Read kumam 1 Yokana 4 Bible Online

1 Yokana 4 - kumam bible

1 Yokana 4

¹Jo na kame amaro, kur iyeunu jo dedede kame waco be kitie kede Tipo ka Rubanga, do tamunu gin dedede pi niang kame tipo kame kitie kede wok kibut Rubanga, pien inabin atot me angalo otieko sarakin i piny.

²Epone kame ibinunu ngeno kede Tipo ka Rubanga en ine: tipo kame waco be Yesu Kirisito obino bala dano, udo Tipo nono owok kibut Rubanga,

³do tipo dedede kalikame tuco nying Kirisito likame owok kibut Rubanga. Manono en tipo ka Ngakwor ka Kirisito, kame oudo wun iwinyunu be tie bino, doko nan etieko tuno i piny da.

⁴Idwe na, wun ibedunu me ka Rubanga, doko itiekunu bwono inabin me angalo, pien ngat kame tie i kuo wu tie kede twer adwong kalamo ngat kame tie i piny.

⁵Inabin me angalo nogo owok ki piny kan, pi mano, gin kiyamo kope kame mako piny kan, di jo me piny da ko winyo gi.

⁶Wan owokunu kibut Rubanga. Jo dedede kame ngeo Rubanga winyo kope wa, do jo dedede kalikame owok kibut Rubanga likame winyo kope wa. Manoni en epone kame wan ongeo kede Tipo me ateni kede tipo me angalo.

⁷Jo na kame amaro, omarerenu kenwa kenwa, pien amara wok kibut Rubanga. Ngat kame nyuto amara udo obedo atin ka Rubanga doko udo engeo Rubanga.

⁸Ngat kalikame nyuto amara likame obedo atin ka Rubanga, pien Rubanga en amara.

⁹Rubanga onyuto amara mere but wa iepone kame cal kaman: en ecwao Wode acel kenekene i piny tetekeny wan obedunu kede kuo pi en.

¹⁰Amara en ine: likame be wan omarunu Rubanga, do be en emaro wa di eko cwano Wode pi bedo giayala kame kwanyo dub wa.

¹¹Jo na kame amaro, bala kame Rubanga omaro wa kede kitek, wada poore omarerenu kenwa kenwa.

¹²Likame pwodi tie ngatamoro kotieko neno Rubanga, do ka wan omarerenu kenwa kenwa, Rubanga bedo i kuo wa, doko amara mere ko tuno kakare kibut wa.

¹³Manoni en epone kame wan ongeunu kede be wan otienu i en doko eda etie i kuo wa, piento en etieko mino wa Tipo mere.

¹⁴Wan otiekunu neno, doko omiunu ijura be Papa otieko cwano Wode bala Ngalak me piny.

¹⁵Ngat kame tuco be Yesu en Wot ka Rubanga, Rubanga bedo i kuo mere doko eda ekuo i Rubanga.

¹⁶Aso wan otiekunu ngeno doko oyeunu amara kame Rubanga tie kede pirwa. Rubanga en amara, doko ngat kame tie kede amara kuo i Rubanga doko Rubanga da tie i kuo mere.

¹⁷Kotieko mino amara obedo kakare i kuo wa tetekeny obedunu kede nwangcuny i Ceng me Ngolo kop, pien bala kame kuo mere tie kede, wada kuo wa cal kamanono i piny kan.

¹⁸Lworo likame tie i amara, do amara kame tie kakare riamo lworo tenge, pien lworo tie gikame makere kede alola, doko ngat kame tie kede lworo udo amara mere likame otuno kakare.

¹⁹Wan otienu kede amara pien Rubanga en kogeo maro wa.

²⁰Ngat kame waco be, “Ango amaro Rubanga,” do di edagi omin mere amoto amin mere udo engalo; pien ngat kalikame maro omin mere amoto amin mere kame en eneno, likame ekaruno maro Rubanga ngat kalikame pwodi en eneno.

²¹Cik kame Kirisito omio wa en ine be: jo kame maro Rubanga miero mar imiegu kede amiegu gi da.