Read kumam Jongolkop 1 Bible Online

Jongolkop 1 - kumam bible

Jongolkop 1

¹Di do Yosua otieko to, jo me Isirael oko penyo Rwot be, “Ekeko mene kikom ikekon wan en kame poore cako ot suro jo me Kanan, pi yi kede gi?”

²Rwot oko waco negi be, “Jo me ekeko ka Yuda bino cako ot. Ango atie mino lobo nono i cing gi.”

³Jo me Yuda oko waco ne imiegu gi me ekeko ka Simeon be, “Bia iuperenu kede wa ootunu i adul kame kopoko ne wan, tetekeny ogalarunu jo me Kanan. I cen mere di do wada oko bino upere kede wu ot i adul kame kopoko ne wu.” Aso, jo me ekeko ka Simeon oko upere kede gi.

⁴Di do jo me Yuda bin oko ot yi, di Rwot oko mino jo me Kanan kede jo Perisi i cing gi, di gin bin kiko bwono isirikalen tutumia tomon (10,000) i Besek.

⁵Gin bin kiriamo kede Adonibesek Besek kunono, di kiko yi kede, kiko bwono jo Kanan kede jo Perisi.

⁶Adonibesek bin oko ringo, do gin kiko wape di kiko make, kiko ngolongolo tenge lwete adongo me tiene kede me cinge.

⁷Adonibesek oko waco be, “Abakai ot kanyaare kame kongolongolo lwet gi adongo me cing gi kede me tien gi oudo obedo depo angidingidin me cam i dud emesa na. Rubanga otieko timo nango gikame ango oudo atimo ne gin.” Gin kiko tere Yerusalem, di eko to kunono.

⁸Jo me Yuda bin oko suro Yerusalem di kiko mane. Gin bin kineko jo mege dedede di kiko wango bomba kede mac.

⁹I cen mere jo me Yuda oko ot yi kede jo me Kanan kame oudo bedo i piny kobedo mori mori, i dud mori, kede i piny kotuo me bad tetu piny.

¹⁰Gin kiko ot yi kede jo me Kanan kame bin bedo i bomba me Keburon (Keburon sek ber oudo kolwongo be Kiriat Araba); di gin kiko bwono isirikalen ka Sesai, Akiman kede Talamai.

¹¹Jo me Yuda oko yai kikuno di kiko ot suro bomba me Debir (sek ber oudo kolwongo bomba me Debir be Kiriat Seper).

¹²Ngat acel kikom gi, kame oudo kolwongo be Kaleb, oko waco be, “Ngat kame bino suro Kirat Seper di eko mane, ango abino mine enyomo nyara Akisa.”

¹³Otiniel wot ka Kenas, omin me Kaleb atidi en oko mano bomba nono; di Kaleb oko mine enyomo Akisa nyare.

¹⁴Ceng kame Akisa oko ot kede but Otiniel, en eko dino cware be ekwai papa mere Kaleb poto. Di do Akesa oudo tie wok ki ngei punda mere, Kaleb oko penye be, “Nyo kame cunyi tie mito?”

¹⁵En eko dwoko ne be, “Ango amito imia giamia; bala kame in itieko keta kede i lobo kotuo, mia ataneko me pii da.” Aso, Kaleb oko mine ataneko me malo kede me piny.

¹⁶Kakame jo me ekeko ka Yuda oyai kede ki Jeriko, bomba me tugo, jo Ken kame oudo obedo ikwae ka papa me dako ka Musa, oko upere kede gi ot i wi tim me Yuda kame oudo tie i bad tetu piny me Arad. Gin bin kiko donyo bedo kede jo Amelek.

¹⁷Jo me Yuda bin oko ot karacel kede imiegu gi me ekeko ka Simeon, di gin kiko bwono jo Kanan kame bin bedo i bomba me Sepat di kiko muducaro bomba nono atwal. Manono oko mino ocako nying bomba nono be Koroma.

¹⁸Jo me Yuda oko mano bomban me Gasa, Asikelon kede Ekuron, karacel kede adulion koluko gi.

¹⁹Rwot oudo tie kede jo me Yuda, omio kiko mano piny kobedo mori mori nono, do gin bin likame kiko karuno riamo tenge jo kame bin bedo i ebar, pien jo nogo oudo tie kede cabalan me nyonyo ayon.

²⁰Bomba me Keburon bin oko mino but Kaleb bala kame oudo Musa owaco. Kaleb bin oko riamo tenge kiye jo me awobe adek ka Anak.

²¹Do jo ka Benjamin bin likame oko riamo tenge jo Yebu kame oudo bedo Yerusalem. Manono en komio jo Yebu odong bedo Yerusalem kede jo ka Benjamin tuno tin.

²²Jo me ot ka Yosepu da bin oko ot suro bomba me Betel, kame oudo kolwongo be Lus; di Rwot oko konyo gi.

²³Gin kong kicwao bega ot ngingico bomba me Betel.

²⁴Kakame bega nogo oneno kede icuo moro di wok ki bomba, gin kiko waco ne be, “Nyut ne wan yongayo me donyo i bomba, di wan oko bino timo nin mwolo.”

²⁵Aso, en eko nyuto negi yongayo me donyo i bomba, di gin kiko neko jo me bomba nono dedede, kwanyo kenekene icuo nono kede jo me ode.

²⁶Icuo nono oko yai eoto i lobo me jo Kiti kakame eko gero iye bomba. En bin eko cako nying bomba nono be Lus; manono en nyinge tuno tin.

²⁷Jo me ekeko ka Manase bin likame oko riamo tenge jo kame bin bedo i bomban me Bet San, Tanak, Dor, Ibileam, Megido, karacel kede calere gi; jo Kanan bin oko meede kede bedo kunono.

²⁸I kare kame jo me Isirael oko doko tek kede, gin bin kiko dino jo Kanan timo negi tice bala ipasoi, do likame kiko riamo gi tenge.

²⁹Jo me ekeko ka Epuraimu da bin likame oko riamo tenge jo Kanan kame bin bedo i bomba me Geser, di manono oko mino jo Kanan oko donyo bedo Geser kede gi.

³⁰Jo me ekeko ka Sebulun da bin likame oko riamo tenge jo kame bin bedo i bomban me Kitiron kede Nakalol, di manono oko mino jo Kanan oko meede bedo kunono kede gi. Do gin bin kiko dino gi timo negi tice bala ipasoi.

³¹Jo me ekeko ka Aser da bin likame oko riamo tenge jo kame bin bedo i bomban me Ako, Sidon, Akalab, Akisib, Keleba, Apik, kede Rekob,

³²di manono oko mino jo me ekeko ka Aser bin oko donyo bedo i diere me jo Kanan.

³³Jo me ekeko ka Naputali da bin likame oko riamo tenge jo kame bin bedo i bomban me Bet Semes kede Bet Anat. Do gin bin kiko donyo bedo i diere me jo Kanan kame bin bedo i lobo nono. Akadi kamanono da, gin bin kiko mino jo me bomban nogo odonyo timo negi tice bala ipasoi.

³⁴Jo Amor bin oko jwango jo me ekeko ka Dan kidwoko gi cen i piny kobedo mori mori di likame kiko yei negi wok piny i ebar.

³⁵Jo Amor bin oko cere di kiko meede kede bedo i moru me Keres, i Aijalon, kede i Salabim, do jo me ikekon ka Epuraimu kede me ka Manase bin oko pugo gi di kiko mino gi timo negi tice bala ipasoi.

³⁶Ikor me jo Amor bin yai ki kakame yito Akurabim, kede ki Sela di eko yito malo.