Read kumam Jongolkop 21 Bible Online

Jongolkop 21 - kumam bible

Jongolkop 21

¹Kakame jo me Isirael ocokere kede Misipa, oudo gin kikwongere but Rwot di kiwaco be, “Likame ngatamoro kibut wa bino mino nyare nyomere kede icuo me ekeko ka Benjamin.”

²Aso jo me Isirael oko ot Betel di kiko donyo bedo kuno i nyim Rwot tuno otieno. Gin oudo kitie koko kitek kede dwan amalo di kiwaco be,

³“Okwe Rwot Rubanga me Isirael, nyo komio manoni otimere? Pinyo komio jo me ekeko acel tie tiek i Isirael?”

⁴Ceng alubo mere jo oko dilo yai odiko sek di kiko gero alutari kanono, di kiko mino giayala awanga kede giayala me nywak.

⁵Jo me Isirael oko penyere be, “Jo me ekeko mene me Isirael en kalikame obino i cokere Misipa i nyim Rwot?” Pien gin oudo kikwongere be ngat kalikame ooto i cokere me Misipa kobino neke.

⁶Jo me Isirael oudo kisa omako gi kede imiegu gi kobedo jo me ekeko ka Benjamin, omio kiko waco be, “Tin Isirael okei jo mege me ekeko acel.

⁷Nan obinunu timo benyo pi udo ne jo ka Benjamin kodong mon? Pien wan otiekunu kwongere but Rwot be wan likame obinunu mino gi kinyomo nyar wa moro.”

⁸Kakame gin kiko pepenyo kede ka oudo tie jo me ekeko moro me Isirael kalikame ooto i cokere Misipa, gin kiko udo be jo me Jabes Gilead oudo likame tie kuno;

⁹kakame oudo kotie lwongo kede nying isirikalen, likame tie dano moro me Jabes Gilead koudo tie kunono.

¹⁰Aso, jo koudo ocokere oko cwano isirikalen tutumia tomon kiwie are (12,000) kunono kede cik kame waco be, “Otunu ikounu neko jo me Jabes Gilead, mon ribo kiton idwe.

¹¹Nekunu cuo dedede kede mon dedede kotieko bilo buto kede cuo.”

¹²Gin kiko udo i Jabes Gilead anyira tol ongwon kalikame pwodi ongeo cuo di kiko tero gi Silo, kame tie i lobo me Kanan.

¹³Di jo dedede koudo ocokere oko cwano kop but jo ka Benjamin koudo tie i lela me Rimon di kiwaco negi kop me jiko yi.

¹⁴Jo ka Benjamin oko dwogo, di jo me Isirael oko mino gi anyira me Jabes Gilead kame oudo kiweko likame kineko; do anyira nogo likame oko romo gi.

¹⁵Jo oko bedo kede kisa i kom jo ka Benjamin, pien Rwot oudo otieko turo aribakin me jo me ikekon apapat me Isirael.

¹⁶Aso, joadongo koudo tie i cokere oko penyere be, “Nan obinunu timo benyo pi udo ne jo ka Benjamin kodong mon, pien likame tie dako moro kikom jo me ekeko ka Benjamin kodong kuo?

¹⁷Likame opoorenu kei jo me ekeko moro me Isirael, pi manono miero jo ka Benjamin kodong kuo bed kede ikwae kame bino lunyo wang gi waru.

¹⁸Do likame wan otwero yei negi nyomo anyira wa, pien wan oudo otieko waco be ilam poore mak dano kame bino mino nyare nyomere kede icuo me ekeko ka Benjamin.”

¹⁹Aso, gin kiko waco ken gi ken gi be, “Nenunu, ebaga ka Rwot kame kocamo buli mwaka oyapuno timere Silo.” (Silo tie i bad tetu malo me Betel, i bad tetu piny me Lebona, kede i bad tetu kide me yongayo adwong kame yai ki Betel ot Sekem.)

²⁰Aso, kiko waco ne jo ka Benjamin be, “Otunu ikounu pwopwono i poti me olok

²¹ikounu donyo kiire. Kame anyira me Silo oko bino pi miel i kare me ebaga, wun wokunu ki poti me olok di ngat acelacel ko mako tetek nyako me Silo di eko tere pi doko dako mere, di do ikounu dok i lobo me Benjamin.

²²Di do kame papi gi arabo imiegu gi obino kede koko butu, wun ibinunu waco negi be, ‘Timunu wa ber, yeunu ne wa bedo kede gi; pien likame wan omako gi ki yi pi bedo mon wa. Doko da likame wun ibinunu bedo kede raco moro me turo kwongere wu, piento likame wun imiunu gin but wa.’ ”

²³Jo ka Benjamin oko timo kamanono; buli ngat acelacel kibut gi otero nyako acel pi doko dako mere kikom anyira jomiel kame kimako. Di do gin kiko yai kidok i adul gi, kiko bobo medo gero bomban gi.

²⁴Aso, jo ace me Isirael oko yai dok, ngat acelacel odok ture, i adul me jo me ekeko mere me anywali.

²⁵I kare nono abakai oudo likame tie i Isirael; jo dedede oudo timo gikame cuny gi mito.