Read kumam Jongolkop 13 Bible Online

Jongolkop 13 - kumam bible

Jongolkop 13

¹Jo me Isirael oko bobo dubo but Rwot, di Rwot oko jalo gi i cing jo me Pilistia pi mwakini ot ongwon.

²Tie oudo icuo moro me Sora, dano me ekeko ka Dan, kame nyinge oudo Manoa. Dako mere oudo obedo adonge, likame enywalo atin moro.

³Malaika ka Rwot oko neeno but dako nono di oko waco ne be, “Bed bala in adonge likame inywalo atin moro, in ibino yac di iko nywalo atin awobi.

⁴Nan miero igwokere kur imat bwini amoto kongo moro akec, arabo camo gimoro me kwer.

⁵Ingei in nywalo wodi nono, likame ipoore lielo yer wie, pien cako i ceng me nywale en kobino mine but Rwot bala ngat kame kokwero bute. En ebino cako tic me lako jo me Isirael ki cing jo me Pilistia.”

⁶Dako nono oko ot di eko waco ne cware be, “Dano ka Rubanga obino buta, oudo nene kelo lworo bala neno malaika ka Rwot; likame ango apenye kakame ewok kiye, doko eda likame ewaco na nyinge.

⁷Do en ewaco na be ango abino yac ako nywalo atin awobi. En ewaco na be kur amat bwini moro amoto kongo moro, akadi camo gimoro me kwer, pien atin nono kobino kwere but Rubanga cako ceng me nywale tuno ceng me to mere.”

⁸Di Manoa oko lego but Rwot be, “Okwe Rwot, akwao be, koto dano ka Rubanga kame in oudo icwao odwogo bobo but wa di eko waco ne wa gikame opoore timo kede awobi kame obino nywalo.”

⁹Rubanga oko yei winyo kop ka Manoa, di malaika ka Rubanga oko bobo dwogo but dako nono kakame oudo etie bedo kede i poto; do Manoa cware oudo likame tie karacel kede en.

¹⁰Dako nono oko ringo but cware oyotoyot di eko waco ne be, “Icuo kame oudo obino buta cenge ca bobo omedo neeno na.”

¹¹Manoa oko yai di eko lubo dako mere. En eko ot but icuo nono di eko penye be, “In en icuo koudo tie yamo kede dako noni?” Icuo nono oko dwoko be, “Ebo, ango inononi.”

¹²Di Manoa oko waco be, “Nan kame kop nin oko cobere, awobi nono bino lubo ekite kuo acal nadi? Nyo kame ebino timo?”

¹³Malaika ka Rwot oko dwoko be, “Dako ni poore timo gi dedede kame ango awaco ne.

¹⁴Likame epoore camo gimoro kame wok ki kom olok; likame epoore mato bwini arabo kongo moro ace, doko da likame epoore camo gi me kwer. En epoore lubo gi dedede kame ango atieko waco ne.”

¹⁵Manoa oko dwoko ne be, “Kong dar wa onek diel moro apwodi bwong oko tedo ni.”

¹⁶Malaika ka Rwot oko waco ne Manoa be, “Akadi ka in icere keda, ango likame abino camo cam nin. Do ka in imito iiko giayala awanga, in yale but Rwot.” Manoa oudo likame ngeo be malaika ka Rwot inonono.

¹⁷Manoa oko dwoko ne be, “Wac ne wa nyingi, tetekeny ka kop kame iwaco ocobere wan okaruno bedo kede wor buti.”

¹⁸Do malaika ka Rwot oko penye be, “Pinyo komio imito ngeno nyinga? En ebedo nying me aura.”

¹⁹Aso, Manoa oko tero diel abwong kede giayala me alos di eko yalo gi ki wi lela but Rwot, en ngat kame etimo giaura.

²⁰Kakame leb mac tie liel kede ot malo ki alutari, Manoa kede dako mere oko neno di malaika ka Rwot tie ot malo kede leb mac nono, di gin kiko riebere kiumo wang gi piny.

²¹Likame malaika ka Rwot oko bobo medo nyutere but Manoa kede dako mere. Di do Manoa oko ngeno be manono oudo obedo malaika ka Rwot.

²²Di Manoa oko waco ne dako mere be, “Ateteni wan obino to, pien wan otieko neno Rubanga!”

²³Do dako mere oko dwoko be, “Koto di Rwot oudo mito neko wa, oudo koto likame egamo giayala wa, doko da oudo koto likame enyuto ne wa gi nogi dedede, akadi koto nan waco ne wa kope nogi dedede.”

²⁴Dako nono oko nywalo atin awobi di eko cako nyinge Samuson. Atin nono oko dongo di Rwot oko mine winyo.

²⁵Di twer ka Rwot oko cako mine teko kakame oudo etie kede i Makane Dan, kame tie dierediere me Sora kede Esitaol.