu nene i ekite kame en etie kede kikokome.

³Jo dedede kame tie kede gen noni i kom Kirisito lonyere ken gi, bala kame en ecil kede.

⁴Jo dedede kame dubo udo tie kede raco me turo iswil, pien dub en turo iswil.

⁵Wun ingeunu be bin en eneeno pi kwanyo dub, do en eli kede dub moro i kome.

⁶Likame tie ngatamoro kame tie i en kame dubo; likame tie ngatamoro kame dubo kame otieko nene, amoto kame ngeo en.

⁷Idwe na, kur iyeunu ne ngatamoro ngalo wu. Jo dedede kame timo gikame opoore obedo da jo kopoore bala kame en epoore kede.

⁸Jo dedede kame dubo obedo idwe ka Sitani; pien Sitani obedo timo dub cako ki agege. Kop komio Wot ka dano oneeno en pi dudubo tice ka Sitani.

⁹Jo kame obedo idwe ka Rubanga likame dubo, pien kitie kede ekite me kuo mere. Likame gin kidubo pien kibedo idwe ka Rubanga.

¹⁰Idwe ka Rubanga kede idwe ka Sitani nyutere iepone kacal kaman: jo dedede kalikame timo gikame opoore, amoto kalikame maro imiegu kede amiegu gi, likame obedo idwe ka Rubanga.

¹¹Pien kop kame wun iwinyunu cako ki agege en ine be, opoorenu marere wan kenwa kenwa.

¹²Miero wan kur obedunu bala Kain ngat kame bin obedo atin me Ngarac, di en eko neko omin mere. Pinyo komio bin en eneko omin mere? Pien tice mege oudo reco do tice ka omin mere oudo opoore.

¹³Imiegu kede amiegu na, kur ibedunu kede ur be pien piny dagi wu.

¹⁴Wan ongeunu be wan otiekunu yai ki to di okounu dokaro i kuo, pien wan omarerenu wan kenwa kenwa. Ngat kalikame tie kede amara udo etie i twer me to.

¹⁵Jo dedede kame dagi imiegu kede amiegu gi obedo jonek, doko da wun ingeunu be jonek likame tie kede kuo kame bedo nakanaka i kuo gi.

¹⁶Epone kame wan ongeo kede amara en ine: Kirisito ojalo kuo mere pirwa. Pi mano, poore wada ojalunu kuo wa pirwa kenwa kenwa.

¹⁷Ka ngatamoro tie kede jame me piny kan di en eko dagi konyo amin mere amoto omin mere kame tie kede rem me gimoro, benyo benyo kame etwero waco kede be en emaro Rubanga?

¹⁸Idwe na, obedunu kede amara, likame i kop amoto i yamo kenekene, do i ateni kede i tic.

¹⁹Manoni bino mino wan ongeunu be wan obedunu jo me ateni, di okounu bino jingo cuny wa i nyim Rubanga

²⁰akadi di ngec me cuny wa waco be orecunu; pien Rubanga dwong kalamo ngec me cuny wa, doko engeo gi dedede.

²¹Jo na kame amaro, ka ngec me cuny wa likame waco be orecunu, emio wan obedunu kede nwangcuny i nyim Rubanga.

²²Manoni mio wan oudunu gi dedede kame wan okwaunu kibute, pien wan olubunu cik mege doko otimunu gikame yomo cunye.

²³Cik mere en ine be, wan poore oyeunu nying Wode Yesu Kirisito di okounu marere wan kenwa kenwa, bala kame en eciko wa kede.

²⁴Jo dedede kame lubo cik mege bedo i en kede eda etie i kuo gi. Doko pi Tipo kame en emio wa, wan ongeo be en etie i kuo wa.