Read kumam Jongolkop 11 Bible Online

Jongolkop 11 - kumam bible

Jongolkop 11

¹Yeputa dano me Gilead, kame toto mere oudo obedo malaya, oudo obedo ngayi atek. Papa mere Gilead

²oudo doko oko nywalo awobe ace kede dako mere. Kakame awobe kame enywalo kede dako mere odongo kede, gin kiko riamo Yeputa tenge ki paco di kiwaco ne be, “Likame tie gimoro me ot ka papa wa kame in ibino sikao, pien in ibedo wot ka dako kapat.”

³Yeputa oko ringo tenge kibut imiegu mege di eko ot bedo i lobo me Tob. Jo mogo koudo tie kede iponeso areco oko ribere kede en di kiko donyo yako jo.

⁴Ingei kare moro, jo Amon oko ot yi kede jo me Isirael.

⁵Kakame manoni otimere kede, joadongo me Gilead oko ot pi dwoko Yeputa ki lobo me Tob.

⁶Gin kiwaco ne Yeputa be, “Bia itel wa tetekeny otwer yi kede jo Amon.”

⁷Do Yeputa oko dwoko ne joadongo kowok ki Gilead nogo be, “Mam wun nogi en kame bin idaganu di ikounu riama tenge ki ot ka papa na? Pinyo komio doko nan ibinunu buta iesawa kame itienu kede i peko?”

⁸Gin kiko waco ne Yeputa be, “Akadi bed bala mago otimere da, nan wan otieko dwogo buti, tetekeny iupere kede wa pi ot yi kede jo Amon, di in iko bino doko ngatel me jo dedede me Gilead.”

⁹Yeputa oko waco negi be, “Ka wun idwokanu pi ot yi kede jo Amon, di Rwot oko mina abwono gi, ango abino doko ngatel wu.”

¹⁰Gin kiko dwoko ne Yeputa be, “Wan oyei. Rwot en mujura wa.”

¹¹Aso, Yeputa oko upere ot kede joadongo kowok ki Gilead nogo, di jo oko mine edoko ngapug gi kede ngatel gi. Yeputa oko waco kope mege dedede i nyim Rwot i Misipa.

¹²Yeputa oko cwano jo but abaka me jo Amon di epenye be, “Nyo arac i dierediere nin kede wan, komio itieko bino pi yi kede lobo wan?”

¹³Abaka me jo Amon oko dwoko ne jo kame Yeputa oudo ocwao be, “Kakame jo me Isirael bin oyai kede ki Misiri, gin kiko tero lobo na cako ki ecilet me Arunon tuno i ecilet me Jabok kede ecilet me Yorodan. Nan miero idwoke buta kede mulem.”

¹⁴Yeputa oko bobo cwano jo odok but abaka me jo Amon

¹⁵kede kop be, “Likame jo me Isirael otero lobo me Moab amoto me Amon.

¹⁶Do kakame jo me Isirael oyai kede ki Misiri, gin bin kiko ngolo wi tim di kiko tuno i Nam Akwar, di kiko tuno Kades.

¹⁷Jo me Isirael oko cwano jo but abaka me Edom pi penyo akarunikin kibute me gin beo ki lobo mere. Do abaka me Edom oko dagi winyo kop gi. Gin bobo kiko cwano jo but abaka me Moab da, do eda eko dagi winyo kop gi. Aso, jo me Isirael bin oko dong bedo Kades.

¹⁸Bin gin di do kiko beo ki wi tim, di kiko manaro lobo me Edom kede me Moab, di kiko tuno i bad tetu kide me lobo me Moab, di kiko gero kimere gi loka tetuca me ecilet me Arunon. Bin likame gin kiko ngolo ecilet me Arunon, piento en oudo ebedo ikor kede lobo me Moab.

¹⁹Jo me Isirael bin oko cwano jo but Abaka Sikon me jo Amor kame bin bedo Kesibon, di kiko kwano akarunikin kibute me gin beo ki lobo mere di gin kioto i lobo gi amako gi.

²⁰Do Abaka Sikon likame oko bedo kede gen but jo me Isirael pi beo ki lobo mere. En eko coko isirikalen mege dedede karacel di kiko gero kimere gi Yakas, di kiko suro jo me Isirael.

²¹Di Rwot Rubanga me Isirael oko mino Sikon kede jo mege dedede i cing jo me Isirael, di jo me Isirael oko bwono gi; aso jo me Isirael oko gamo adul dedede kame jo Amor oudo bedo iye oko doko mergi.

²²Gin kiko donyo bedo i adul dedede me jo Amor cako ki Arunon i bad tetu piny tuno Jabok i bad tetu malo, kede cako ki wi tim atie i bad tetu kide tuno Yorodan i bad tetu tim.

²³Aso, Rwot Rubanga en oudo oriamo jo Amor pir jo mege me Isirael.

²⁴Benyo, nan in imito gamo lobo nono kibut wa? Mam wuda iterunu doko meru gimoroni kame rubanga wu Kemos mio wu? Benyo, likame wan do opoore tero di eko doko merwa gikame Rwot Rubanga wa oyi oko mano pirwa?

²⁵Benyo, iparo be in ilo Abaka Balak wot ka Sipor me Moab? Iparo be bin en engoi kede jo me Isirael, arabo eyi kede gi?

²⁶Pi mwakini tol adek, jo me Isirael otieko bedo Kesibon kede Aroer, kede i bomban ace atino kame luko gi, kede i bomban kame tie i dog ecilet me Arunon. Pinyo komio likame ikounu dwoko gi i kare noni dedede?

²⁷Likame ango atimo ni raco moro, do in en kame itie timo nango raco i yore me cako yi keda. Wek Rwot en ngangolkop tin engol kop i dierediere me jo me Isirael kede jo Amon.”

²⁸Do abaka me jo Amon likame oko yei winyo kop kame Yeputa ocwao ne.

²⁹Di tipo ka Rwot oko bino i kom Yeputa. Yeputa oko beo pelao Gilead kede Manase, di eko tuno Misipa atie Gilead, di eko kato paka Amon.

³⁰Yeputa oudo okwongere but Rwot di ewaco be, “Ka in imio jo Amon i cinga,

³¹ango abino wango bala giayala buti dano me agege kame bino wok ki oda pi riamo keda kakame ango adwogo kede ki kabwono yi.”

³²Aso, Yeputa oko ngolo ecilet pi ot yi kede jo Amon, di Rwot oko mine ebwono gi.

³³En eko bwono gi adikinicel cako ki Aroer tuno paka i adul kame gongere kede Minit, manono ribo bomban ot are, ape ape paka Abel Keramim. Jo me Isirael oko bwono jo Amon di kiko neko gi nek kalikame wacere.

³⁴Kakame Yeputa oko dok kede paco mere Misipa, nyare oko ot siramo en di eyango ayekeyeke di emielo. Manono en oudo obedo atin mere acel kenekene, likame doko oudo etie kede atin moro ace.

³⁵Kakame eko neno kede nyare, en eko nyinyilo igoen mege pi cwercuny di ewaco be, “Okwe nyara! Itieko mino cunya onyote. Nan itieko mina abedo kede twon peko. Pien ango atieko kwongere but Rwot, nan likame doko atwero loko kwongere na!”

³⁶Nyako nono oko waco ne be, “Papa na, ka in itieko kwongere but Rwot, in tim nango gikame in itieko cikere pi timo, pien Rwot otieko mini iculo kwor i kom jokwor ni, gin jo Amon.”

³⁷Di en eko meede di ewaco ne papa mere be, “Do kong tim na kaman: weka ber pi dwete are aot kede jowota i wi moru di ako donyo wire kunono di akok pi kite kame ayaro to kede di ango pwodi nyako kalikame ongeo icuo.”

³⁸En eko cwane eoto pi dwete are. Nyako nono oko upere kede jowote kioto i wi moru di kiko donyo koko ki kuno, piento en oudo eyaro to di pwodi en nyako kalikame ongeo icuo.

³⁹Ingei dwete are, en eko dok but papa mere. Papa mere oko timo ne gikame oudo ecikere iye but Rwot; en eko to di pwodi likame ebuto kede icuo moro. Manoni en oko bedo acakini me itok me jo me Isirael

⁴⁰kame tie be, anyira ber poore ot tenge pi ceng ongwon buli mwaka pi koko nyar ka Yeputa me Gilead.