Read kumam Jongolkop 20 Bible Online

Jongolkop 20 - kumam bible

Jongolkop 20

¹Jo dedede me Isirael cako ki Dan i bad tetu malo tuno Beereseba i bad tetu piny, ribo kiton jo atie i lobo me Gilead oko cokere i ekodet acel i Misipa i nyim Rwot.

²Jotel me jo me ikekon dedede me ateker me Isirael oudo tie i cokere nono me jo ka Rubanga; oudo tie iye isirikalen tutumia tol ongwon (400,000) aoto kede tien di kimako jame me yi.

³Jo ka Benjamin oko winyo be jo ace me Isirael oudo ocokere Misipa. Jo me Isirael oko penyere be, “Wac ne wa, gikarac noni otuno timere benyo?”

⁴Ngalebi kame oudo koneko dako mere oko waco be, “Ango kede dako na oudo ooto Gibea i lobo ka Benjamin pi buto iye.

⁵Cuo me Gibea oko ot sura iwor di kiko luko ot. Gin oudo kimito neka, do kiko buto kede dako na tetek tuno en to.

⁶Ango ako kwanyo kome di ako ngongolo en i adulion, di ako cwacwao adulion nogo i lobo lung me Isirael; pien gin kitimo gikarac me aura i Isirael.

⁷Aso, wun jo me Isirael nan nyamunu kop noni di ikounu kati kede tam moro.”

⁸Jo dedede oko lepun malo kicel di kiwaco be, “Likame tie ngatamoro kikom wa kame bino dok i eema mere amoto ture.

⁹Do nan gikame wan obino timo ne Gibea ine: wan obino uco alulu di oko yero jo kame bino ot yi kede.

¹⁰Wan obino kwanyo cuo tomon kikom cuo tol acel, kede cuo tol acel kikom cuo tutumia acel, kede cuo tutumia acel kikom cuo tutumia tomon pi tero cam ne isirikalen kame bino ot culo kwor i kom jo me Gibea i lobo me Benjamin, pi tim arac me lewic kame gin kitimo i Isirael.”

¹¹Aso jo dedede me Isirael oko cokere kede tam acel me ot suro Gibea.

¹²Jo me ikekon apapat me Isirael oko cwano cuo mogo ririmo jo dedede me ekeko ka Benjamin di kiwaco negi be, “Raco nyo ine kame wun itiekunu timo noni?

¹³Nan miunu i cing wan jo areco atie Gibea nogo, tetekeny wan onek gi di oko kwanyo tenge raco noni ki i Isirael.” Do jo ka Benjamin oko dagi winyo kop me jo me Isirael wad gi.

¹⁴Gin kiko bino ki bomban dedede atie i lobo me Benjamin kiko cokere Gibea pi yi kede jo me Isirael.

¹⁵I ceng nono jo me ekeko ka Benjamin oko coko ki bomban gi isirikalen tutumia ot are kiwie kanyape (26,000) komako jame me yi, medo i kom jo kame bedo Gibea.

¹⁶Kikom isirikalen nogi, oudo tie iye cuo tol kanyaare (700) kame koyero ayera, kame oudo obedo ingodala; ngat acelacel kikom gi oudo twero pimao yer acel kede engaro me aporocet di likame eko bwot dipe.

¹⁷Jo me ikekon apat me Isirael oko coko isirikalen tutumia tol ongwon (400,000) komako jame me yi, gin dedede jo yi atek.

¹⁸Jo me Isirael oko ot Betel kakame oudo koworo kiye Rubanga di kiko penyo Rubanga be, “Jo me ekeko mene en kame poore ot cako suro jo me ekeko ka Benjamin?” Rwot oko dwoko be, “Jo me ekeko ka Yuda en abino cako ot.”

¹⁹Oru mere, jo me Isirael oko yai odiko di kiko ot gero kimere gi i nget bomba me Gibea.

²⁰Jo me Isirael oko ot pi cako yi kede jo me ekeko ka Benjamin, di kiko mino isirikalen oteere i dog bomba pi yabo yi.

²¹Jo ka Benjamin oko wok ki bomba me Gibea, di i ceng nono kiko neko jo me Isirael tutumia ot are kiwie are.

²²Jo me Isirael oko ot di kiko donyo koko i nyim Rwot tuno piny yuto, di kiko penyo Rwot be, “Benyo, odok bobo medo yi kede imiegu wa jo me ekeko ka Benjamin?” Rwot oko dwoko be, “Otunu iyiunu kede gi.” Aso, Isirikalen me Isirael oko udo nwangcuny, di kiko bobo tere kakame oudo kitere iye i ceng me agege.

²³

²⁴Aso, jo me Isirael oko nyiko pi cako yi kede jo ka Benjamin tien me are.

²⁵Jo ka Benjamin oko wok ki bomba me Gibea tien me are, di kiko neko isirikalen me Isirael tutumia tomon kiwie kanyauni (18,000) koudo mako jamini me yi.

²⁶Di jo me Isirael, isirikalen dedede oko dok Betel di kiko donyo koko; gin kiko donyo bedo i nyim Rwot kunono di kiko kanyo kec tuno piny yuto. Di do kiko yalo giayala awanga kede giayala me nywak i nyim Rwot.

²⁷I kare nono Sanduku me Isikan ka Rubanga oudo tie Betel kanono, di Pinekasi wot ka Eleasar, akwar Aaron en koudo gwoke. Di jo oko penyo Rwot be, “Benyo, odok bobo medo yi kede imiegu wa jo me ekeko ka Benjamin, arabo oweki?” Rwot oko dwoko be, “Otunu, pien diki ango abino mino gi i cingu.”

²⁸

²⁹Aso, jo me Isirael oko mino isirikalen mogo opwono luko Gibea.

³⁰Di do i ceng me adek jo me Isirael oko ot pi suro jo me Gibea di kiko tere pi yi kede jo me Gibea bala kame oudo kibedo timo sek.

³¹Kakame jo ka Benjamin owok kede pi yi kede isirikalen me Isirael, gin kiko ware kilanyo bomba pi wapo jo me Isirael. Bala lem sek, gin kiko cako neko jo me Isirael obar kuno i yongayo adwong aoto Betel kede Gibea. Gin kiko neko Isirikalen ot adek me Isirael.

³²Jo ka Benjamin oko waco be, “Tin bobo oaruno gi bala ngoce.”

³³Isirikalen me Isirael atot koudo otere pi yi oko dok cen di kiko ot tere Baal Tamar, di isirikalen apat koudo opwono oluko bomba oko bwangere wok ki kapwono gi ki bad tetu tim me Geba.

³⁴Cuo tutumia tomon kame koyero ayera i Isirael oko suro Gibea, di yi oko bedo gwai. Do jo ka Benjamin likame oudo ngeo be peko otieko poto negi.

³⁵Rwot oko mino jo me Isirael obwono jo ka Benjamin cenge nono, di kiko neko jo ka Benjamin tutumia ot are kiwie kany kede tol acel (25,100), gin dedede jo kame oudo tie kede jame me yi.

³⁶Jo ka Benjamin oko niang be ateteni oudo kobwono gi. Isirikalen me Isirael atot mege oudo oko dok cen kibut jo ka Benjamin pien gin oudo kitie geno jo koudo opwono luko Gibea.

³⁷Cuo koudo opwono nogo oko bwangere ringo Gibea oyotoyot, di kiko neko jo dedede koudo tie i bomba.

³⁸Ekodet adwong mere me isirikalen me Isirael kede apat koudo opwono luko Gibea oudo owinyere be, kame isirikalen koudo opwono owango bomba di yiro oko neeno di swiridido ki bomba,

³⁹ekodet adwong me isirikalen poore lokere aulo dwogo yi. Do i esawa noni, jo ka Benjamin oudo ajoto otieko neko isirikalen ot adek me Isirael, aso omio kiko waco be, “Ateteni tin bobo obwono gi bala i yi angoce me agege.”

⁴⁰Do kakame yiro ocako swiridido kede malo ki bomba, jo ka Benjamin oko ngoloro cen ngei gi, kom gi oko to neno di bomba lung tie liel di yiro mere tie swiridido malo i edou.

⁴¹Ekodet adwong mere me Isirikalen me Isirael oko wilun, di jo ka Benjamin kom gi oko donyo miel, pien oudo kitieko niang kiber be peko oudo opoto negi.

⁴²Gin di do kiko lokere tenge kibut jo me Isirael di kiko ringo tetu wi tim, do likame kiko lanyo jo kowok ki bomba karacel kede isirikalen.

⁴³Jo me Isirael oko luko jo ka Benjamin, di kiko bedo wapo gi kamanono cako ki Noka di kineko gi tuno karamoro kuno i bad tetu kide me Gibea.

⁴⁴Di kiko neko isirikalen atek yi me jo ka Benjamin tutumia tomon kiwie kanyauni (18,000).

⁴⁵Mogo kikom gi oudo oko wilun di kiko ringo i wi tim tetu lela me Rimon, do oko neko kiye tutumia kany (5,000) i yote adongo ape ape. Jo me Isirael oko bedo wapo jo ace apat ape ape tuno Gidom, di bobo kiko neko jo tutumia are (2,000).

⁴⁶Aso, jo ka Benjamin kame koneko cenge nono oudo dedede tie tutumia ot are kiwie kany (25,000), gin dedede isirikalen atek yi.

⁴⁷Do jo tol kanyape oko bwot kiringo tetu wi tim i lela me Rimon, di kiko dong bedo kuno pi dwete ongwon.

⁴⁸Di jo me Isirael oko lokere dok ne jo ka Benjamin ace apat di kiko neko gin dedede, cuo, mon, idwe kede leini da. Di kiko wango bomban ace apat koudo odong da.