Read kumam Jongolkop 18 Bible Online

Jongolkop 18 - kumam bible

Jongolkop 18

¹I kare nono oudo Isirael likame tie kede abaka moro. Doko da i kare nono jo me ekeko ka Dan oudo tie mono adul moro kame twero doko mergi di kiko donyo bedo iye; pien kikom jo me ikekon me Isirael, gin oudo pwodi likame kitie kede lobo moro kame komio gi amako gi.

²Aso, jo me ekeko ka Dan oko yero cuo kany kikwiri kikom jo dedede me ekeko gin, di kiko cwano gi yai ki bomban gi me Sora kede Esitaol, pi ot begao lobo kede ngingico en. Gin kiwaco ne cuo nogo be, “Otunu ingingicunu lobo nono.” Kakame kituno kede i piny kobedo imukuran me Epuraimu, gin kiko donyo bedo i ot ka Mikaa.

³Kakame oudo gin kitie kede i paco ka Mikaa, gin kiko winyo yamo me awobi Ngalebi di kiko twero pi ngeno leb mere; aso, gin kiko ot bute di kiko penye be, “Ngai kokeli kan? Nyo kame in itie timo kan?”

⁴En eko waco negi be, “Wan owinyere kede Mikaa di ango ako doko ngasaseredoti mere kame en eculo.”

⁵Gin kiko waco ne be, “Peny Rubanga ka sapali kame wan otie ot iye noni bino cobere ne wa kiber.”

⁶Ngasaseredoti nono oko dwoko be, “Otunu kede mulem. Rwot tie gwoko wu i sapali wu noni.”

⁷Cuo kany nogo oko meede kede ot; kakame kiko tuno kede Lais, gin kiko neno be jo me kuno oudo tie bedo abongo lworo moro, di cal acala bala jo me Sidon. Oudo gin kitie kede anapakin doko di kipalaro. Likame tie gimoro i wi lobo kan kame oudo kili kede, gin oudo kibaro twatwal. Doko da gin oudo kibedo kakabor twatwal kede jo me Sidon, doko da oudo likame kitie kede nywak me epone moroni kede jo apat.

⁸Kakame cuo kany nogo oko dok kede Sora kede Esitaol but wade gi, jo oko penyo gi gikame kiudo kunono.

⁹Gin kiko dwoko negi be, “Yaunu ootunu osurunu Lais. Wan oneno lobo nono, en eber twatwal. Iyarunu dong adonga kan abongo timo gimoro? Kur igalunu! Otunu isurenu ikounu mane!

¹⁰Ka itununu kunono, ibinunu udo be jo me kuno opalaro. En ebedo lobo adwong; gi dedede kame dano mito i wi lobo tie iye, doko da Rubanga otieko mine i cingu.”

¹¹Cuo tol kanyape me jo me ekeko ka Dan oko yai ki Sora kede Esitaol di kitieko mako jamini me yi.

¹²Gin kiko ot di kiko gero kimere gi i bad tetu tim me Kiriat Yearim i Yuda. Manono en komio kolwongo kanono tuno tin be Makane Dan.[6]

¹³Gin kiko yai kikuno di kiko kato paka tuno i piny me imukuran me Epuraimu, di do kiko tuno paco ka Mikaa.

¹⁴Di cuo kany koudo ogeo ot ngingico lobo me Lais oko waco ne jowot gi be, “Benyo, ingeunu be i ude nogi tie iye caljwogi kame kopuco kome kede siliba? Doko tie iye epod kede caljwogi ace apat. Nan do nenunu gikame itwerunu timo.”

¹⁵Aso, gin kiko donyo i ot kame awobi Ngalebi bedo iye i paco ka Mikaa, di kiko mote.

¹⁶Esawa nono cuo tol kanyape me jo me ekeko ka Dan komako jamini me yi oudo tie cungo i erute,

¹⁷di cuo kany koudo ooto pi ngingico lobo nono oko kato akata paka donyo i ot di kiko kwanyo caljwogi kame kopuco kede siliba, epod kede caljwogi ace apat mege. Ngasaseredoti oudo tie cungo i erute karacel kede cuo tol kanyape koudo mako jamini me yi.

¹⁸Kakame cuo nogo odonyo kede i ot ka Mikaa di kiko kwanyo caljwogi kame kopuco kede siliba, epod, kede caljwogi ace apat mege, ngasaseredoti oko penyo gi be, “Wun itienu timo nyo?”

¹⁹Gin kiko dwoko ne be, “Lingi! Um dogi, di iko upere kede wa, di iko doko ngat kame mio wan tam kede ngasaseredoti wa. Benyo, eber ne in bedo ngasaseredoti me paco me dano acel, arabo bedo ngasaseredoti me jo me ekeko alutu me Isirael?”

²⁰Di do ngasaseredoti oko yei kop gi. En eko kwanyo caljwogi kame kopuco kede siliba, epod, kede caljwogi ace apat mege, di eko upere kede jo.

²¹Aso, gin kiko meede kede sapali gi, di kimio idwe, leini kede jamini gi ace apat otelo negi anyim.

²²Kakame kitieko lanyo kede paco ka Mikaa kakabor, Mikaa oko lwongo cuo kame ude gi oudo kio kede mere, di gin kiko wapo jo me ekeko ka Dan di kiko mako gi i yongayo.

²³Gin kiko lelemo ne jo me ekeko ka Dan, jo nogo oko lokere di kiko penyo Mikaa be, “Nyo arac komio in ibino kede twon jogo dedede?”

²⁴En eko dwoko be, “Wun ikwanyunu caljwogi na kame ango atimo, kede da ngasaseredoti di ikounu yai ot kede gi; nan ango adong do kede nyo? Benyo benyo kame wun itwerunu doko penya kede be, ‘Nyo arac?’ ”

²⁵Jo me ekeko ka Dan oko waco ne be, “Oudo koto eber ka iling alinga likame iwaco ne wa kop moro, pien manoni twero mino jo gi cuny gi wang di kiko suri, di kiko neki kede jo me turi dedede.”

²⁶Di do jo me ekeko ka Dan oko girgi meede kede ot. Mikaa oko neno be jo nogo oudo tek likame esobolo yi kede gi, en eko lokere edok paco.

²⁷Ingei cuo me Dan tero ngasaseredoti kede gikame Mikaa oudo ocweo, gin kiko ot di kiko suro Lais, en bomba me jo atie kede anapakin di kipalaro, kame tie i aditot me Bet Rekob. Gin kiko neko jo kame oudo bedo iye di kiko wango bomba nono. Likame tie ngat kame oudo twero konyo jo nogo, pien Lais oudo bor kede Sidon, doko da jo me bomba nono oudo likame tie kede nywak me epone moroni kede jo apat. Jo me Dan oko temuno bobo gero bomba nono di kiko donyo bedo iye.

²⁹Gin kiko cako nying bomba nono Dan, en nying kwaru gi koudo obedo wot ka Yakobo; do nying bomba nono oudo Lais.

³⁰Di do jo me ekeko ka Dan oko sipo caljwogi me awora, di Jonasan wot ka Geresom akwar Musa oko donyo tic bala ngasaseredoti gi, doko da ikwae mege oko meede tic bala josaseredoti gi tuno i kare kame komako kede jo di oko tero gi obukui tetek.

³¹Caljwogi ka Mikaa oko dong kanono pi kare dedede kame Eema kame koworo iye Rubanga oudo tie Silo.