Read kumam Jongolkop 10 Bible Online

Jongolkop 10 - kumam bible

Jongolkop 10

¹Ingei to ka Abimelek, Tola wot ka Pua, en akwar Dodo, oko wokun pi lako jo me Isirael. En oudo ebedo dano me anywali me ekeko ka Isakar kame oudo bedo Samir i piny kobedo imukuran me Epuraimu.

²En oudo ebedo ngangolkop me Isirael pi mwakini ot are kiwie adek. Bin en eko to di oko yike Samir.

³Ingei tel ka Tola, Yair dano me Gilead en oko lunyo wange. En eko telo Isirael pi mwakini ot are kiwie are.

⁴En oudo etie kede awobe ot adek, kame oudo ringo kede pundan ot adek; gin oudo kitie kede bomban ot adek i lobo me Gilead, kame kolwongo be Kabot Yair tuno tin.

⁵Yair bin oko to di oko yike Kamon.

⁶Jo me Isirael oko bobo timo gikarac i nyim Rwot; gin kidonyo woro Baal kede Asitate, karacel kede rubangan me Siria, me Sidon, me Moab, me Amon kede me Pilistia. Gin kiweko Rwot di kiko jiko wore.

⁷Aso, Rwot cunye oko wang kede jo me Isirael di eko mino jo me Pilistia kede Amon oyi kede gi di oko bwono gi,

⁸di jo nogo oko pupuno jo me Isirael di kitidilo gi i mwaka nono. Pi mwakini tomon kiwie kanyauni gin kiko bedo tero kirac jo me Isirael kame oudo bedo i piny me jo Amor, i bad tetu kide me ecilet me Yorodan, i lobo me Gilead.

⁹Jo Amon da oko ngolo ecilet me Yorodan pi ot yi kede jo me ikekon ka Yuda, Benjamin kede Epuraimu. Jo me Isirael oudo tie kede twon peko.

¹⁰Aso, jo me Isirael oko kok but Rwot di kiwaco be, “Wan odubo buti, pien wan oweki in Rubanga wa, di oko donyo woro Baal.”

¹¹Rwot oko dwoko negi be, “Jo me Misiri, jo Amor, jo Amon, jo Pilistia,

¹²jo Sidon, jo Amalek kede jo Maon[3] bin otero wu kirac di wun ikounu kok buta; mam bin ango ako lako wu ki cing gi?

¹³Do akadi bed bala kamanono da, wun ikounu weka di ikounu donyo woro rubangan apat; pi manono ango likame bobo abino medo lako wu.

¹⁴Otunu ikokunu but rubangan kame wun itiekunu yero woro. Ber gin kikonyu kede peko wu.”

¹⁵Do jo me Isirael oko waco ne Rwot be, “Wan odubo. In tim ne wa gikame ber kibuti, do okwai ber ilak wa tin!”

¹⁶Aso, gin kiko weko rubangan me kumbor di kiko donyo woro Rwot; di Rwot likame oko yei kanyakino neno di jo me Isirael neno can.

¹⁷Di isirikalen me jo Amon oko iikere pi yi, di kiko cokere kigero kimere gi Gilead. Jo me Isirael da oko cokere kiko gero kimere gi Misipa i Gilead.

¹⁸Di jotel me isirikalen me Isirael oko donyo penyere ken gi ken gi be, “Ngai kame bino cako copo yi i kom jo Amon? Ngat nono en kame bino doko ngatel me jo dedede atie Gilead.”